ជាតិ
នយោបាយជាតិ
ព្រោះបង្ហោះដ្រូន ផលិតករភាពយន្តជនជាតិអូស្ត្រាលី ត្រូវជាប់ពន្ធនាគារ៦ឆ្នាំនៅកម្ពុជា លោក Jame Ricketson ផលិតករភាពយន្តជនជាតិអូស្ត្រាលី ត្រូវជាប់ពន្ធនាគាររយៈពេល៦ឆ្នាំនៅកម្ពុជា។ រូបថត AFP
× នៅទីបំផុត លោក Jame Ricketson ផលិតករភាពយន្តជនជាតិអូស្ត្រាលី ត្រូវជាប់ពន្ធនាគាររយៈពេល៦ឆ្នាំនៅកម្ពុជា ដោយសារតែបង្ហោះដ្រូន (Drone) ថតរូបភាពនិងវីដេអូពីលើអាកាស។ សាលាដំបូងរាជធានីភ្នំពេញ បានប្រកាសសាលក្រមដាក់ទោសបុរសជនជាតិអូស្ត្រាលីរូបនេះ នៅព្រឹកថ្ងៃទី៣១ ខែសីហា ឆ្នាំ២០១៨។
មុនសាលក្រមចូលជាស្ថាពរ លោក Jame មានពេល១ខែ ក្នុងការពឹងពាក់មេធាវីឲ្យដាក់បណ្តឹងទៅកាន់សាលាឧទ្ធរណ៍ ដើម្បីសុំជំទាស់។ លោកស្រី ពឹង យក់ហៀប ដែលជាមេធាវីម្នាក់របស់លោក Jame មិនទាន់ហ៊ានសម្រេចចិត្តនោះទេថា នឹងដាក់បណ្តឹងទៅសាលាឧទ្ធរណ៍ឬយ៉ាងណា។
លោកស្រី បានប្រាប់សារព័ត៌មានថ្មីៗ តាមទូរសព្ទថា លោកស្រី ត្រូវពិភាក្សាជាមួយលោក គង់ សំអុន ដែលជាមេធាវីការពារសិទ្ធិម្នាក់ទៀត រួមទាំងកូនក្តីជាមុនសិន មុននឹងសម្រេចថាធ្វើអ្វីបន្ត។ យ៉ាងណា លោកស្រី មិនពេញចិត្តនឹងសាលក្រមរបស់សាលាដំបូងរាជធានីភ្នំពេញឡើយ។ លោកស្រី បញ្ជាក់បែបនេះថា៖«ខ្ញុំយល់ថា ការដាក់ទោសគាត់ គឺមិនត្រឹមត្រូវទេ»។
ក្រោយបង្ហោះដ្រូនលើអាកាសក្នុងរាជធានីភ្នំពេញ កាលពីអំឡុងខែមិថុនា ឆ្នាំ២០១៨ លោក Jame ដែលមានវ័យ៦៥ឆ្នាំ ក៏ត្រូវបានឃាត់ខ្លួន ក្រោមបទចោទ «ប្រមូលផ្តុំព័ត៌មានជាអាទិ៍ ដែលអាចធ្វើឲ្យអន្តរាយការការពារជាតិ អំពើទទួល ឬប្រមូលផ្តុំដើម្បីផ្តល់ព័ត៌មានវិទ្យា ឬសលាកបត្រដែលអាចធ្វើឲ្យអន្តរាយការការពារជាតិ»៕
Tag:
តុលាការ
Jame
ពឹង យក់ហៀប
© រក្សាសិទ្ធិដោយ thmeythmey.com