អន្តរជាតិ
ជំនួបកំពូលមេដឹកនាំកូរ៉េលើកទី៤ នឹងធ្វើនៅព្យុងយ៉ាងក្នុងខែកញ្ញា មេដឹកនាំកូរ៉េខាងជើង គីម ជុងអ៊ុន និងប្រធានាធិបតីកូរ៉េខាងត្បូង មូន ចេអ៊ីន នាជំនួបមេដឹកនាំកូរ៉េលើកទីបី (រូបភាព AFP)
× មន្ត្រីជាន់ខ្ពស់កូរ៉េខាងត្បូង និងខាងជើង នៅថ្ងៃទី១៣ ខែសីហា បានព្រមព្រៀងគ្នាដើម្បីរៀបចំជំនួបកំពូលមេដឹកនាំអន្តរកូរ៉េនៅអំឡុងខែកញ្ញាខាងមុខនៅទឹកដីកូរ៉េខាងជើង។ ជំនួបរវាងប្រធានាធិបតីកូរ៉េខាងត្បូង មូន ចេអ៊ីន និងមេដឹកនាំកំពូលកូរ៉េខាងជើង គីម ជុងអ៊ុន នៅរដ្ឋធានីព្យុងយ៉ាង នឹងក្លាយជាជំនួបតទល់លើកទីបួនរវាងមេដឹកនាំកូរ៉េទាំងពីរ។ វាក៏ជាការជួបតទល់លើកទីបីរវាងលោក មូន និងលោក គីម ដែរ។
ប្រធានាធិបតីកូរ៉េខាងត្បូង មូន ចេអ៊ីន នឹងធ្វើដំណើរទៅកាន់រដ្ឋធានីព្យុងយ៉ាងនៅខែកញ្ញាដើម្បីជួបជាមួយមេដឹកនាំកំពូលកូរ៉េខាងជើង គីម ជុងអ៊ុន នាជំនួបកំពូលអន្តរកូរ៉េលើកទី៤ ។ កូរ៉េទាំងពីរបានឯកភាពគ្នាដើម្បីរៀបចំមេដឹកនាំនាជំនួបថ្នាក់មន្ត្រីជាន់ខ្ពស់នៅថ្ងៃទី១៣ ខែសីហា នៅប៉ែកខាងជើងភូមិប៉ាន់មុនជុម ដែលជាខ្សែបន្ទាត់ខណ្ឌចែកកូរ៉េទាំងពីរជាង៦០ឆ្នាំមកនេះ។ តាមពិតថ្ងៃជំនួបបានកំណត់រួចហើយ តែភាគីទាំងពីរមិនទាន់បញ្ចេញ។ នេះបើតាមទីភ្នាក់ងារព័ត៌មាន Yonhap ។
បើកើតឡើងតាមការព្រមព្រៀងមែននោះ ជំនួបលោក មូន និងលោក គីម គឺជាកិច្ចប្រជុំកំពូលលើកទី៤ រវាងមេដឹកនាំកូរ៉េទាំងពីរខាង ដែលចែកដាច់ជាពីរផ្លូវក្រោយចប់សង្គ្រាមកូរ៉េនៅឆ្នាំ១៩៥៣ ។ ប៉ុន្តែវាជាជំនួបតទល់លើកទី៣ រវាងលោក មូន និងលោក គីម ផ្ទាល់។ ជំនួបលើកទី១ ធ្វើឡើងកាលពីខែមេសា ដែលពេលនោះ លោក គីម ក្លាយជាមេដឹកនាំកូរ៉េខាងជើងទីមួយជាន់ទឹកដីកូរ៉េខាងត្បូងបន្ទាប់ពីចប់សង្គ្រាម និងលើកទីពីរនៅខែឧសភា នៅភូមិប៉ាន់មុនជុមខាងទឹកដីកូរ៉េខាងជើង។
លោក មូន ដែលគេមើលឃើញថា មាននយោបាយទន់ភ្លន់ដាក់កូរ៉េខាងជើង ក៏នឹងក្លាយជាមេដឹកនាំកូរ៉េខាងត្បូងទីបី ដែលមានជំនួបជាមួយមេដឹកនាំកូរ៉េខាងជើងនៅទីក្រុងព្យុងយ៉ាង។ អតីតប្រធានាធិបតី គីម ដេជុង ជាមេដឹកនាំកូរ៉េខាងត្បូងដំបូងគេជួបថ្នាក់កំពូលកូរ៉េខាងជើង គីម ជុងអ៊ីល នៅឆ្នាំ២០០០ ហើយដល់ឆ្នាំ២០០៧ អតីតប្រធានាធិបតីកូរ៉េខាងត្បូង រ៉ូ មូយុន ក៏ទៅជួបលោក គីម ជុងអ៊ីល ដល់ទីក្រុងព្យុងយ៉ាងដែរ។
ទំនាក់ទំនងរវាងកូរ៉េខាងត្បូង និងកូរ៉េខាងជើងក្រោយការក្លាយជាប្រធានាធិបតីរបស់លោក មូន មានភាពល្អប្រសើរច្រើន ហើយក៏ធ្វើឲ្យស្ថានភាពឧបទ្វីបកូរ៉េដែលធ្លាប់តានតឹងខ្លាំងនោះ បានធូរស្រាលខ្លះដែរ។ ដោយសារការរីកចម្រើនបែបនេះ វាក៏នាំការកាន់ខិតជិតគ្នារវាងអាមេរិក និងកូរ៉ខាងជើងដើម្បីដោះស្រាយបញ្ហានុយក្លេអ៊ែរផង។ ក្រោមការសម្របសម្រួលរបស់កូរ៉េខាងត្បូង លោក គីម ក៏បានជួបលោក ដូណាល់ ត្រាំ ក្នុងខែមិថុនានៅសិង្ហបុរីផង។
ជុំវិញជំនួបមន្ត្រីនេះដែរ ភាគីទាំងសងខាងក៏ជជែកពីការវិវត្តនានាក្នុងទំនាក់ទំនងទ្វេភាគីផង។ ក្នុងសេចក្ដីថ្លែងការណ៍ក្រោយកិច្ចប្រជុំ កូរ៉េទាំងពីរបានត្រួតពិនិត្យការអនុវត្តសេចក្ដីថ្លែងការណ៍ប៉ាន់មុនជុមខែមេសា និងបានផ្លាស់ប្ដូរគំនិតគ្នាដោយស្មោះត្រង់ដើម្បីអនុវត្តឲ្យបានសកម្មនូវអ្វីដែលមេដឹកនាំបានព្រមព្រៀងគ្នារួចហើយ៕
Tag:
កូរ៉េខាងជើង
កូរ៉េខាងត្បូង
មូន ចេអ៊ីន
គីម ជុងអ៊ុន
© រក្សាសិទ្ធិដោយ thmeythmey.com