ឧត្តម ចូលព្រះខ័នរាជស្វាយរៀងវិញ ដោយសារឃើញក្រុមបានលទ្ធផលមិនល្អនៅជើងទីមួយ

កីឡាជាតិ

ជាតិ

ឧត្តម ចូលព្រះខ័នរាជស្វាយរៀងវិញ ដោយសារឃើញក្រុមបានលទ្ធផលមិនល្អនៅជើងទីមួយ

30, Jun 2018 , 8:46 am

រូបភាព

រូបភាពពីហ្វេសប៊ុកក្លិបព្រះខ័នរាជស្វាយរៀង

ដោយ:

ក្រោយចាកចេញពីក្លិបម៉ាឡេស៊ី Negeri Sembilan បានជាង១ខែ ខ្សែបម្រើឆ្នើមកម្ពុជា ប្រាក់ មុន្នីឧត្តម បានត្រឡប់មកចូលរួមជាមួយក្លិបព្រះខ័នរាជស្វាយរៀងវិញ សម្រាប់ការប្រកួតជើងទី២ពានរង្វាក់បាល់ទាត់លីគកំពូលកម្ពុជា។ ខ្សែបម្រើវ័យ២៤ឆ្នាំរូបនេះអះអាងថា ការវិលត្រឡប់មកកាន់ទ្រនំចាស់ គឺដើម្បីជួយស្តារមុខមាត់ក្រុម ក្រោយទទួលលទ្ធផលមិនសូវល្អក្នុងជើងទី១។ ឧត្តម ហាក់បង្ហាញអារម្មណ៍សោកស្តាយដែលមិនបានលេងជាមួយកីឡាករយល់ចិត្ត បន្ទាប់ពីសមាជិកមួយចំនួនជាប់ពិន័យ។

បញ្ហាសមាជិកមួយចំនួនជាប់ពិន័យ និងការទទួលលទ្ធផលមិនសូវល្អក្នុងជើងទី១ ត្រូវបានខ្សែបម្រើ ប្រាក់ មុន្នីឧត្តម ចាត់ទុកជាហេតុផល ដែលជំរុញឲ្យរូបគេត្រឡប់មករួមរស់ជាមួយក្រុមព្រះខ័នរាជស្វាយរៀងសាជាថ្មី។ ទន្ទឹមនឹងប្តេជ្ញាប្រឹងប្រែងឲ្យអស់ពីសមត្ថភាព ឧត្តម រំពឹងថា វត្តមានរបស់ខ្លួននឹងជួយឲ្យព្រះខ័នរាជស្វាយរៀងទទួលបានលទ្ធផលល្អ នាការប្រកួតជើងទី២។

នាពិធីបង្ហាញកីឡាករថ្មីកាលពីព្រឹកថ្ងៃទី២៩ ខែមិថុនា ឆ្នាំ២០១៨ ខ្សែបម្រើវ័យ២៤ឆ្នាំរូបនេះបាននិយាយថា៖«ហេតុផលដែលជំរុញឲ្យខ្ញុំត្រឡប់មកកាន់ក្លិបព្រះខ័នរាជស្វាយរៀងវិញ ដោយសារខ្ញុំឃើញទម្រង់លេងមានការធ្លាក់ចុះជាហេតុធ្វើឲ្យក្លិបទទួលបានលទ្ធផលមិនសូវល្អក្នុងជើងទី១ ពិសេសកីឡាករយើងមួយចំនួនមានបញ្ហាដោយសារជាប់ពិន័យ»។

«ខ្ញុំមានអារម្មណ៍ថាសោកស្តាយ ដែលការវិលត្រឡប់របស់ខ្ញុំលើកនេះ មិនបានលេងជាមួយកីឡាករដែលធ្លាប់លេងត្រូវជើងគ្នា និងបាត់បង់កីឡាករដោយជាប់ពិន័យ និងរបួស។ តែខ្ញុំនិងមិត្តរួមក្រុមដទៃទៀតនឹងខិតខំប្រឹងប្រែងឲ្យអស់ពីសមត្ថភាព ដើម្បីជួយឲ្យក្រុមទទួលបានលទ្ធផលល្អនៅជើងទី២»។ នេះជាការបន្ថែមរបស់អតីតសមាជិកក្លិបម៉ាឡេស៊ី Negeri Sembilan។

កីឡាករ ប្រាក់ មុន្នីឧត្តម ដែលបរាជ័យក្នុងការប្រកួតនៅក្រៅប្រទេសលើកដំបូងបានចាត់ទុកការវិលត្រឡប់មកចូលរួមជាមួយស្វាយរៀងថា វត្តមានរបស់គេមិនត្រឹមតែជួយក្លិបនេះឲ្យទទួលបានលទ្ធផលល្អប៉ុណ្ណោះទេ តែវាជាឱកាសក្នុងការអភិវឌ្ឍសមត្ថភាពឲ្យប្រសើរ ដើម្បីទាញយកការទាក់ទាញពីក្លិបនៅក្រៅប្រទេសសាជាថ្មីទៀតផង។

ខ្សែបម្រើវ័យ២៤ឆ្នាំរូបនេះ ទទួលបានការបណ្តុះបណ្តាលពីក្លិបព្រះខ័នរាជស្វាយរៀង និងបានប្រឡូកក្នុងអាជីពជាមួយក្លិបដែលមានមូលដ្ឋាននៅស្វាយរៀងមួយនេះចាប់ពីឆ្នាំ២០១០មក។ កាលពីដើមរដូវកាលឆ្នាំ២០១៨ រូបគេបានចុះកិច្ចសន្យាលេងឲ្យក្លិបម៉ាឡេស៊ី Negeri Sembilan តែបានចែកផ្លូវគ្នាក្រោយរួមរស់បានប្រមាណ៣ខែ។

សម្រាប់ការរួមរស់ជាមួយព្រះខ័នរាជស្វាយរៀងកន្លងមក ឧត្តម ឈ្នះពានខេមបូឌានលីក១លើក និងពានរង្វាន់សម្តេច ហ៊ុន សែន ៤លើក។ សម្រាប់រង្វាន់ឯកត្តជនវិញ ឧត្តម ទទួលបានស្បែកជើងមាសក្នុងពានរង្វាន់សម្តេច ហ៊ុន សែន ឆ្នាំ២០១៥ និងជាប់ជាកីឡាករឆ្នើមប្រចាំឆ្នាំដែលជ្រើសរើសដោយ គណៈកម្មការប្រកួតបាល់ទាត់ជាតិកម្ពុជា (CNCC) នៅឆ្នាំ២០១៧។

ក្រៅពីខ្សែបម្រើខាងលើ ក្លិបព្រះខ័នរាជស្វាយរៀង ក៏បាននាំចូលកីឡាករបរទេសថ្មីចំនួនពីររូបទៀតផងដែរ រួមមានខ្សែប្រយុទ្ធប្រេស៊ីល Sergio Barboza និងកីឡាករអង់គ្លេស Harley Willard។ កីឡាករបរទេសទាំងពីររូបនេះបានចុះកិច្ចសន្យាមួយចប់រដូវកាលឆ្នាំ២០១៨ តែបើបង្ហាញទម្រង់លេងល្អ នឹងទទួលបានកុងត្រារហូតពាក់កណ្តាលរដូវកាលឆ្នាំ២០១៩។ ការបង្ហាញកីឡាករទាំងបីស្របពេលក្លិបនេះប្រកាសចែកផ្លូវជាមួយកីឡាករបរទេស៣រូប គឺ Trevin Ceaser, Shane Booysen និង Hyun Whoo និងការចាកចេញរបស់ ឡាយ រស្មី និងម៉ន កក្កដា ទៅកាន់ក្លិបអាស៊ីអឺរ៉ុបក្រោមលក្ខខណ្ឌខ្ចីជើង៕