ជាតិ
សិល្បះ
តន្ត្រីករជើងចាស់ លោក ម៉ម ប៊ុនណារាយ ទទួលមរណភាពក្នុងអាយុ៨៥ឆ្នាំ ប្រភពរូបថត ហ្វេសប៊ុក Mam Bunnara
× លោក ម៉ម ប៊ុនណារាយ តន្ត្រីករ និងជាកវី នាអំឡុងទសវត្សរ៍ឆ្នាំ១៩៦០ និង១៩៧០ បានទទួលមរណភាពក្នុងអាយុ៨៥ឆ្នាំ នាវេលាម៉ោង៩ព្រឹកថ្ងៃទី៣ ខែកញ្ញា ដោយសារជរាពាធ នៅក្បែរវិហារកាតូលិកផ្សារតូច ផ្លូវជាតិលេខ៥ រាជធានីភ្នំពេញ។ សពរបស់សិល្បករជើងចាស់រូបនេះ នឹងត្រូវបូជានៅថ្ងៃពុធទី៥ខែតុលាខាងមុខនៅវត្តសន្តិវ័នហៅវត្តទួលអស់លោក ដែលស្ថិតក្នុងខណ្ឌឬស្សីកែវ សង្កាត់ឬស្សីកែវ។ ចំណែកពិធីបុណ្យ៧ថ្ងៃនឹងធ្វើនៅថ្ងៃសៅរ៍ នៅព្រះវិហារកាតូលិក។ នេះបើតាមអ្នកស្រី ឱម វណ្ណថាត ដែលជាភរិយា របស់លោក ម៉ម ប៊ុនណារាយ។
លោក ម៉ម ប៊ុនណារាយ ជាតន្ត្រីករតាំងពីសម័យសង្គមរាស្ត្រនិយម ដែលធ្លាប់សម្រួលតន្ត្រីឱ្យ លោក ស៊ីន ស៊ីសាមុត អ្នកស្រី រស់ សេរីសុទ្ធា អ្នកស្រី ប៉ែន រ៉ន និងអ្នកចម្រៀងជាច្រើនរូបទៀតក្នុងសម័យនោះ។ បទចម្រៀងដែលលោកបានសម្រួលតមន្ត្រីមានបទ «កម្មប្រចាំកាយ» «មេត្តារៀមផង» «នៅតែឃ្លាត» «កំពង់ធំជំរុំចិត្ត» និងមានបទជាច្រើនទៀត។
ក្រោយពីបែកសង្គ្រាមលោកបានចូលបំរើការនៅក្នុងវិទ្យុជាតិ ដែលធ្វើការទាក់ទងនឹងការសម្រួលតន្ត្រី។ ក្រោយពីជួបគ្រោះថ្នាក់ដោយមានជនមិនស្គាល់មុខលួចបាញ់ប្រហារនៅឆ្នាំ១៩៨១ លោកបានផ្លាស់ទៅរស់នៅខេត្តកំពង់ចាមមួយរយៈ ដោយចូលទៅលេងភ្លេងក្នុងក្រុមតន្ត្រីយោធាភារម្យ។ បន្ទាប់មកនៅឆ្នាំ១៩៨៩ លោកក៏បានមករស់នៅភ្នំពេញវិញ ដោយបានបង្រៀនសិស្សមួយចំនួនពីការនិពន្ធបទភ្លេងនិងចម្រៀង។ ក្នុងជីវិតចុងក្រោយ លោក ម៉ម ប៊ុនណារាយ ក៏បាននិពន្ធទំនុកច្រៀង ដើម្បីបំរើដល់សាសនាកាតូលិកផងដែរ។
លោក សេង តារា អ្នកស្រាវជ្រាវប្រវត្តិអ្នកនិពន្ធ និងបទចម្រៀងសម័យដើម ក៏បានបញ្ជាក់ពីដំណឹងមរណភាពនេះដែរ។ លោក តារា បានសរសេរនៅលើហ្វេសប៊ុករបស់ខ្លួនថា លោក ម៉ម ប៊ុនណារាយ គឺជាតន្ត្រីករជើងចាស់ដែលមានទឹកដៃខ្ពស់មួយរូប។
លោកគឺជាប្អូនបង្កើតរបស់លោក ម៉ម បុប្ផានី តន្ត្រីកររៀមច្បងនៅសម័យនោះផងដែរ ដោយ លោកបានសាងស្នាដៃជាច្រើន តាមរយៈការដឹកនាំប្រគំភ្លេង ការសម្រួលតន្ត្រី) ថែមស្នាដៃនិពន្ធទំនុកច្រៀងផងដែរ។
ដោយមិនបានបញ្ជាក់លំអិត លោក សេង តារា បានលើកបង្ហាញពីបទចម្រៀងចាស់ៗមួយចំនួន ដែលមានការចូលរួមពីលោក ម៉ម ប៊ុនណារាយ។ បទចម្រៀងទាំងនោះ មានដូចជា កម្មប្រចាំកាយ (ស៊ីន ស៊ីសាមុត) មេត្តារៀមផង (លោកគង់ សំអឿន-លោកគង់ ចន្ថា) នៅតែឃ្លាត (លោក គង់ ចន្ថា) មេឃអើយជួយផង (សាមុត-រស់ សេរីសុទ្ធា) ឃ្លាតទាំងទឹកភ្នែក (សុទ្ធា) ដំណក់ភ្លៀងស្រក់ (ប៉ែន រ៉ន) រង់ចាំតែបងមួយ (សុទ្ធា) រំពឹង ! រំពឹង ! (សុទ្ធា) បងពិតជាកម្លោះ (សាមុត-សុទ្ធា) កណ្តូបបុកស្រូវ (សាមុត-សុទ្ធា) ផ្កាត្របែកព្រៃ (ឌី សុខន) ចម្រៀងមកមិត្ត (ឌី សុខន) ស្នេហ៍យើង (សុទ្ធា) គ្រាដំបូង (សាមុត) ជីវិតអ្នកផ្សងព្រេង (សាមុត) បងក្បត់អូនហើយ (ហួយ មាស) ខែរះក្រោមផ្កាយ (ម៉ម ប៊ុនណារាយ) បញ្ជីខ្មោច (អ៊ឹង ណារី) និងកំពង់ធំ ជំរុំចិត្ត (សាមុត) ៕
Tag:
ម៉ម ប៊ុនណារាយ
តន្ត្រីករ
តន្ត្រី សិល្បៈ
© រក្សាសិទ្ធិដោយ thmeythmey.com