ចាប់ឆ្នោតវគ្គ១/២ពានសម្តេច ហ៊ុន សែន៖ ណាហ្គា ប៉ះទ័ព ថាយហ្គឺរជួបប៉ូលិស

កីឡាជាតិ

ជាតិ

ចាប់ឆ្នោតវគ្គ១/២ពានសម្តេច ហ៊ុន សែន៖ ណាហ្គា ប៉ះទ័ព ថាយហ្គឺរជួបប៉ូលិស

13, Aug 2018 , 2:42 pm

រូបភាព

ដោយ:

ការប្រកួតបាល់ទាត់ដណ្តើមពានរង្វាន់សម្តេច ហ៊ុន សែន បានចាប់គូវគ្គពាក់កណ្តាលផ្តាច់ព្រ័ត្ររួចរាល់ហើយ នៅព្រឹកថ្ងៃទី១៣ ខែសីហានេះ។ តាមយរយៈការចាប់ឆ្នោតរបស់គណៈកម្មការប្រកួតបាល់ទាត់ជាតិកម្ពុជា(CNCC) ដែលមានលោក ឆាំង ពិសិដ្ឋ លេខាប្រតិបត្តិ ជាតំណាំង និងមានតំណាងក្លិបចូលរួមផងនោះ ក្រុមណាហ្គាវើលត្រូវប្រជែងជាមួយក្រសួងការពារជាតិ និងអង្គរថាយហ្គឺរប៉ះអគ្គស្នងការនគរបាលជាតិ។

មុនឡើងមកជួបគ្នានៅវគ្គនេះ ក្រុមទាំង៤សុទ្ធតែបានទម្លាក់គូប្រកួតរៀងៗខ្លួនក្នុងវគ្គ១/៤។ ក្នុងនោះណាហ្គាវើលទម្លាក់បឹងកេតដោយបាល់កាត់សេចក្តី ៣-២ ក្រោយក្រុមទាំងពីររក្សាលទ្ធផលទាំងពីរជើងស្មើ ៣-៣ ខណៈក្រសួងការពារជាតិ ទម្លាក់ក្រុមការពារតំណែងជើងឯកព្រះខ័នរាជស្វាយរៀង ដោយបាល់កាត់សេចក្តី ៥-៤ បន្ទាប់ពីពួកគេរក្សាលទ្ធផលទាំងពីរជើង ៣-៣។

ចំណែកក្រុមអង្គរថាយហ្គឺរបានទម្លាក់ភ្នំពេញក្រោនដោយបាល់កាត់សេចក្តី ៤-៣ ក្រោយក្រុមទាំងពីររក្សាលទ្ធផលស្មើ ៤-៤។ នាការប្រកួតជើងទី១ភ្នំពេញក្រោនយកឈ្នះអង្គរថាយហ្គឺរក្នុងលទ្ធផល ៣-០ មុនអង្គរថាយហ្គឺរយកឈ្នះភ្នំពេញក្រោនក្នុងជើងទីពីរ ៤-១ នៅកីឡដ្ឋាន RSN។ រីឯអគ្គស្នងការនគរបាលជាតិ ទម្លាក់ក្រុមយុវជនសាលាបាល់ទាត់ជាតិបាទីអាយុក្រោម១៨ឆ្នាំ ក្នុងលទ្ធផលសរុបទាំងពីរជើង ៩-១។ ក្នុងជើងទី១ប៉ូលិសយកឈ្នះយុវជនសាលាបាលទាត់ជាតិបាទី ៣-០ មុនយកឈ្នះ ៦-១ ក្នុងជើងទី២។

លោក ទេព ឡុងរចនា អ្នកចាត់ការទូទៅក្លិបក្រសួងការពារជាតិ

សម្រាប់ការប្រកួតវគ្គពាក់កណ្តាលផ្តាច់ព្រ័ត្រធ្វើឡើងតែ១ជើងប៉ុណ្ណោះ។ ក្រុមណាឈ្នះនឹងឡើងទៅប្រជែងដណ្តើមជើងឯក រីឯក្រុមចាញ់ប្រជែងដណ្តើមចំណាត់ថ្នាក់លេខ៣។ ណាហ្គាវើលត្រូវប្រជែងជាមួយក្រសួងការពារជាតិនៅថ្ងៃទី១ ខែកញ្ញា រីឯជំនួបរវាងអង្គរថាយហ្គឺរជាមួយអគ្គស្នងការនគរបាលជាតិនៅថ្ងៃទី២ ខែកញ្ញា ឆ្នាំ២០១៨។ ការប្រកួតទាំងពីរនេះ រៀបចំនៅពហុកីឡដ្ឋានជាតិដូចគ្នា។ ដោយឡែក ការប្រកួតដណ្តើមជើងឯក និងចំណាត់ថ្នាក់លេខ៣ នឹងធ្វើរួមគ្នានៅថ្ងៃទី៦ ខែតុលា ឆ្នាំ២០១៨ នៅពហុកីឡដ្ឋានជាតិ៕