អន្តរជាតិ
អាហ្វ្រិកខាងត្បូងថា លោក ត្រាំ ទទួលព័ត៌មានខុសជុំវិញគោលនយោបាយរឹបអូសដីពីប្រជាជនស្បែកស
× នៅសប្តាហ៍នេះ អាហ្វ្រិកខាងត្បូងឆ្លើយតបទាំងខឹងសម្បារចំពោះសម្តីប្រធានាធិបតីអាមេរិកលោក ដូណាល់ ត្រាំ ដែលចោទប្រកាន់ខ្លួនខុសគោលដៅជុំវិញគម្រោងរឹបអូសដីប្រជាជនស្បែកសដោយមិនផ្តល់សំណង។ រដ្ឋាភិបាលក្រុង Pretoria អះអាងថា សម្តីលោក ត្រាំ កំពុងបញ្ឆេះភាពតានតឹងក្នុងចំណោមប្រជាជនអាហ្វ្រិកខាងត្បូង។
ប្រធានាធិបតី ដូណាល់ ត្រាំ បានបង្ហោះសារតាមគណនី twitter ផ្លូវការរបស់ខ្លួននៅថ្ងៃពុធទី ២២ ខែសីហាថា លោកបានប្រាប់ឲ្យរដ្ឋមន្ត្រីការបរទេសអាមេរិកតាមដានបញ្ហាអាហ្វ្រិកខាងត្បូងព្រោះប្រជាជនអាហ្វ្រិកខាងត្បូងជាជនជាតិស្បែកសត្រូវបានគេរឹបអូសដីធ្លី និងមានខ្លះត្រូវបានគេសម្លាប់ថែមទៀត។ សម្តីចោទប្រកាន់នេះធ្វើឲ្យអាហ្វ្រិកខាងត្បូងខឹងសម្បារ និងចេញមុខបកស្រាយផង។
បើតាមទីភ្នាក់ងារព័ត៌មាន AFP នៅថ្ងៃព្រហស្បតិ៍ទី ២៣ ខែសីហា រដ្ឋាភិបាលអាហ្វ្រិកខាងត្បូងហៅសម្តីរបស់លោក ត្រាំ ថាជាយោបល់ដែលកំពុងបញ្ឆេះការរើសអើងពូជសាសន៍ក្នុងចំណោមប្រជាជនអាហ្វ្រិកខាងត្បូងផង។
រដ្ឋាភិបាលអាហ្វ្រិកខាងត្បូងបានបញ្ជាក់តាមគណនី twitter ផ្លូវការរបស់ខ្លួនថា៖«អាហ្វ្រិកខាងត្បូងបដិសេធគំនិតយោបល់ដ៏ចង្អៀតនេះយ៉ាងដាច់អហង្ការព្រោះ វាត្រឹមតែបំបែកបំបាក់ប្រជាជាតិយើង និង រំលឹកយើងឲ្យឃើញពីអតីតកាលរបស់យើងដែលស្ថិតក្រោមអាណានិគមបរទេស»។
ដោយឡែកក្រសួងការបរទេសអាហ្វ្រិកខាងត្បូងបានចេញសេចក្តីថ្លែងការណ៍មួយដែរដោយបញ្ជាក់ថា មន្ត្រីខ្លួនបានជួបជាមួយមន្ត្រីស្ថានទូតអាមេរិករួចរាល់ហើយ។ លើសពីនេះ មន្ត្រីក្រសួងការបរទេសអាហ្វ្រិកខាងត្បូងបានព្រមានមន្ត្រីអាមេរិកផងដែរថា សេចក្តីថ្លែងការណ៍របស់លោក ត្រាំ ជាការបំប៉ោងព័ត៌មាន, មានភាពមិនត្រឹមត្រូវ, និងទទួលបានព័ត៌មានខុស ហើយអាចនិយាយបានថា វាជាចេតនានយោបាយផង។
តាមពិតទៅគម្រោងរឹបអូសដីធ្លីពីប្រជាជនស្បែកសនេះស្នើឡើងដោយលោក Cyril Ramaphosa ប្រធានាធិបតីអាហ្វ្រិកខាងត្បូង និងជាប្រធានបក្សកាន់អំណាច ANC ផងក្រោយពេលដែលលោកជាប់ឆ្នោតជានាយករដ្ឋមន្ត្រីកាលពីខែកុម្ភៈកន្លងមក។ ផែនការនេះត្រូវបានដាក់ស្នើទៅសភាហើយដើម្បីអនុម័តព្រោះវាចាំបាច់ត្រូវមានការកែប្រែរដ្ឋធម្មនុញ្ញ ប៉ុន្តែគេមិនដឹងច្បាស់ទេថា សភានឹងព្រមអនុវត្តសំណើរនេះដោយសារវាជារឿងចម្រូងចម្រាសខ្លាំងផង។
បើតាមរដ្ឋាភិបាលអាហ្វ្រិកខាងត្បូង ការតស៊ូមតិដើម្បីកែរដ្ឋធម្មនុញ្ញ និងរឹបអូសដីកសិកម្មមកវិញនេះធ្វើឡើងក្នុងគោលដៅលុបបំបាត់វិសមភាព និងអយុត្តិធម៌សង្គមពាក់ព័ន្ធនឹងការកាន់កាប់ដីធ្លីកសិកម្មនោះ។ ថ្វីបើរបបរើសអើង Apartheid ត្រូវបានបញ្ចប់តាំងពីឆ្នាំ ១៩៩៤ ក្តី សហគមន៍ជនជាតិស្បែកសដែលមានត្រឹម ៨ភាគរយក្នុងចំណោមប្រជាជនទាំងអស់នោះបន្តកាន់កាប់ដីកសិកម្មសរុប ៧២ភាគរយ។ ប្រជាជនស្បែកខ្មៅដែលមានរហូតដល់ ៤ភាគ ៥នៃប្រជាជននោះមានដីកសិកម្មត្រឹម ៤ភាគរយប៉ុណ្ណោះ៕
Tag:
អាហ្វ្រិកខាងត្បូង
ដីធ្លី
ដូណាល់ ត្រាំ
Cyril Ramaphosa
© រក្សាសិទ្ធិដោយ thmeythmey.com