បុត្រច្បងរបស់សម្តេចក្រុមព្រះ ក្លាយជាប្រធានស្តីទីនៃគណបក្សហ្វ៊ុនស៊ិនប៉ិច

ជាតិ

នយោបាយជាតិ

បុត្រច្បងរបស់សម្តេចក្រុមព្រះ ក្លាយជាប្រធានស្តីទីនៃគណបក្សហ្វ៊ុនស៊ិនប៉ិច

11, Aug 2018 , 3:50 pm

រូបភាព

ដោយ: លាង ដឺលុច (Leang Delux)

សម្តេចក្រុមព្រះ នរោត្តម រណឬទ្ធិ បានសម្រេចព្រះទ័យតែងតាំងបុត្រាច្បង នរោត្តម ចក្រាវុឌ្ឍ ឲ្យគង់ជាប្រធានស្តីទីនៃគណបក្សហ្វ៊ុនស៊ិនប៉ិច។ អ្នកនាំពាក្យគណបក្សហ្វ៊ុនស៊ិនប៉ិច លោក ញ៉េប ប៊ុនជិន បានបញ្ជាក់ថា នេះជាព័ត៌មានពិត ប៉ុន្តែថាលោកមិនទាន់ទទួលបានព័ត៌មានលម្អិតទាក់ទងនឹងមូលហេតុនៃសេចក្តីសម្រេចនេះនៅឡើយទេ។

បុត្រាច្បង នរោត្តម ចក្រាវុឌ្ឍ របស់សម្តេចក្រុមព្រះនរោត្តម រណឬទ្ធិ ជាមួយម្ចាស់ក្សត្រី ម៉ារី ដែលពលរដ្ឋខ្មែរពុំសូវស្គាល់ ត្រូវបានតែងតាំងជាប្រធានស្តីទីគណបក្សហ្វ៊ុនស៊ិនប៉ិច។ ការតែងតាំងនេះ ត្រូវបានធ្វើឡើងតាមរយៈសេចក្តីសម្រេចមួយរបស់សម្តេចក្រុមព្រះកាលពីថ្ងៃទី៨ខែសីហា ហើយដែលត្រូវបានផ្សព្វផ្សាយកាលល្ងាចថ្ងៃទី១០សីហានេះ។

ការតែងតាំងនេះបានកើតឡើងនៅពេលដែលសម្តេចក្រុមព្រះត្រូវបានគេដឹងថា ព្រះអង្គកំពុងសម្រាកព្យាបាលនៅក្រៅប្រទេស ក្រោយពីព្រះអង្គជួបគ្រោះថ្នាក់ចរាចរណ៍កាលពីពាក់កណ្តាលខែមិថុនាកន្លងទៅ។ គ្រោះថ្នាក់ចរាចរណ៍នោះបានធ្វើឲ្យអ្នកម្នាង អ៊ុក ផល្លា ទទួលមរណភាព។ តាំងពីពេលនោះមក សម្តេចក្រុមព្រះត្រូវបានបញ្ជូនទៅព្យាបាលនៅប្រទេសថៃ ហើយព្រះអង្គក៏មិនមានព្រះវត្តមាននៅក្នុងថ្ងៃបោះឆ្នោតនៅកម្ពុជាឡើយ។

អ្នកនាំពាក្យគណបក្សហ្វ៊ុនស៊ិនប៉ិច លោក ញ៉េប ប៊ុនជិន បានបញ្ជាក់ប្រាប់សារព័ត៌មានថ្មីៗនៅថ្ងៃទី១១ខែសីហានេះថា លោកមិនទាន់ដឹងអំពីមូលហេតុនៅពីក្រោយការសម្រេចព្រះទ័យរបស់ព្រះប្រធានរបស់លោកនៅឡើយទេ ប៉ុន្តែលោកអះអាងថា ថ្នាក់ដឹកនាំគណបក្សគោរពតាមសេចក្តីសម្រេចចិត្តរបស់សម្តេចក្រុមព្រះ។ លោក ញ៉េប ប៊ុនជិន បានថ្លែងយ៉ាងដូច្នេះថា៖«នេះជាព្រះរាជតម្រិះរបស់ព្រះអង្គ។ ប្រហែលព្រះអង្គត្រូវការពេលវេលាបន្ថែមដើម្បីព្យាបាលព្រះរោគ។ យើងនៅរង់ចាំការកោះប្រជុំពីព្រះប្រធានស្តីទីទាក់ទងនឹងផែនការការងារថ្ងៃមុខ»។

មិនមានការតែងតាំងតែមួយនោះទេ។ បើគេឃើញសេចក្តីសម្រេចនោះ សម្តេចក្រុមព្រះក៏បានតែងតាំងលោក ពេជ្រ សុជេថ្ថា ជាអគ្គលេខាធិការប្រតិបត្តិនៃគណបក្សហ្វ៊ុនស៊ិនប៉ិចផងដែរ។ ក្នុងនាមជាព្រះប្រធាន សម្តេចក្រុមព្រះបានបង្គាប់ឲ្យប្រធានស្តីទី និងអគ្គលេខាធិការប្រតិបត្តិ ចាត់ចែង និងសម្រេចរាល់ការងារ រួមទាំងផ្លាស់ប្តូរ តែងតាំងសមាសភាពនៅក្នុងគណបក្សផង ឲ្យមានប្រសិទ្ធភាព។ នេះបើយោងតាមសេចក្តីសម្រេចរបស់ព្រះអង្គម្ចាស់ នរោត្តម រណឬទ្ធិ។

គណបក្សហ្វ៊ុនស៊ិនប៉ិច ដែលជាកេរដំណែលនយោបាយមួយរបស់ព្រះបរមរតនកោដ្ឋ ដែលធ្លាប់ឈ្នះនៅក្នុងការបោះឆ្នោតនីតិកាលទីមួយក្នុងឆ្នាំ១៩៩៣ បានថមថយប្រជាប្រិយភាព និងការគាំទ្រពីការបោះឆ្នោតមួយទៅការបោះឆ្នោតមួយ ហើយក៏បានឆ្លងកាត់ការបែកបាក់ផ្ទៃក្នុងយ៉ាងដំណំផងដែរ។

ទោះយ៉ាងនេះក៏ដោយ នៅក្នុងការបោះឆ្នោតនីតិកាលទី៦នេះ ទោះបីទទួលបានសំឡេងទាបដាច់ឆ្ងាយពីគណបក្សប្រជាជនកម្ពុជារបស់សម្តេច ហ៊ុន សែន ដែលជាអតីតដៃគូក្នុងរដ្ឋាភិបាលចម្រុះនោះ ក៏ហ្វ៊ុនស៊ិនប៉ិច ជាគណបក្សដែលទទួលបានការគាំទ្រលំដាប់ថ្នាក់ទី២ជាមួយនឹងសំឡេងគាំទ្រ ៣៧៤៥១០ សំឡេង។

នៅពេលនេះ ក្រោមការដឹកនាំរបស់ប្រធានស្តីទី នរោត្តម ចក្រាវុឌ្ឍ ដែលជាបុត្រាច្បងរបស់ព្រះអង្គម្ចាស់ នរោត្តម រណឬទ្ធិ តើហ្វ៊ុនស៊ិនប៉ិច នឹងមានអ្វីថ្មី?