អន្តរជាតិ
ប្រធានាធិបតីស៊ូដង់ខាងត្បូង ត្រៀមខ្លួនបង្កើតរដ្ឋាភិបាលថ្មីដោយមានអនុប្រធានាធិបប្រាំរូប ប្រធានាធិបតីស៊ូដង់ខាងត្បូង Salva Kiir (រូបភាព AFP)
× ប្រធានាធិបតីស៊ូដង់ខាងត្បូង លោក Salva Kiir នៅថ្ងៃទី១៩ ខែកក្កដា បានឲ្យដឹងថា លោកបានត្រៀមខ្លួនរួចជាស្រេចហើយសម្រាប់ការរៀបចំរដ្ឋាភិបាលចម្រុះមួយ ដែលមានការចូលរួមពីគ្រប់ភាគី។ លោក ថ្លែងថា លោកមិនស្ទាក់ស្ទើរឡើយ ប្រសិនបើការណ៍ធ្វើបែបនេះ អាចធ្វើឲ្យរដ្ឋក្មេងបំផុតរបស់ពិភពលោកមានសន្តិភាព នឹងបញ្ចប់សង្គ្រាមស៊ីវិលបានមែន។
គឺរយៈពេល៧ឆ្នាំមកហើយ ដែលស៊ូដង់ខាងត្បូង បានប្រកាសឯករាជ្យជាផ្លូវការ និងត្រូវបានទទួលស្គាល់ជារដ្ឋសមាជិកចុងក្រោយរបស់អង្គការសហប្រជាជាតិ។ ក៏ប៉ុន្តែប៉ុន្មានឆ្នាំមកនេះ រដ្ឋក្មេងខ្ចីបំផុតរបស់ពិភពលោកមួយនេះ នៅមិនទាន់អាចរកសុខសន្តិភាពជូនប្រជាជនខ្លួនបានឡើយ។
គិតចាប់ពីឆ្នាំ២០១៣មក ប្រទេសបានធ្លាក់ចូលក្នុងសង្គ្រាមស៊ីវិល ដោយសារតែភាពមិនត្រូវរូវគ្នារបស់អ្នកនយោបាយ ដែលមានម្ខាងជាប្រធានាធិបតីស៊ូដង់ខាងត្បូង លោក Salva Kiir និងម្ខាងទៀតជាអតីតអនុប្រធានាធិបតីរបស់លោក។ ភាគីទាំងពីរ ដែលសុទ្ធតែមានអ្នកគាំទ្រដូចគ្នា បានប៉ះទង្គិចគ្នាទាំងផ្នែកប្រដាប់អាវុធ ដែលបានសម្លាប់ប្រជាជនស៊ីវិលរាប់ពាន់នាក់មកហើយ។
ភាគីទាំងពីរ ក៏បានមានការចរចាបទឈប់បាញ់ជាហូរហែរ ក៏ប៉ុន្តែត្រូវបរាជ័យជាបន្តបន្ទាប់ដូចគ្នា។ បើការចុះផ្សាយតាមប្រភពព័ត៌មាន Africa News នៅថ្ងៃ១៩ កក្កដា បច្ចុបន្នភាគីពាក់ព័ន្ធរបស់ស៊ូដង់ខាងត្បូង កំពុងតែចរចាលើកិច្ចព្រមព្រៀងសន្តិភាពមួយ ដែលផ្នែកមួយនៃកិច្ចព្រមព្រៀង ក៏បានបញ្ជាក់ពីការបង្កើតរដ្ឋាភិបាលថ្មីមួយ ដោយមានអនុប្រធានាធិបតីពីគ្រប់ភាគីចំនួនប្រាំរូបផងដែរ។
តាមប្រភពព័ត៌មានដដែលនោះ លោកប្រធានាធិបតី Salva Kiir ក៏បានបញ្ជាក់ផងដែរថា លោក មិនបដិសេធឡើយ បើនេះ ជាដំណោះស្រាយសន្តិភាពពិតប្រាកដ។ លោក សង្កត់ធ្ងន់យ៉ាងដូច្នេះថា៖«ប្រជាជនស៊ូដង់ខាងត្បូង កំពុងតែទន្ទឹងរង់ចាំសន្តិភាព ហើយប្រសិនការរៀបចំ (កិច្ចព្រមព្រៀងបែងចែកអំណាច) អាចនាំសន្តិភាពសម្រាប់ប្រជាជនមែននោះ ខ្ញុំ នឹងអនុវត្ត»។
លោកប្រធានាធិបតី បន្ថែមថា៖« ប្រជាជនបានជជែកពីការចូលរួមគ្នា ហើយ មិនត្រូវឲ្យនរណាម្នាក់ (ភាគីពាក់ព័ន្ធក្នុងនយោបាយ) ស្ថិតនៅក្រៅរដ្ឋាភិបាលនោះទេ។ ខ្ញុំ យល់ព្រមទទួល។» នេះបើយោងតាមប្រភពព័ត៌មាន។
គួររម្លឹកបន្តិចផងដែរថា ថ្មីៗនេះ ក្រុមប្រឹក្សាសន្តិសុខអង្គការសហប្រជាជាតិ ក៏ទើបតែដាក់ទណ្ឌកម្មហ៊ុមព័ទ្ធការជួយដូរអាវុធទៅកាន់ស៊ូដង់ខាងត្បូងផងដែរ។ ការដាក់ទណ្ឌកម្មនេះ ស្របជាមួយនឹងរបាយការណ៍របស់បេសកកម្មអង្គការសហប្រជាជាតិប្រចាំស៊ូដង់ខាងត្បូង បានរកឃើញពីការរំលោភសិទ្ធិមនុស្សធ្ងន់ធ្ងរ ដែលរួមមានការសម្លាប់ជនស៊ីវិល ដោយភាគីមានឥទ្ធិពលក្នុងប្រទេសទាំងសងខាង៕
Tag:
ស៊ូដង់ខាងត្បូង
អាហ្វ្រិក
© រក្សាសិទ្ធិដោយ thmeythmey.com