មន្ត្រីបក្សប្រឆាំង ពឹងព្រះមហាក្សត្រឲ្យជួយ ដើម្បីបានចូលរួមបោះឆ្នោត

ជាតិ

បោះឆ្នោត

មន្ត្រីបក្សប្រឆាំង ពឹងព្រះមហាក្សត្រឲ្យជួយ ដើម្បីបានចូលរួមបោះឆ្នោត

06, Jul 2018 , 11:21 am

រូបភាព

ដោយ: ថ្មីៗ

ជាថ្មីម្តងទៀត អតីតបក្សប្រឆាំង បានស្នើឲ្យព្រះមហាក្សត្រ ជួយធ្វើអន្តរាគមន៍ទៅតុលាការកំពូល ដើម្បីសើរើឡើងវិញ រឿងរំលាយខ្លួនចោល។ ពួកគេ ចង់បានសិទ្ធិធ្វើនយោបាយដូចមុនដើម្បីបានចូលរួមក្នុងការបោះឆ្នោត។ ប៉ុន្តែ មន្ត្រីជាន់ខ្ពស់គណបក្សកាន់អំណាច អះអាងថា ព្រះមហាក្សត្រ គោរពសេចក្តីសម្រេចរបស់តុលាការកំពូល ដែលជាសេចក្តីសម្រេចបិទផ្លូវតវ៉ា។

មន្ត្រីជាន់ខ្ពស់នៃអតីតគណបក្សសង្គ្រោះជាតិចំនួន៧រូប ដែលកំពុងស្ថិតនៅក្រៅប្រទេស បានធ្វើលិខិតរួមគ្នាមួយ ដើម្បីថ្វាយមកព្រះករុណា ព្រះបាទសម្តេច ព្រះបរមនាថ នរោត្តម សីហមុនី មហាក្សត្រកម្ពុជា ក្នុងគោលបំណងសុំឲ្យព្រះអង្គ ជួយឲ្យបានធ្វើនយោបាយដូចមុន ហើយបានចូលរួមប្រកួតប្រជែងក្នុងការបោះឆ្នោត ដែលនឹងមកដល់នាពេលឆាប់ៗនេះ។

បើតាមលិខិតនោះ មន្ត្រីជាន់ខ្ពស់នៃគណបក្សសង្គ្រោះជាតិទាំង៧រូប ដោយមានលោកស្រី ជូឡុង សូមួរ៉ា ភរិយារបស់លោក សម រង្ស៊ី ជាអ្នកនាំមុខ ចង់ឲ្យព្រះមហាក្សត្រ ធ្វើអន្តរាគមន៍ទៅកាន់តុលាការកំពូល ដើម្បីជំនុំជម្រះឡើងវិញ ចំពោះការរំលាយគណបក្សសង្គ្រោះជាតិ និងការហាមឃាត់ថ្នាក់នាំ១១៨រូបនៃគណបក្សនេះ មិនឲ្យធ្វើនយោបាយរយៈពេល៥ឆ្នាំ។

ពួកគេ ទូលព្រះមហាក្សត្រក្នុងលិខិតនោះយ៉ាងដូច្នេះថា៖ «ការផ្តល់សិទ្ធិឲ្យទូលព្រះបង្គំយើងខ្ញុំទាំង១១៨ រូប ចូលរួមក្នុងសកម្មភាពនយោបាយ ដូចធម្មតាឡើងវិញ គឺជាជំហានមួយដ៏សំខាន់ និងចាំបាច់ ដើម្បីស្វែងរកដំណោះស្រាយនយោបាយជាបន្ទាន់ មុនការបោះឆ្នោត ថ្ងៃ ២៩ ខែកក្កដា ឆ្នាំ ២០១៨»។

លិខិត ដែលត្រូវបានបង្ហោះលើទំព័រហ្វេសប៊ុករបស់លោក សម រង្ស៊ី បង្ហាញថា មន្ត្រីទាំង៧រូបនោះ មានឈ្មោះ ជូឡុង សូមួរ៉ា, ជុំ ស៊ីរ៉ាត, ហ៊ីង សុក្ខុំម, ឡុង បុត្តា, ម៉ែន សុថាវរិន្ទ្រ, អ៊ុច សេរីយុទ្ធ និង អ៊ុង សុវណ្ណា។ យ៉ាងណាក៏ដោយ ដំណឹងដែលលិខិតរបស់ពួកគេ បានទៅដល់ព្រះហត្ថព្រះមហាក្សត្រ នៅមិនទាន់មាននោះទេ។

លោក សុខ ឥសាន អ្នកនាំពាក្យគណបក្សប្រជាជនកម្ពុជា យល់ថា ព្រះមហាក្សត្រ គោរព និងប្រតិបត្តិយ៉ាងម៉ឺងម៉ាត់តាមរដ្ឋធម្មនុញ្ញ ហើយព្រះអង្គ ក៏គោរពសិទ្ធិរបស់តុលាការកំពូល ក្នុងការរំលាយគណបក្សសង្គ្រោះជាតិ និងការហាមថ្នាក់ដឹកនាំនៃគណបក្សនេះ មិនឲ្យធ្វើនយោបាយដែរ។ លោក សង្កត់ធ្ងន់ថា សាលដីការបស់តុលាការកំពូល ជាសាលដីកាស្ថាពរ ហើយបិទផ្លូវតវ៉ា។

អ្នកនាំពាក្យគណបក្សកាន់អំណាចរូបនេះ ប្រាប់សារព័ត៌មានថ្មីៗតាមទូរសព្ទយ៉ាងដូច្នេះថា៖«ការកាត់ក្តីរបស់តុលាការកំពូល គឺចប់ទៅហើយ អត់មានការសើរើទេ គឺមានតែការអនុវត្តប៉ុណ្ណោះ »។

នេះជាលើកទី២ហើយ ដែលមន្ត្រីគណបក្សប្រឆាំង ស្នើសុំព្រះរាជអន្តរាគមន៍ពីព្រះមហាក្សត្រ។ លើកទី១ ដែលតំណាងគណបក្សប្រឆាំង មានដល់១៩រូប សុំព្រះរាជអន្តរាគមន៍ពីមហាក្សត្រ គឺធ្វើឡើងនៅអំឡុងខែមេសា ឆ្នាំ២០១៨។

លើសពីនេះ តំណាងគណបក្សប្រឆាំង ក៏ធ្លាប់ដាក់បណ្តឹងទៅកាន់តុលាការកំពូលចំនួន២លើកបន្ថែមទៀត ដើម្បីទាមទារឲ្យកែប្រែសេចក្តីសម្រេចជាថ្មី។ ប៉ុន្តែ ការតស៊ូរបស់ពួកគេ សុទ្ធតែបរាជ័យ។

មិនត្រឹមតែប៉ុណ្ណោះ សូម្បីលោក សម រង្ស៊ី អតីតប្រធានគណបក្សសង្គ្រោះជាតិទី១ ក៏បានថ្វាយលិខិតមកព្រះមហាក្សត្រដែរ កាលអំពីអំឡុងខែឧសភា ឆ្នាំ២០១៨ ដើម្បីឲ្យព្រះអង្គជួយបង្រួបបង្រួមអ្នកនយោបាយ ដែលលោក យល់ថា កំពុងទាស់ទែងគ្នា ក្នុងរឿងបោះឆ្នោត។ មកដល់ពេលនេះ សំណើសុំព្រះរាជអន្តរាគមន៍របស់លោក សម រង្ស៊ី មិនទាន់លេចដំណឹងចេញមកនោះទេ៕

អត្ថបទទាក់ទង

លោក សម រង្ស៊ី ថ្វាយសុំព្រះមហាក្សត្រ ផ្សះផ្សារជាតិ ដែលកំពុងប្រេះស្រាំព្រោះរឿងបោះឆ្នោត