ក្រៅពីសាទរ សិស្សមិនចង់ឲ្យរដ្ឋមន្ត្រីអប់រំលាលែងពីតំណែង ព្រោះតែបញ្ហាកំណែឡើយ

ជាតិ

ក្រៅពីសាទរ សិស្សមិនចង់ឲ្យរដ្ឋមន្ត្រីអប់រំលាលែងពីតំណែង ព្រោះតែបញ្ហាកំណែឡើយ

17, Sep 2018 , 4:10 pm

រូបភាព

ដោយ: ប៉ូ សាគុន

ភ្នំពេញ៖ ក្រោយពីមានការសើរើវិញ្ញាសាមួយចំនួនថ្នាក់វិទ្យាសាស្ត្រ ក្រសួងអប់រំយុវជន និងកីឡា បានរកឃើញថាសិស្សជិត ១ ០០០ នាក់ បានប៉ះពាល់ពិន្ទុប្រឡង។ តែទោះជាយ៉ាងនេះក្ដី ទាំងសិស្សដែលជួបបញ្ហា និងមិនជួបបញ្ហា នៅតែសាទរចំពោះចំណាត់ការភ្លាមៗរបស់ក្រសួង។ មិនតែប៉ុណ្ណោះ ពួកគេថែមទាំងមិនចង់ឱ្យរដ្ឋមន្ត្រីក្រសួងសាមីមួយនេះ លាលែងពីតំណែងដែរ។

កញ្ញា ថន រតនា ជាបេក្ខជនទទួលបានលំដាប់ពិន្ទុ ១០០ ដែលកាលពីដំបូងនាងធ្លាក់មុខវិទ្យាគណិតនោះ បានសាទរចំពោះក្រសួងអប់រំ យុវជននិងកីឡា ដែលបានដោះស្រាយបញ្ហាឱ្យសិស្ស ដោយយកចិត្តទុកដាក់។ ជាបេក្ខជនម្នាក់ដែលបានដាក់ពាក្យតវ៉ាដែរនោះ រតនា បានសម្រេចក្ដីបំណងរបស់ខ្លួន ដែលរំពឹងទទួលបានលទ្ធផលល្អក្នុងការប្រឡង ក្រោយពីក្រសួងសើរើវិញ្ញាសាឡើងវិញ។ រតនា ក៏មិនចង់ឱ្យរដ្ឋមន្ត្រីក្រសួងសាមីនេះ លាលែងពីតំណែងដែរ ព្រោះនាងគិតថា វាជាកំហុសអចេនា។

ថន រតនា បញ្ជាក់ថា៖«មិនអាចបន្ទោសក្រសួងទាំងស្រុងបានទេ ព្រោះជាកំហុសអចេតនា។ រដ្ឋមន្ត្រីគាត់មានសមត្ថភាព គាត់ធ្វើឱ្យមនុស្សជាច្រើនទទួលស្គាល់ពីសមត្ថភាពរបស់សិស្ស ខ្ញុំជឿថា គាត់មិនចង់ឱ្យមានរឿងហ្នឹងកើតឡើងទេ។ ជាគ្រូតែងតែចង់ឱ្យសិស្សរបស់ខ្លួនជាប់ច្រើន មិនមែនចង់ឱ្យសិស្សធ្លាក់ទេ»។

ដូចគ្នាដែរកញ្ញា សួ ឧត្ដមមុនីរត្ន ដែលលទ្ធផលដំបូងរបស់នាងធ្លាក់គណិតវិទ្យាដែរនោះ បានបញ្ជាក់ថា ពេលឃើញលទ្ធផលដំបូងនាងស្លុតចិត្ត នឹងមិនជឿលទ្ធផលនេះឡើយ។ យុវសិស្សរូបនេះទទួលស្គាល់ថា លើកនេះក្រសួងអប់រំយុវជន និងកីឡា ពិតជាធ្វើឱ្យមានកំហុសធ្ងន់មែន តែក្រោយពីក្រសួងសើរើភ្លាមៗ ក៏ធ្វើឱ្យនាងធូរចិត្តឡើងវិញ។ ក្រោយពីសើរើវិញ្ញាសាឡើងវិញនេះ ឧត្តមមុនីរត្ន ទទួលបាននិទ្ទេសB លើមុខវិទ្យាគណិត និងនិទ្ទេសរួម A ដែលនាងថានេះជាលទ្ធផលនៃការប្រឹងប្រែងរៀន១២ឆ្នាំរបស់នាង។ «ពេលឃើញលទ្ធផលដំបូងខ្ញុំស្លុតចិត្ត ខ្ញុំមិនជឿថាខ្ញុំធ្លាក់គណិតទេ តែដល់សើរើខ្ញុំបានសប្បាយចិត្តវិញ។ ជារដ្ឋមន្ត្រី តែងតែចង់ឱ្យសិស្សជាប់ច្រើន ពេលជួបរឿងបែបនេះ គាត់ក៏មិនចង់ដែរ»។ នេះជាការបញ្ជាក់របស់កញ្ញា សួ ឧត្ដមមុនីរត្ន។

ចំណែក យុវសិស្ស មុំ សុភ័ក្រប៉ូលីន អាយុ១៨ឆ្នាំវិញ លទ្ធផលមុននិងក្រោយសើរើមិនបានធ្វើឱ្យនិទ្ទេសរួមA របស់គេប្រែប្រួលឡើយ គ្រាន់តែថយចុះលំដាប់ពិន្ទុបន្តិច។ ការណ៍នេះមិនធ្វើឱ្យគេខកចិត្តឡើយ។ អ្វីដែល ប៉ូលីន ចង់និយាយនោះគឺ គេចង់ឱ្យក្រសួងយកចិត្តទុកដាក់លើការងាររបស់ខ្លួនឱ្យបានច្រើនជាងនេះ។ យុវសិស្សរូបនេះបញ្ជាក់ថា លទ្ធផលមិនប្រក្រតីនេះ បានធ្វើឱ្យមិត្តរបស់គេ ជាច្រើននាក់ បាក់ទឹកចិត្តខ្លាំង រហូតលែងចង់រៀនតទៅទៀត។

មុំ សុភ័ក្រប៉ូលីន បញ្ជាក់ដូច្នេះថា៖ «ជារួមរដ្ឋមន្ត្រីគាត់ធ្វើបានល្អ ដោយយុត្តិធម៌ហើយ គាត់មិនចាំបាច់លាលែងទេ តែគ្រាន់ថាពេលក្រោយសូមឱ្យក្រសួងយកចិត្តលើការងារខ្លួន ឱ្យខ្លាំងជាងនេះ។ មិត្តខ្ញុំច្រើននាក់គាត់បាក់ទឹកចិត្តខ្លាំងណាស់ អ្នកខ្លះយំ អ្នកខ្លះគាត់លែងចង់រៀនទៀត ហើយគាត់លែងចង់ធ្វើអ្វីទាំងអស់»។

មិនមែនមានតែសិស្សជាប់និទ្ទេស A ឡើយ តែក៏មានសិស្សជាប់និទ្ទេសផ្សេងៗទៀត និងសិស្សទើបតែរៀនថ្នាក់ទី១១ដែរ គាំទ្រដល់ទង្វើមានទំនួលខុសត្រូវរបស់ក្រសួងនេះ។ពួកគេសុទ្ធតែបាននិយាយដូចៗគ្នាថា រដ្ឋមន្ត្រីក្រសួងអប់រំយុវជន និងកីឡា លោក ហង់ ជួនណារ៉ុន កន្លងមកធ្វើការបានល្អ ធ្វើឱ្យសង្គមទទួលស្គាល់សមត្ថភាពសិស្សក្រោយពេលប្រឡង។ បេក្ខជនទាំងនោះ អះអាងថា កំហុសលើកនេះ ជាបញ្ហាបច្ចេកទេស មិនអាចបន្ទោសទៅរដ្ឋមន្ត្រីតែម្នាក់នោះទេ៕