អន្តរជាតិ
ជំនួបមេដឹកនាំកូរ៉េ៖ វត្តមានម្ចាស់ក្រុមហ៊ុនធំៗកូរ៉េខាងត្បូង ជួយអូសកូរ៉េខាងជើងឲ្យបោះបង់នុយក្លេអ៊ែរ?
អ្នកស្នងមរតកក្រុមហ៊ុន Samsung Lee Jae-yong (ស្ដាំ) និងប្រធានក្រុមហ៊ុន SK Group Chey Tae-won (ឆ្វេង)។ (រូបភាព AFP)
×![]()
ដោយ: តន ចាន់រិទ្ធារ៉ា
ម្ចាស់ក្រុមហ៊ុនធំៗនៅកូរ៉េខាងត្បូងដូចជា Samsung, LG Group និង Hyundai ជាដើមស្ថិតក្នុងចំណោមប្រតិភូជាង៥០នាក់ដែលអមដំណើរប្រធានាធិបតីកូរ៉េខាងត្បូង មូន ចេអ៊ីន ទៅកាន់កូរ៉េខាងជើង។ វត្តមានរបស់ពាណិជ្ជករគ្រាក់ៗ និងមានឥទ្ធិពលនៅកូរ៉េខាងត្បូង ទំនងជាយុទ្ធសាស្ត្ររបស់លោក មូន ក្នុងបញ្ចុះបញ្ចូលឲ្យកូរ៉េខាងជើងបោះបង់នុយក្លេអ៊ែរ ជាថ្នូរនឹងការវិនិយោគពីសំណាក់កូរ៉េខាងត្បូង។ កូរ៉េខាងជើងដែលក្រីក្រ ពិតជាត្រូវការធនធានហិរញ្ញវត្ថុដើម្បីស្គាល់ការរីកចម្រើន។
ក្នុងជំនួបមេដឹកនាំអន្តរកូរ៉េបីថ្ងៃចាប់ថ្ងៃទី១៨ ដល់ថ្ងៃទី២០ ខែកញ្ញា មេដឹកនាំកូរ៉េខាងជើង គីម ជុងអ៊ុន មិនត្រឹមទទួលប្រធានាធិបតីកូរ៉េខាងត្បូង មូន ចេអ៊ីន តែម្នាក់ឡើយ។ លោក គីម ក៏ស្វាគមន៍បណ្ដាម្ចាស់ក្រុមហ៊ុនធំៗនៅកូរ៉េខាងត្បូង ដែលធ្វើដំណើរទៅជាមួយលោក មូន ដែរ។
លោក Lee Jae-Yong អនុប្រធានក្រុមហ៊ុនបច្ចេកវិទ្យា Samsung Group, លោក Chey Tae-wonប្រធានក្រុមហ៊ុនតិចណូឡូជី SK Group, លោក Kim Yong-hwan អនុប្រធានក្រុមហ៊ុន Hyundai Motor Group, លោក Choi Jeong-woo អនុប្រធានក្រុមហ៊ុនដែកថែប POSCO និងលោក Koo Kwang-mo ប្រធានក្រុមហ៊ុន LG Group គឺជាសមាជិកពិសេសនៃប្រតិភូរបស់លោក មូន បន្ថែមពីលើសមាសភាពមន្ត្រីជាន់ខ្ពស់ជាច្រើនទៀត។ ពួកគេនឹងជួបជាមួយឧបនាយករដ្ឋមន្ត្រីកូរ៉េខាងជើង Ri Ryong Nam ដែលទទួលបន្ទុកកិច្ចការសេដ្ឋកិច្ច។
ច្បាស់ណាស់ថា វត្តមានរបស់មេក្រុមហ៊ុនធំៗទាំងនេះ ជាវិធីសាស្ត្ររបស់លោក មូន ដើម្បីអូសទាញឲ្យមេដឹកនាំកូរ៉េខាងជើងរំសាយនុយក្លេអ៊ែររបស់ខ្លួន ដោយប្ដូរនឹងការបណ្ដាក់ទុនរបស់ក្រុមហ៊ុនកូរ៉េខាងត្បូង។ លើសពីនេះទៅទៀត វាក៏បង្ហាញពីចេតនាពិតប្រាកដរបស់កូរ៉េខាងត្បូងទៅកាន់កូរ៉េខាងជើងដែរ ព្រោះមេដឹកនាំទាំងពីរក៏ធ្លាប់ឯកភាពគ្នាពង្រឹងទំនាក់ទំនងកិច្ចសហប្រតិបត្តិការលើវិស័យសេដ្ឋកិច្ចនៅឧបទ្វីបកូរ៉េ។
កន្លងមក ក្រុងសេអ៊ូលក៏ធ្លាប់ប្រើវិធីសាស្ត្រនេះដើម្បីរឹតចំណងទាក់ទងជាមួយក្រុងព្យុងយ៉ាងដែរ។ កាលពីអំឡុងឆ្នាំ២០០០ ក្រុងសេអ៊ូល និងក្រុងព្យុងយ៉ាងបានចុះកិច្ចព្រមព្រៀងជាច្រើន ដែលអនុញ្ញាតឲ្យក្រុមហ៊ុនកូរ៉េខាងត្បូងអាចរកស៊ីនៅកូរ៉េខាងជើង។ ជាក់ស្ដែងក្រុមហ៊ុន Hyundai បានបណ្ដាក់ទុនរកស៊ីអភិវឌ្ឍនៅតំបន់ភ្នំ Kumgang និងនៅឯតំបន់ឧស្សាហកម្ម Kaesong ជាដើម។
កូរ៉េខាងត្បូងមានលុយច្រើន ឯកូរ៉េខាងជើងមានធនធានមនុស្ស និងធម្មជាតិ ដែលនេះគឺជាការបូកបញ្ចូលដែលនឹងនាំទៅរកប្រយោជន៍សម្រាប់ភាគីទាំងពីរ។ ពេលនេះ អ្វីៗនៅលើកូរ៉េខាងជើងថា តើអាចទាញយកផលពីកូរ៉េខាងជើងបានឬយ៉ាងណា? កូរ៉េខាងជើងពិតជាត្រូវការធនធនហិរញ្ញវត្ថុដើម្បីឈានទៅរកសេដ្ឋកិច្ចរីកចម្រើនដូចបងប្អូនកូរ៉េខាងត្បូងដែរ ហើយនោះជាមូលហេតុនៃការផ្លាស់ប្ដូរគោលនយោបាយក្នុងស្រុកដែលងាកចេញពីយោធាទៅរកសេដ្ឋកិច្ចវិញនោះ។
ការផ្លាស់ប្ដូរនយោបាយរបស់កូរ៉េខាងជើង អាចមើលឃើញតាមរយៈសកម្មភាពរបស់លោក គីម នារយៈពេលចុងក្រោយនេះ។ ខុសពីរាល់ដង ប្រមុខដឹកនាំវ័យក្មេងរូបនេះ លែងចុះត្រួតពិនិត្យទីតាំងយោធាទៀតហើយ ឬត្រួតពិនិត្យការបាញ់មីស៊ីលដែរ។ ជំនួសមកវិញ លោកទៅពិនិត្យកសិដ្ឋានចិញ្ចឹមសត្វ ចម្ការដំណាំកសិកម្ម និងរោងចក្រផលិតផលិតប្រើប្រាស់ប្រចាំថ្ងៃ ហើយបានរិះគន់ប្រព័ន្ធសុខាភិបាលក្នុងស្រុកដែលធ្លាក់ចុះផង។
ជាការកត់សម្គាល់ ការប្រែប្រួលនៅកូរ៉េខាងជើងបែបនេះ កើតឡើងបន្ទាប់ពីជំនួបរវាងលោក មូន និងលោក គីម ក្នុងខែមេសា និងជំនួបប្រវត្តិសាស្ត្ររវាងលោក គីម និងប្រធានាធិបតីអាមេរិក ដូណាល់ ត្រាំ ក្នុងខែមិថុនានៅសិង្ហបុរី។ លោក គីម និងលោក ត្រាំ បានឯកភាពគ្នារំសាយនុយក្លេអ៊ែរទាំងស្រុងនៅឧបទ្វីបកូរ៉េ ហើយជាថ្នូរមកវិញ អាមេរិកនឹងផ្អាកទណ្ឌកម្មទាំងឡាយលើកូរ៉េខាងជើងវិញ៕
Tag:
InterKoreanSummit
កូរ៉េខាងជើង
កូរ៉េខាងជើង
មូន ចេអ៊ីន
គីម ជុងអ៊ុន
© រក្សាសិទ្ធិដោយ thmeythmey.com
