អ៊ីរ៉ង់បានប្រកាសថា អ៊ីរ៉ង់ត្រៀមលក្ខណៈរួចជាស្រេចហើយក្នុងការបោះបង់ចោលកិច្ចព្រមព្រៀងនុយក្លេអ៊ែរអ៊ីរ៉ង់ ព្រោះខ្លួនមិនទុកចិត្តថា បណ្តារដ្ឋអឺរ៉ុបនៅមានលទ្ធភាពគាំទ្រកិច្ចព្រមព្រៀងនេះឡើយ។ បន្ទាប់ពីបោះបង់ អ៊ីរ៉ង់ទំនងជាត្រឡប់ទៅរកផ្លូវឈានទៅផលិតអាវុធនុយក្លេអ៊ែរផងក៏ថាបាន។
មេដឹកនាំកំពូលអ៊ីរ៉ង់ Ayatollah Ali Khamenei បានថ្លែងក្នុងជំនួបជាមួយប្រធានាធិបតី ហាសាន់ រូហានី និងសមាជិកគណៈរដ្ឋមន្ត្រីនៅថ្ងៃពុធ ទី ២៩ ខែសីហាថា អ៊ីរ៉ង់អាចបោះបង់ចោលកិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ ២០១៥ បានបើសិនជាវាលែងបម្រើប្រយោជន៍អ៊ីរ៉ង់ទៀតហើយនោះ។
យោងតាមទីភ្នាក់ងារព័ត៌មាន AFP លោក Khamenei បាននិយាយដូច្នេះ៖«កិច្ចព្រមព្រៀងនុយក្លេអ៊ែរជាមធ្យោបាយប៉ុណ្ណោះ មិនមែនជាគោលដៅឡើយ។ ប្រសិនជាចុងក្រោយវាមិនបម្រើដល់ប្រយោជន៍យើងសោះនោះ យើងអាចបោះបង់ចោលវាបាន»។
មេដឹកនាំកំពូលសាធារណរដ្ឋឥស្លាមនេះបានប្រកាសផងដែរថា គ្មានថ្ងៃដែលអ៊ីរ៉ង់ចរចាឡើងវិញ ជាមួយមន្ត្រីអាមេរិកដែលចូលចិត្តជ្រើសរើសការប្រឈមមុខនិងមានឥរិយាបថមិនសមរម្យនោះឡើយ។
លើកឡើងបែបនេះ លោក Khamenei ចង់សំដៅលើការដកខ្លួនចេញពីកិច្ចព្រមព្រៀងរបស់រដ្ឋបាលអាមេរិក របស់លោក ដូណាល់ ត្រាំ កាលពីខែឧសភា ហើយមានតែអឺរ៉ុបប៉ុណ្ណោះដែលនៅបន្តប្តេជ្ញាចិត្តថា ខ្លួននៅជ្រោមជ្រែងការអនុវត្តកិច្ចព្រមព្រៀងនេះ។
កាលពីខែឧសភាកន្លងទៅ មេដឹកនាំសាសនាអ៊ីរ៉ង់នេះបានដាក់ចេញលក្ខខណ្ឌច្រើនគួរសមសម្រាប់មហាអំណាចអឺរ៉ុបបើសិនជាប្រទេសទាំងនោះចង់ធានាថា កិច្ចព្រមព្រៀងនុយក្លេអ៊ែរនឹងត្រូវបន្តអនុវត្តទៀតនោះ។ ក្នុងចំណោមលក្ខខណ្ឌនោះគឺ ស្នើឲ្យធនាគារអឺរ៉ុបជួយការពារពាណិជ្ជកម្មដែលមានជាមួយអ៊ឺរ៉ុប និងការពារការលក់ប្រេងអ៊ីរ៉ង់ទៅទីផ្សារក្រៅប្រទេសផងដែរ។
យ៉ាងណាក៏ដោយ ទណ្ឌកម្មអាមេរិកដែលដាក់ប្រឆាំងអ៊ីរ៉ង់ឡើងវិញក្រោយការចាកចេញជាបន្តបន្ទាប់នេះកំពុងធ្វើឲ្យបញ្ហាកាន់តែអាក្រក់។ ទណ្ឌកម្មជំហានទីមួយចូលជាធរមានរួចរាល់ហើយ ហើយវាក៏ធ្វើឲ្យអ៊ីរ៉ង់ប្រឈមបញ្ហាច្រើនដែរ។ ក្រុមហ៊ុនអឺរ៉ុបជាច្រើនត្រូវរត់ចេញពីអ៊ីរ៉ង់ព្រោះខ្លាចប្រឈមនឹងការខាតបង់ដោយសារទណ្ឌកម្មនេះដែរ។ រឿងអាក្រក់ជាងនេះ ទណ្ឌកម្មទីពីររបស់អាមេរិកដែលកំណត់គោលដៅលើវិស័យថាមពល និងប្រេងអ៊ីរ៉ង់នឹងចូលជាធរមានចាប់ពីខែវិច្ឆិកាខាងមុខនេះ ហើយវានឹងមានឥទ្ធិពលអាក្រក់ខ្លាំងដែរ។
តាមពិតទៅ លោក ត្រាំ មិនដែលពេញចិត្តកិច្ចព្រមព្រៀងអ៊ីរ៉ង់ដែលមហាអំណាចប្រាំសមាជិកអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិបូកអាល្លឺម៉ង់បង្កើតឡើងឆ្នាំ ២០១៥ ជាមួយអ៊ីរ៉ង់ឡើយព្រោះកិច្ចព្រមព្រៀងនេះមានសុពលភាពត្រឹមឆ្នាំ ២០២៥ និងមិនផ្តោតសំខាន់លើមីស៊ីលបាលីស្ទិកឡើយ។ តាំងពីពេលឃោសនាបោះឆ្នោត លោក ត្រាំ សន្យាថា លោកនឹងចាត់ការកិច្ចព្រមព្រៀងអាក្រក់នេះព្រោះវាមិនទប់ស្កាត់អ៊ីរ៉ង់ផលិតអាវុធនុយក្លេអ៊ែរឡើយ។ លោកបានដាក់លក្ខខណ្ឌសម្រាប់អឺរ៉ុបសម្រាប់ការចរចាជាថ្មី បើសិនអឺរ៉ង់ចង់រួចផុតពីទណ្ឌកម្មនោះ។
គេដាក់ការសង្ស័យថា អ្វីដែលអាមេរិកចង់បានមិនមែនត្រឹមកិច្ចព្រមព្រៀងនុយក្លេអ៊ែរដែលកម្រិតសមត្ថភាពអ៊ីរ៉ង់ផលិតនុយក្លេអ៊ែរឡើយ ប៉ុន្តែចង់ប្តូររបបដឹកនាំនៅអ៊ីរ៉ង់ថែមទៀត។ លោក ត្រាំ មើលឃើញថាទណ្ឌកម្មដែលលេចរូបរាងជាថ្មីប្រឆាំងនឹងវិស័យថាមពល និងប្រេងរបស់អ៊ីរ៉ង់ខាងមុខ នឹងធ្វើឲ្យអ៊ីរ៉ង់កាន់តែដុនដាបដោយសារអស្ថិរភាពសេដ្ឋកិច្ចផង។ បើតាមមន្ត្រីអាមេរិក ទណ្ឌកម្មថ្មីនេះមានគោលដៅកម្រិតការនាំប្រេងចេញរបស់អ៊ីរ៉ង់ឲ្យដល់កម្រិតសូន្យតែម្តង។
បញ្ហាសេដ្ឋកិច្ចនឹងមានផលអវិជ្ជមានច្រើនលើអត្រាអ្នកគ្មានការងារធ្វើ។ បច្ចុបនិកម្មភាពទូទាំងប្រទេសអ៊ីរ៉ង់កើនដល់ ១២ភាគរយ ហើយអត្រាយុវជនគ្មានការងារធ្វើគឺ ២៥ភាគរយ ខណៈដែលយុវជនវ័យក្រោម ៣០ មានប្រមាណ ៦០ភាគរយក្នុងចំណោមប្រជាជនសរុប ៨០លាននាក់ផង។
យ៉ាងណាមិញ ទីប្រឹក្សាសន្តិសុខអាមេរិកលោក ចន បុលតុន ដែលគេស្គាល់ថាជាអ្នកនយោបាយចូលចិត្តសង្គ្រាមនោះបានបដិសេធការលើកឡើងថាអាមេរិកចង់ប្តូររបបនៅអ៊ីរ៉ង់។ លោកអះអាងថា អាមេរិកគ្រាន់តែចង់ដាក់សម្ពាធលើរបបដឹកនាំអ៊ីរ៉ង់ដើម្បីសម្រេចបានកិច្ចព្រមព្រៀងប្រសើរ និងទូលំទូលាយជាងនេះ។ មិនត្រឹមតែប៉ុណ្ណោះវានឹងជួយធានាថា អ៊ីរ៉ង់ប្តូរឥរិយាបថ និងបញ្ឈប់ការគាំទ្រចលនាប្រដាប់អាវុធ, ក្រុមភេរវជន និងរបបដឹកនាំផ្តាច់ការនៅក្នុងតំបន់ទៀតក្នុងនោះមានក្រុមឧទ្ទាម Houthis នៅយ៉េមែន, ហេស្បូឡានៅលីបង់ រួមទាំងរបបលោក បាសា អាល់អាសាដ នៅស៊ីរីជាដើម៕