អន្តរជាតិ
អាមេរិកប្តេជ្ញាជួយពង្រឹងសមត្ថភាពសម្ព័ន្ធមិត្តក្នុងតំបន់ដើម្បីតតាំងជាមួយចិនក្នុងជម្លោះសមុទ្រចិនខាងត្បូង
× រដ្ឋបាលអាមេរិកនឹងបន្តប្រើប្រាស់សិទ្ធិហោះហើរ, ធ្វើនាវាចរណ៍តាមការកំណត់ក្នុងច្បាប់អន្តរជាតិ និង ធានាទប់ស្កាត់មិនឲ្យចិនកែប្រែច្បាប់ទម្លាប់តាមអំពើចិត្តខ្លួនឡើយ។ នេះជាសម្តីរបស់មន្ត្រីជាន់ខ្ពស់ក្រសួងការពារជាតិអាមេរិកពីក្រុងម៉ានីលថ្ងៃ ១៦ ខែសីហាក្នុងជំនួបជាមួយអ្នកសារព័ត៌មាន។
ឧបការីរដ្ឋមន្ត្រីការពារជាតិអាមេរិកទទួលបន្ទុកកិច្ចការសន្តិសុខអាស៊ីបូព៌ា និងប៉ាស៊ីហ្វិកលោក Randall Schriver អះអាង អាមេរិកមិនចុះញ៉ម ហើយបណ្តោយឲ្យចិនកែប្រែច្បាប់អន្តជាតិដែលគ្រប់គ្រងតំបន់ជម្លោះសមុទ្រចិនខាងត្បូងតាមចិត្តខ្លួនឡើយ។
«យើងមិនអនុញ្ញាតឲ្យចិនសរសេរបទបញ្ញត្តិថ្មី ឬប្តូរច្បាប់អន្តរជាតិឡើយ។ យើងនឹងបន្តហោះហើរ ធ្វើចរាចរ និងបំពេញប្រតិបត្តិការគ្រប់ទីកន្លែងដែលតាមច្បាប់អន្តរជាតិអនុញ្ញាតឲ្យ។ គោលការណ៍របស់យើងគឺ ប្រសិនជាយើងបំពេញប្រតិបត្តិការតាមច្បាប់ចែងហើយ យើងនឹងបន្តធ្វើវាតាមច្បាប់ទៀត»។ សារព័ត៌មាន Rappler ស្រង់សម្តីលោក Schriver ដូច្នេះ។
មន្ត្រីជាន់ខ្ពស់ក្រសួងការពារជាតិអាមេរិកថ្លែងបែបនេះគឺដើម្បីឆ្លើយតបសំណួរជុំវិញករណីដែលកងទ័ពចិនបានទាមទារឲ្យយន្តហោះកងទ័ពជើងទឹកអាមេរិកដែលធ្វើប្រតិបត្តិការនៅសមុទ្រចិនខាងត្បូងចាកចេញនោះ។ លោក Schriver ទទួលស្គាល់ថា វាមិនមែនជាលើកទីមួយ ហើយក៏មិនមែនជារឿងចម្លែកដែលចិនបន្តរារាំងអាមេរិក និងសម្ព័ន្ធមិត្តដែលឆ្លងកាត់តាមសមុទ្រចិនខាងត្បូងដែរ។
លោក Schriver សង្កត់ធ្ងន់ថា ប្រទេសទាំងអស់ចាំបាច់រក្សាជំហររបស់ខ្លួនឲ្យស្របគ្នាដើម្បីតតាំងជាមួយចិន ហើយចិនក៏ត្រូវយល់ដែរថា ទង្វើរបស់ចិនក៏មិនអាចធ្វើឲ្យអាមេរិកនិងភាគីឯទៀតខ្លាចរអាដែរ។
ពេលសាកសួរដល់វិធានការដែលអាមេរិកអាចដាក់ចេញដើម្បីតតាំងជាមួយចិន មន្ត្រីជាន់ខ្ពស់រូបនេះបង្ហើបថា អាមេរិកនឹងបន្តសកម្មភាពល្បាតសមុទ្រជាទម្លាប់មានស្រាប់ ហើយអ្វីដែលសំខាន់អាមេរិកកំពុងស្វែងរកលទ្ធភាពជួយពង្រឹងសមត្ថភាពប្រទេសសម្ព័ន្ធមិត្តក្នុងតំបន់។ អ្នកជំនាញរូបនេះមើលឃើញថា ប្រទេសក្នុងតំបន់ភាគច្រើនខ្វះខាតប្រព័ន្ធរ៉ាដា និងយន្តហោះសម្រាប់ប្រើប្រាស់ក្នុងគោលដៅការពារសន្តិសុខសមុទ្រ។
តាមពិតទៅ ការប្តេជ្ញាចិត្តជាថ្មីថានឹងតតាំងជាមួយក្រុងប៉េកាំងពីសំណាក់ក្រុងវ៉ាស៊ីនតោន កើតឡើងស្របពេលដែលក្រសួងការបរទេសចិនចេញសេចក្តីថ្លែងការណ៍ទាត់ចោលសម្តីរបស់លោក រ៉ូឌ្រីហ្គោ ឌូទើតេ ដែលបាននិយាយថា ចិនគ្មានសិទ្ធិកាន់កាប់ និង បង្ខំនាវានិងយន្តហោះប្រទេសដទៃឲ្យចាកចេញពីសមុទ្រចិនខាងត្បូង។ ចិនបានបញ្ជាក់ថា កោះស្ព្រាត់លីជាកម្មសិទ្ធិខ្លួនតាមប្រវត្តិសាស្ត្រ ហើយខ្លួនបន្តគោរពសិទ្ធិរបស់ប្រទេសទាំងអស់ក្នុងការហោះហើរ និងធ្វើដំណើរឆ្លងកាត់សមុទ្រចិនខាងត្បូងដែរ។ ប៉ុន្តែខ្លួនក៏មានសិទ្ធិចាត់វិធានការតបរាល់ភាគីដែលចង់បង្ករឿងដូចគ្នា៕
Tag:
អាមេរិក
សមុទ្រចិនខាងត្បូង
ចិន
ហ្វីលីពីន
© រក្សាសិទ្ធិដោយ thmeythmey.com