កីឡាជាតិ
ជាតិ
Asian Games៖ សូហ្វតិន្នីសរំពឹងធ្វើបានល្អ និងឈានដល់តំបន់មេដាយ
× លោក ជា ប៊ុនហេង អនុប្រធានទី១នៃសហព័ន្ធកីឡាសូហ្វតិន្នីសកម្ពុជា មានការជឿជាក់ខ្ពស់លើសមត្ថភាពរបស់អត្តពលិកក្នុងការប្រជែងដណ្តើមមេដាយពីព្រឹត្តិការណ៍ Asian Games នៅប្រទេសឥណ្ឌូណេស៊ី។ ប៉ុន្តែវត្តមានប្រទេសខ្លាំងៗមួយចំនួននៅតំបន់អាស៊ី បានក្លាយជាក្តីបារម្ភសម្រាប់កម្ពុជាក្នុងការប្រជែងដណ្តើមមេដាយ។ សូហ្វតិន្នីស ដែលជាកីឡាក្តីរំពឹងក្នុងការដណ្តើមមេដាយរបស់កម្ពុជា ត្រូវប្រកួតនៅថ្ងៃទី២៨ ខែសីហា ឆ្នាំ២០១៨។
ក្រោយទទួលបានការហ្វឹកហាត់ពង្រឹងសមត្ថភាពមួយរយៈនៅប្រទេសជប៉ុន បានធ្វើឲ្យថ្នាក់ដឹកនាំកីឡាសូហ្វតិន្នីសកម្ពុជា មានក្តីរំពឹងខ្ពស់ សម្រាប់ការបង្ហាញខ្លួនលើកដំបូងក្នុងព្រឹត្តិការណ៍ Asian Games លើកទី១៨នៅប្រទេសឥណ្ឌូណេស៊ី។ ការជឿជាក់បែបនេះ ក៏ព្រោះតែអត្តពលិកទាំងអស់បានហ្វឹកហាត់ត្រៀមយ៉ាងល្អ សម្រាប់ព្រឹត្តិការណ៍ដ៏ធំមួយនេះ។
មុនចេញដំណើរទៅប្រទេសឥណ្ឌូណេស៊ីកាលពីថ្ងៃទី២៦ ខែសីហា ឆ្នាំ២០១៨ នៅអាកាសយានដ្ឋានអន្តរជាតិភ្នំពេញ លោក ជា ប៊ុនហេង បានរៀបរាប់ថា៖«យើងមានសង្ឃឹមច្រើនសម្រាប់ការចូលរួមលើកដំបូងនេះ ព្រោះអត្តពលិកយើងបានហ្វឹកហាត់ពង្រឹងសមត្ថភាព បច្ចេកទេស និងយុទ្ធសាស្ត្រយ៉ាងល្អ ពិសេសហ្វឹកហាត់នៅជប៉ុនតែម្តង។ ម្យ៉ាងអត្តពលិកយើងទាំងអស់សុទ្ធតែប្តេជ្ញាថា នឹងប្រឺងប្រែងប្រកួតឲ្យអស់ពីសមត្ថភាព»។
អនុប្រធានទី១រូបនេះអះអាងថា លោកនឹងប្រឹងប្រែងធ្វើយ៉ាងណាឲ្យប្រទេសក្នុងតំបន់អាស៊ីស្គាល់ថា កម្ពុជាជាប្រទេសមួយខ្លាំងក្នុងចំណោមប្រទេសទាំង១០ក្នុងតំបន់អាស៊ាន។ ទោះបីយ៉ាងនេះក្តី វត្តមានជប៉ុន ចិន ម៉ុងហ្គោលី ថៃ ហ្វីលីពីន កូរ៉េ និងម្ចាស់ផ្ទះឥណ្ឌូណេស៊ី អាចជាឧបសគ្គដ៏ធំសម្រាប់កម្ពុជាក្នុងការស្វែងរកមេដាយ។ ព្រោះប្រទេសទាំងនេះ មានសមត្ថភាពខ្ពស់ បើធៀបនឹងកម្ពុជា ហើយចំណាត់ថ្នាក់ក្នុងតារាងពិភពលោករបស់ពួកគេ ក៏ខ្ពស់ជាងកម្ពុជាដែរ។
ក្រុមអត្តពលិកកីឡាសូហ្វតិន្នីសកម្ពុជា បានហ្វឹកហាត់សមនៅលើទីលានក្នុងប្រទេសឥណ្ឌូណេស៊ីកាលពីព្រឹកថ្ងៃទី២៧ ខែសីហា ឆ្នាំ២០១៨។ កីឡាករដែលត្រូវប្រកួតបើកឆាកនៅថ្ងៃទី២៨ ខែសីហា ឆ្នាំ២០១៨ រួមកីឡាករ ឌឹម សុជាភារុណ និងកីឡាករ កាន់ សោភ័ណ្ឌ៕
Tag:
សូហ្វតិន្នីស
ជា ប៊ុនហេង
Asian Games
© រក្សាសិទ្ធិដោយ thmeythmey.com