រយៈពេល៣ខែ មូលនិធិគន្ធបុប្ផាកម្ពុជាទទួលជំនួយ ជិត៦លានដុល្លារ

ជាតិ

រយៈពេល៣ខែ មូលនិធិគន្ធបុប្ផាកម្ពុជាទទួលជំនួយ ជិត៦លានដុល្លារ

22, Jul 2018 , 10:59 am

រូបភាព

ដោយ: អ៊ូ សុខមាន (OU Sokmean)

ចាប់ពីថ្ងៃទី១១ ខែមេសា ដល់ថ្ងៃទី១១ ខែកក្កដា ឆ្នាំ២០១៨ មូលនិធិគន្ធបុប្ផាកម្ពុជាទទួលបានថវិកាបរិច្ចាគសរុបជិត៦លានដុល្លារ ក្នុងនោះប្រាក់រៀលមាន៣.៥៣៧.៦៤៦.១៥០ និងប្រាក់ដុល្លារមាន៤.៩១៥.០៩៥។ នេះបើយោងតាមសេចក្តីប្រកាសព័ត៌មានរបស់ក្រសួងសេដ្ឋកិច្ច និងហិរញ្ញវត្ថុ នៅថ្ងៃទី១៨ ខែកក្កដា។

មូលនិធិគន្ធបុប្ផាកម្ពុជា បានបែងចែកសប្បុរសជន ជាបីប្រភេទ រួមមានប្រភេទទី១. ជាសមាជិកស្ថាបនិក ប្រភេទទី២. ជាសមាជិកកិត្តិយស និងប្រភេទទី៣. ជាសមាជិកគាំទ្រ។

ការចូលរួមបរិច្ចាគនេះ ជាកាយវិការមួយបង្ហាញឲ្យឃើញថា សប្បុរសជនក្នុង និងក្រៅប្រទេស បានចូលរួមយ៉ាងសកម្មក្នុងការគាំទ្រគោលនយោបាយទ្រទ្រង់ និងធានាចីរភាពនៃកិច្ចប្រតិបត្តិការរបស់មន្ទីរពេទ្យគន្ធបុប្ជា ដែលបានផ្ដួចផ្ដើមឡើងដោយប្រមុខរដ្ឋាភិបាលកម្ពុជាតាមរយៈការបង្កើត មូលនិធិគន្ធបុប្ផាកម្ពុជា បន្ថែមពីលើមូលនិធិគន្ធបុប្ផាស្វីសដែលមានស្រាប់។

គិតត្រឹមថ្ងៃទី១១ ខែកក្កដា ឆ្នាំ២០១៨ មូលនិធិគន្ធបុប្ផាកម្ពុជាទទួលជំនួយពីសមាជិករបស់ខ្លួន រួមមាន សម្ដេច ហ៊ុន សែន និងលោកជំទាវ បានឧបត្ថម្ភថវិកា ៥ម៉ឺនដុល្លារ សម្រាប់ប្រាំឆ្នាំជាប់គ្នា។ កាកបាទក្រហមកម្ពុជា ឧបត្ថម្ភថវិកា ១លានដុល្លាររាល់ឆ្នាំ។

សមាជិកស្ថាបនិក១៣០រូប ឧបត្ថម្ភថវិកា ជាង៣,៥លានដុល្លារ។ សមាជិកកិត្តិយស ១០៧រូប ឧបត្ថម្ភថវិកាជាង៦០ម៉ឺនដុល្លារ។ សមាជិកគាំទ្រចំនួន ៤៦.៣៩៧រូប ឧបត្ថម្ភថវិកាសរុប ជិត៦០ម៉ឺនដុល្លារ និងសប្បុរសជនផ្សេងៗ៨៩០រូប ឧបត្ថម្ភថវិកា២.៦៧៨ដុល្លារ៕