អន្តរជាតិ
បាន គីមូន និងប៊ីល ហ្កេត ដឹកនាំគណៈកម្មការអន្តរជាតិស្តីពីបម្រែបម្រួលអាកាសធាតុ
× អតីតអគ្គលេខាធិការអង្គការសហប្រជាជាតិ លោក បាន គីមូន និងមហាសេដ្ឋីអាមេរិក លោក ប៊ីល ហ្កេត នឹងចូលដឹកនាំគណៈកម្មការអន្តរជាតិមួយស្ដីពីបម្រែបម្រួលអាកាសធាតុ។ គណៈកម្មការនេះដែរ នឹងបើកដំណើរការ នាខែតុលាខាងមុខ។ នេះបើតាមការបញ្ជាក់របស់រដ្ឋាភិបាលហូឡង់ នៅថ្ងៃទី១០ កញ្ញា។
គណៈកម្មការដែលមានមូលដ្ឋាននៅក្នុងទីក្រុង Rotterdam ប្រទេសហូឡង់នេះ បានបង្កើតឡើង ដោយមជ្ឈមណ្ឌលសកលសម្រាប់ការសម្របទៅតាមលក្ខខណ្ឌអាកាសធាតុ និងរដ្ឋាភិបាលហូឡង់ ដែលចាប់ដៃគូជាមួយនឹងវិទ្យាស្ថានធនធានពិភពលោក។ គោលបំណងនៃការបង្កើតគណៈកម្មការនេះឡើង គឺ «ចង់បញ្ចុះបញ្ចូលបណ្ដាប្រទេសនៅជុំវិញសកលលោកឲ្យចាត់វិធានការក្នុងប្រទេសរបស់ពួកគេឲ្យបានខ្លាំងក្លា ដើម្បីប្រឆាំងទៅនឹងផលវិបាកនៃការប្រែប្រួលអាកាសធាតុ»។ នេះបើតាមការបញ្ជាក់របស់រដ្ឋមន្ត្រីគ្រប់គ្រងធនធានទឹក និងហេដ្ឋារចនាសម្ព័ន្ធហូឡង់ លោកស្រី Cora van Nieuwenhuizen ។
យោងតាមការចុះផ្សាយរបស់ទីភ្នាក់ងារសារព័ត៌មាន AFP លោកស្រី Cora បាននិយាយបែបនេះថា «យើងសង្ឃឹមថា តម្រូវការសម្រាប់ការកែសម្រួលឲ្យស្របទៅតាមការប្រែប្រួលអាកាសធាតុ ទំនងជាត្រូវគេចាប់អារម្មណ៍នៅទូទាំងសកលលោក»។ លោកស្រី បានបន្ថែមទៀតថា គម្រោងការមួយ ដែលបង្កើតឡើងដើម្បីការពារបម្រែបម្រួលអាកាសធាតុ នឹងត្រូវបញ្ចេញជាសាធារណៈ នាខែកញ្ញា ឆ្នាំក្រោយ។
ជាមួយគ្នានេះ អតីតប្រមុខអង្គការសហប្រជាជាតិលោក បាន គីមូន បាននិយាយថា៖ «ការប្រកាសរបស់រដ្ឋាភិបាលហូឡង់ ជាជំហានដែលមានសារៈសំខាន់មួយ ដើម្បីឈានទៅដល់សកម្មភាព និងការយកចិត្តទុកដាក់បន្ថែមទៀត ពាក់ព័ន្ធនឹងការកែសម្រួលឲ្យស្របទៅនឹងការប្រែប្រួលអាកាសធាតុ»។ អតីតអ្នកការទូតកូរ៉េខាងត្បូង បន្តថា គណៈកម្មការនេះ បានចាប់ផ្ដើមបេសកកម្មពិភពលោកមួយ ដើម្បីពន្លឿនការសម្របសម្រួលបម្រែបម្រួលអាកាសធាតុ។
លោក បាន គីមូន និងលោក ប៊ីល ហ្កេត នឹងទៅកាន់ប្រទេសហូឡង់ នាថ្ងៃទី១៦ តុលាខាងមុខ ដើម្បីចូលរួមពិធីបើកដំណើរការគណៈកម្មការនេះ។
គួរបញ្ជាក់ដែរថា ការបង្កើតគណៈកម្មការទាក់ទងនឹងការប្រែប្រួលអាកាសធាតុនេះ គឺធ្វើឡើងស្របពេលដែលរដ្ឋអាមេរិកចំនួន ១៧ បានរួមគ្នាប្ដេជ្ញាប្រជែងនឹងប្រធានាធិបតីអាមេរិកដូណាល់ ត្រាំ ក្រោយពីប្រធានាធិបតីរូបនេះ បានសម្រេចចិត្តដកអាមេរិកចេញពីកិច្ចព្រមព្រៀងប៉ារីសស្តីពីការប្រែប្រួលអាកាសធាតុ កាលពីឆ្នាំ២០១៧កន្លងទៅ៕
Tag:
ហូឡង់
បាន គីម៉ូន
ប៊ីល ហ្កេត
បម្រែបម្រួលអាកាសធាតុ
© រក្សាសិទ្ធិដោយ thmeythmey.com