កីឡាជាតិ
ជាតិ
រស់ សំអឿន អាចបាត់មុខលើទីលានពី៥ទៅ៦ខែ ក្រោយវះកាត់ជង្គង់
× ខ្សែការពារ រស់ សំអឿន សមាជិកក្លិបវិសាខា បានវះកាត់របួសសរសៃពួរជង្គង់រួចរាល់ហើយកាលពីថ្ងៃទី២៨ ខែសីហា ឆ្នាំ២០១៨នៅប្រទេសវៀតណាម។ បញ្ហារបួសនេះ មិនត្រឹមតែធ្វើឲ្យ សំអឿន មិនអាចជួយក្រុមវិសាខាសម្រាប់ជំនួបនៅសល់ក្នុងក្របខណ្ឌខេមបូឌានលីគនោះទេ តែរូបគេ ក៏បាត់បង់កៅអីក្នុងក្រុមជម្រើសជាតិនៅឆ្នាំនេះទៀតផង។
លោក ហុក សុជីវ័ន្ត គ្រូបង្វឹកក្រុមវិសាខាបានបញ្ជាក់ថា កីឡាករ រស់ សំអឿន អាចអវត្តមានពី៥ទៅ៦ខែ បន្ទាប់ពីរូបគេបានវះកាត់របួសសរសៃពួរជង្គង់ កាលពីថ្ងៃទី២៨ ខែសីហា ឆ្នាំ២០១៨ នៅប្រទេសវៀតណាម។ តែយ៉ាងណា លោកអះអាងថា បញ្ហារបួសនេះមិនពាល់ខ្លាំងដល់ការប្រកួត ដែលនៅសល់របស់វិសាខានោះទេ។
«បើសិនគាត់(សំអឿន)រក្សាខ្លួនបានល្អ ប្រហែលពី៥ទៅ៦ខែអាចចូលហ្វឹកហាត់វិញបាន។ ហើយបើគាត់ហ្វឹកហាត់មានលំនឹងល្អ គាត់ ក៏អាចចូលលេងនៅពេលនោះផងដែរ»។ នេះជាការលើកឡើងរបស់លោក ហុក សុជីវ័ន្ត ដែលបានបន្ថែមថា បញ្ហារបួសជង្គង់របស់អតីតខ្សែការពារបឹងកេតខាងលើ បានកើតឡើងអំឡុងពេលហ្វឹកហាត់លើទីលានសិប្បនិម្មិត KMH Park កាលពីប្រមាណពីរខែមុន។ បច្ចុប្បន្នវិសាខាស្ថិតនៅលេខ៣ក្នុងតារាងមាន៤២ពិន្ទុ។
របួសសរសៃពួរជង្គង់នេះ មិនត្រឹមតែធ្វើឲ្យកីឡាករ រស់ សំអឿន មិនអាចជួយវិសាខាប្រជែងដណ្តើមពានរង្វាន់ក្របខណ្ឌខេមបូឌានលីគប្រចាំឆ្នាំ២០១៨ប៉ុណ្ណោះទេ ថែមទាំងធ្វើឲ្យរូបគេ បាត់បង់កៅអីក្នុងក្រុមជម្រើសជាតិថែមទៀតផង។ ក្រុមជម្រើសជាតិកម្ពុជាក្រោមការដឹកនាំគ្រូបង្វឹកអាហ្សង់ទីន Felix នឹងចាប់ផ្តើមប្រកួតផ្តុំនៅថ្ងៃទី៣ ខែកញ្ញា ដើម្បីត្រៀមប្រកួតមិត្តភាពអន្តរជាតិជាមួយក្រុមជម្រើសជាតិម៉ាឡេស៊ី ដែលរៀបចំនៅពហុកីឡដ្ឋានជាតិ នាថ្ងៃទី១០ ខែកញ្ញា ខាងមុខនេះ៕
Tag:
រស់ សំអឿន
វិសាខា
Cambodian League 2018
© រក្សាសិទ្ធិដោយ thmeythmey.com