អន្តរជាតិ
រដ្ឋអាស៊ានពីរ កំពុងស្ថិតក្រោមការពិនិត្យវិនិច្ឆ័យបឋមពីតុលាការព្រហ្មទណ្ឌអន្តរជាតិ
× បញ្ហារំលោភសិទ្ធិមនុស្សនៅក្នុងប្រទេសអាស៊ានមួយចំនួន មិនត្រឹមតែបានអូសទាញចំណាប់អារម្មណ៍ និងក្រសែភ្នែកសហគមន៍អន្តរជាតិប៉ុណ្ណោះនោះទេ តែពេលនេះ ក៏កំពុងតែបានអូសទាញឲ្យតុលាការព្រហ្មទណ្ឌអន្តរជាតិ ដែលហៅកាត់ថា ICC ចូលពាក់ព័ន្ធផងដែរ។ ការចូលពាក់ព័ន្ធរបស់អង្គភាពយុត្តិធម៌អន្តរជាតិមួយនេះ គឺដើម្បីធានាយុត្តិធម៌ដល់ជនរងគ្រោះ ពីក្រុមឧក្រិដ្ឋជន។
មកទល់ពេលនេះ មានរដ្ឋអាស៊ានពីរហើយ គឺហ្វីលីពីន និងមីយ៉ាន់ម៉ា ដែលស្ថិតក្នុងបញ្ជីរបស់តុលាការព្រហ្មទណ្ឌអន្តរជាតិ ពាក់ព័ន្ធនឹងស្ថានភាពរំលោភសិទ្ធិមនុស្សធ្ងន់ធ្ងរ និងកាន់តែអាក្រក់នោះ មានរបាយការណ៍ចោទប្រកាន់ជាច្រើនលើរបបដឹកនាំប្រទេសទាំងពីរ ក្នុងសញ្ញាណនៃការប្រព្រឹត្តបទល្មើសប្រឆាំងនឹងមនុស្សជាតិ។
នៅខែកុម្ភៈ ឆ្នាំ២០១៨នេះកន្លងទៅ អគ្គរដ្ឋអាជ្ញា នៃតុលាការព្រហ្មទណ្ឌអន្តរជាតិ បានប្រកាសបើកការពិនិត្យ និងវិនិច្ឆ័យបឋមចំពោះស្ថានភាព នៃសង្គ្រាមគ្រឿងញៀនរបស់លោកប្រធានាធិបតី រ៉ូឌ្រីហ្គោ ឌូទើតេ ដែលរបាយការណ៍សិទ្ធិមនុស្សជាច្រើន អះអាងថា របបដឹកនាំលោក បានសម្លាប់ទាំងជនសង្ស័យ និងឈ្មួញគ្រឿងញៀនរាប់ពាន់នាក់។
មិនបានប៉ុន្មានខែផង ពោលគឺ នៅថ្ងៃ១៨ កញ្ញាកន្លងទៅថ្មីៗនេះ អគ្គរដ្ឋអាជ្ញាតុលាការព្រហ្មទណ្ឌអន្តរជាតិ បានចេញសេចក្តីថ្លែងការណ៍ផ្លូវការមួយ ក្នុងការបើកការពិនិត្យ និងវិនិច្ឆ័យបឋមដូចគ្នាទៅលើស្ថានភាពរបស់មីយ៉ាន់ម៉ា ពាក់ព័ន្ធវិបត្តិជនភៀសខ្លួនជនជាតិភាគតិចរ៉ូហ៊ីងយ៉ា ដែលបានផ្ទុះឡើងកាលពីចុងឆ្នាំមុន និងបណ្តាលឲ្យប្រជាជនរាប់សិបម៉ឺននាក់ ត្រូវបង្ខំចិត្តចាកចេញទៅប្រទេសជិតខាង។
គួរជម្រាបថា ការបើកការពិនិត្យវាយតម្លៃលើស្ថានភាពរបស់អគ្គរដ្ឋអាជ្ញាតុលាការព្រហ្មទណ្ឌអន្តរជាតិ មិនមែនជាដំណាក់នៃការស៊ើបអង្កេតឡើយ ពោលគឺ វា គឺជាដំណាក់កាល នៃការប្រមូលទិន្នន័យបន្ថែមដើម្បីជាបន្ទុក សម្រាប់ការកំណត់ថាតើ តុលាការ អាចមានលទ្ធភាពគ្រប់គ្រាន់ឬទេក្នុងការបើកការស៊ើបអង្កេត។
អ្វីដែលគួរឲ្យកត់សម្គាល់នោះ បន្ទាប់ពីអគ្គរដ្ឋអាជ្ញា បានប្រកាសបើកការពិនិត្យវាយតម្លៃរួចហើយ ហ្វីលីពីន ដែលបានចូលជាសមាជិករបស់តុលាការតាំងពីឆ្នាំ២០១១មកនោះ បានប្រកាសដើរចេញជាផ្លូវការពីតុលាការទៅវិញ។ ការដើរចេញទាំងបែបនេះ ត្រូវបានតុលាការបញ្ជាក់ច្បាស់ហើយថា មិនប៉ះពាល់ដល់នីតិវិធីវាយតម្លៃរបស់តុលាការឡើយ។
កាន់តែចាប់អារម្មណ៍ផងដែរនោះ មីយ៉ាន់ម៉ា ដែលមិនមែនជាសមាជិក ឬក៏ជាភាគី របស់តុលាការព្រហ្មទណ្ឌអន្តរជាតិ តែត្រូវបានតុលាការសម្រេចថាមានយុត្តាធិការ ដ្បិតសំណុំរឿងនេះ កើតឡើងក្នុងទឹកដីបង់ក្លាដែសផងដែរនោះ បានប្រកាសក្តែងៗថា មិនសហការជាមួយនឹងតុលាការនេះឡើយ។ មីយ៉ាន់ម៉ា លើកឡើង ជារឿងមិនសមទាល់តែសោះ ដែលតុលាការ ធ្វើបែបនេះ៕
Tag:
អាស៊ាន
ICC
សិទ្ធិមនុស្ស
© រក្សាសិទ្ធិដោយ thmeythmey.com