ជាតិ
នយោបាយជាតិ
សមជិកសភា ស្បថចូលកាន់តំណែងនៅថ្ងៃទី១៩ រីឯសមាជិកគណៈរដ្ឋមន្ត្រី ថ្ងៃទី២០ កញ្ញា
× ភ្នំពេញ៖ បើគ្មានអ្វីប្រែប្រួលទេ ក្រុមអ្នកតំណាងរាស្ត្រ ដែលមកពីគណបក្សជាប់ឆ្នោតទាំងអស់ នឹងត្រូវចូលរួមកិច្ចប្រជុំដំបូង ក្រោមព្រះរាជអធិបតីភាពព្រះមហាក្សត្រ នៅថ្ងៃទី១៩ កញ្ញា។ សមាជិកទាំងនោះ នឹងត្រូវស្បថចូលកាន់តំណែង នៅល្ងាចថ្ងៃដដែល។ នេះបើតាមការប្រកាសរបស់សម្ដេចនាយករដ្ឋមន្ត្រី ហ៊ុន សែន កាលពីពេលថ្មីៗនេះ។
សម្ដេច ហ៊ុន សែន បានបញ្ជាក់ថា បន្ទាប់ពីសមាជិករដ្ឋសភាចូលកាន់តំណែងនោះ គណរដ្ឋមន្ត្រីអាណត្តិថ្មី ក៏ត្រូវបង្កើតឡើង នៅថ្ងៃទី២០ កញ្ញា ដោយសមាជិកទាំងអស់ នឹងត្រូវស្បថចូលកាន់តំណែងផងដែរ ។ បើតាមសម្ដេច ហ៊ុន សែន កិច្ចប្រជុំគណៈរដ្ឋមន្ត្រីដំបូង នឹងរៀបចំនៅថ្ងៃទី២១ កញ្ញា។ ការរៀបចំការដឹកនាំអាណត្តិនេះ ធ្វើឡើងក្រោយពីគណៈកម្មាធិការជាតិរៀបចំការបោះឆ្នោតប្រកាសលទ្ធផលបោះឆ្នោតជាផ្លូវការ។
អ្នកនាំពាក្យ គ.ជ.ប លោក ហង្ស ពុទ្ធា បាននិយាយថា ការប្រកាសលទ្ធផលផ្លូវការអំពីគណបក្សដែលទទួលបានអាសនៈក្នុងរដ្ឋសភា អាចធ្វើឡើង២ដំណាក់កាល។ គ.ជ.ប នឹងប្រកាសលទ្ធផលបណ្ដោះអាសន្ននៅថ្ងៃទី១១ ខែសីហា ដើម្បីទទួលពាក្យបណ្ដឹងផ្សេងៗពីគ្រប់គណបក្សទាំងអស់ រហូតដល់ថ្ងៃទី១៥ ខែសីហា។ «ប្រសិនជាមិនមានពាក្យបណ្ដឹងនោះទេ ការប្រកាសលទ្ធផលផ្លូវការនឹងធ្វើឡើងនៅថ្ងៃទី១៥ ខែសីហាតែម្ដង។ ប៉ុន្តែបើមានពាក្យបណ្ដឹងមក គ.ជ.ប ដើម្បីដោះស្រាយនោះ ការប្រកាសលទ្ធផលផ្លូវការនឹងធ្វើឡើងនៅថ្ងៃទី១០ ខែកញ្ញាវិញ»។ នេះជាការបញ្ជាក់របស់អ្នកនាំពាក្យគ.ជ.ប៕
Tag:
នយោបាយ
រដ្ឋសភា
បោះឆ្នោត
គ.ជ.ប
© រក្សាសិទ្ធិដោយ thmeythmey.com