ពីនេះ ពីនោះ
«លក់សណ្តែកដី» ចាស់ៗទំនងមិនស្គាល់ពាក្យនេះទេ រូបភាព សណ្តែកដី
× យុវវ័យក្នុងសម័យឌីជីថលនេះ បានបង្កើតពាក្យថ្មីជាច្រើន ដែលចាស់ៗទំនងជាមិនសូវយល់។ ពាក្យថា «លក់សណ្ដែកដី» មួយចំនួន ចាស់ៗតែងយល់ថា ជាការលក់សណ្តែកដីនៅតាមទីសាធារណៈតែប៉ុណ្ណោះ។ ប៉ុន្តែយុវវ័យសម័យឥឡូវ មិនបានប្រើពាក្យនេះ ក្នុងន័យលក់សណ្តែកដីទេ តែប្រើក្នុងន័យផ្សេងទៅវិញ។ ពួកគេបានហៅថា «លក់សណ្ដែកដី» ក្នុងន័យ សម្រាប់ការប្រឡង មានន័យថា ប្រលងថ្ងៃនេះមិនដឹងសរសេរពីអ្វីទេ សរសេរទាំងស្រពេចស្រពិល។
ធ្លាប់តែឃើញ នៅតាមបណ្តោយផ្លូវ និងនៅតាមរមណីយដ្ឋាន សួនច្បារ ឬទីផ្សារ តែងតែមានការអំពាវនាវលក់សណ្តែកដី ដោយអ្នកលក់ ប្រើកញ្ជើ ល្អី ឬកញ្ជ្រែង សម្រាប់ដាក់លក់សណ្តែកដី ដើម្បី ទាក់ទាញឲ្យគេជួយទិញនូវសណ្តែកដីរបស់ខ្លួន។ បើមែនទែនទៅ យុវវ័យសម័យស្មាតហ្វូននេះ គេនិយម និយាយថា លក់សណ្តែកដី គឺមានន័យថា លក់មុខ លក់មាត់ ឬនិយាយ និងធ្វើអ្វីមួយដែលប្រឡាំប្រកូវតែប៉ុណ្ណោះ។ យុវវ័យ និយាយថា លក់សណ្តែកដីពេញហ្នឹង មានន័យថា និយាយបូកលូកពេញវាលពេញកាល៕
ជាមួយគ្នាផងដែរ ពាក្យ លក់សណ្តែកដី នេះ គឺមិនមែនជាពាក្យថ្មីទេ គ្រាន់តែជាពាក្យដែលយុវជនប្រើ កាត់ន័យ តែប៉ុណ្ណោះ ដើម្បីឲ្យងាយយល់។ តែចាស់ៗ ប្រាកដជាពិបាកយល់បន្តិចហើយ ចំពោះពាក្យដែលយុវជនកំពុងតែប្រើប្រាស់នេះ។
នៅមានពាក្យជាច្រើនទៀត ដែលចាស់ៗ មិនទាន់យល់ ថាក្មេងៗសម័យនេះ ចង់និយាយ និងសំដៅលើអ្វីទេ ហើយពាក្យទាំងនោះគឺសុទ្ធតែមិនមែនជាពាក្យដែលស្ថិតនៅក្នុងវចនានុក្រមខ្មែរឡើយ។ ពោលមានដូចជា បែកស្លុយ, ឡួយកប់លូ, អត់លិឍ, Honey buku , ឡួយប្រាំបួន, ស្អាតJM(ស្អាតចុយម្រាយ), Share 1 Share 1 ជាដើម៕
Tag:
ពន្យល់ពាក្យ
សណ្តែកដី
© រក្សាសិទ្ធិដោយ thmeythmey.com