ជាតិ
លោក រស់ សុវាចា និងលោក ឌី ខាំបូលី ជាអ្នកនាំពាក្យថ្មីរបស់ក្រសួងអប់រំ
លោក រស់ សុវាចា (ឆ្វេង) និងលោក ឌី ខាំបូលី អ្នកនាំពាក្យថ្មីរបស់ក្រសួងអប់រំ យុវជន និងកីឡា
×![]()
ភ្នំពេញ៖ លោក រស់ សុវាចា និងលោក ឌី ខាំបូលី បានទទួលភារកិច្ចជាអ្នកនាំពាក្យប្រចាំក្រសួងអប់រំ យុវជន និងកីឡា បន្ថែមលើមុខងារបច្ចុប្បន្ន។ នេះបើតាមសេចក្តីសម្រេចមួយរបស់លោករដ្ឋមន្ត្រី ហង់ ជួន ណារ៉ុន ចុះកាលពីថ្ងៃទី១២ ខែកញ្ញា។
អតីតអ្នកជំនាញផ្នែកអប់រំប្រចាំអង្គការយូណេស្កូ លោក រស់ សុវាចា ដែលបច្ចុប្បន្នជាអគ្គនាយករងនៃអគ្គនាយកដ្ឋានគោលនយោបាយ- ផែនការ ទទួលភារកិច្ចជាប្រធានអ្នកនាំពាក្យ។ លោក ឌី ខាំបូលី អ្នកស្រាវជ្រាវ អ្នកនិពន្ធសៀវភៅប្រវត្តិសាស្ត្រដ៏ល្បីឈ្មោះម្នាក់ ទទួលបន្ទុកជាអនុប្រធានអ្នកនាំពាក្យ បន្ថែមលើតួនាទីជាប្រធាននាយកដ្ឋានគោលនយោបាយរបស់ក្រសួង។
តាមសេចក្តីសម្រេច របស់ក្រសួងអប់រំ ចុះថ្ងៃទី១២ ខែកញ្ញា ឆ្នាំ២០១៨ ប្រធាន និងអនុប្រធានផ្នែកនាំពាក្យទាំងពីររូប មានតួនាទី និងភារកិច្ចផ្តល់ព័ត៌មានឆ្លើយតបអំពីក្រសួងទៅកាន់មជ្ឈដ្ឋានខាងក្រៅ ក៏ដូចជាការស្រាយបំភ្លឺចំណោទបញ្ហានានា។
បន្ថែមពីលើនេះ លោក រស់ សុវាចា និងលោក ឌី ខាំបូលី ត្រូវសហការជាមួយគ្រប់នាយកដ្ឋានជំនាញក្រោមឱវាទក្រសួងអប់រំ ក្នុងការប្រមូលព័ត៌មានដើម្បីឆ្លើយតបមជ្ឈដ្ឋាននានា។
កន្លងមក លោក រស់ សាលីន នាយកខុទ្ទកាល័យក្រសួងអប់រំ យុវជន និងកីឡា ជាអ្នកទទួលបន្ទុកលើការងារនាំពាក្យនេះ៕
© រក្សាសិទ្ធិដោយ thmeythmey.com
