ភ្នំពេញ៖ ព្រះសង្ឃកម្ពុជាក្រោម២ព្រះអង្គ ដែលបានធ្វើដំណើរពីខេត្តឃ្លាំង នៃទឹកដីកម្ពុជាក្រោម មកសិក្សានៅរាជធានីភ្នំពេញ បានទទួលបានអាហារូបករណ៍សិក្សានៅប្រទេសរុស្ស៊ី។ ព្រះតេជគុណទាំងពីរព្រះអង្គមានព្រះជន្មជាង២០ វស្សា បានបញ្ជប់ការសិក្សាថ្នាក់បរិញ្ញាបត្រហើយ។ បច្ចុប្បន្នព្រះតេជគុណ ថាច់ វណ្ណា និងព្រះតេជគុណ សេរី វឌ្ឍនៈ កំពុងបន្តការសិក្សាថ្នាក់អនុបណ្ឌិត នៅប្រទេសរុស្ស៊ី។
ដើម្បីជ្រាបកាន់តែច្បាស់ពីការតស៊ូ និងការស្វែងរកអាហារូបករណ៍នៅប្រទេសរុស្ស៊ី។ សូមលោកអ្នកនាង ស្ដាប់បទយកការណ៍ ដែលរៀបចំដោយកញ្ញា ថាន រស្មី នៃសារព័ត៌មានថ្មីៗដូចតទៅ៖
ព្រះសង្ឃខ្មែរកម្ពុជាក្រោមជាច្រើនអង្គ ដែលចង់បន្តការសិក្សារៀនសូត្រខ្ពង់ខ្ពស់ ត្រូវនិមន្តពីកម្ពុជាក្រោម មកកម្ពុជាកណ្ដាល ដើម្បីទទួលការសិក្សាថ្នាក់មហាវិទ្យាល័យ ដោយអាស្រ័យលើការបរិច្ចាគទាន ពីពុទ្ធបរិស័ទ។ ហេតុតែចង់បានការសិក្សាកាន់តែខ្ពស់ ព្រះសង្ឃខ្មែរកម្ពុជាក្រោមពីរអង្គ បានព្យាយាមស្វែងរកអាហារូបករណ៍ សិក្សានៅប្រទេសរុស្ស៊ី ដើម្បីបំពេញចំណេះដឹងបន្ថែមទៀត។
ក្រោយពីជោគជ័យក្នុងការដាក់អាហារូបករណ៍នៅប្រទេសរុស្ស៊ីថ្នាក់អនុបណ្ឌិត ព្រះតេជគុណទាំង២ព្រះអង្គ គឺព្រះតេជគុណ ថាច់ វណ្ណា និងព្រះតេជគុណ សេរី វឌ្ឍនៈ បានឲ្យដឹងថា ការដាក់អាហារូបករណ៍ទៅសិក្សានៅរុស្ស៊ី គឺអាស្រ័យលើលំដាប់ពិន្ទុកនៅក្នុងការសិក្សា។ ព្រះតេជគុណ ថាច់ វណ្ណា បានបន្ថែមថា អ្វីដែលជាភាពងាយស្រួលនោះគឺ និស្សិតដាក់អាហារូបករណ៍ដោយផ្ទាល់ ទៅក្រសួងអប់រំរុស្ស៊ី និងមិនត្រូវការតេស្តភាសាអង់គ្លេស ឬភាសារុស្ស៊ីនោះឡើយ។
ព្រះតេជគុណ ថាច់ វណ្ណា បញ្ជាក់ថា៖«ខាងក្រសួងអប់រុស្ស៊ី គេមានវេបសាយមួយឈ្មោះ russia.study ដែលសម្រាប់ឲ្យនិស្សិតនៅលើពិភពលោក អាចដាក់អាហារូបករណ៍ទៅសិក្សានៅសហព័ន្ធរុស្ស៊ីបាន។ ឯកសារដែលភ្ជាប់ទៅជាការចុះឈ្មោះមាន លិខិតឆ្លងដែន សញ្ញាបត្រដែលបកប្រែជាភាសាអង់គ្លេស និងលិខិតពិនិត្យសុខភាពទូទៅនៅក្រសួងអប់រំ»។
ព្រះតេជគុណមកពីខេត្តឃ្លាំងខាងលើ បានបន្ថែមថា ការដាក់អាហារូបករណ៍ ត្រូវធ្វើឡើងចន្លោះពីខែកុម្ភៈ ទៅខែមីនា និងរង់ចាំលទ្ធផល ចន្លោះខែកក្កដា ដល់ខែសីហា ដែលជាវេលាវិស្សមកាលនៅរុស្ស៊ី។ ដើម្បីទទួលបានអាហារូបករណ៍ អ្នកដែលមានអាទិភាពខ្ពស់ គឺជាអ្នកដែលមានពិន្ទុខ្ពស់ក្នុងការសិក្សា។
ព្រះតេជគុណ ថាច់ វណ្ណា បញ្ជាក់បន្ថែម៖ «ជាធម្មតារុស្ស៊ី ជាប្រទេសមហាអំណាចមួយដែរ អីចឹងគេមិនតម្រូវឲ្យចេះភាសាអង់គ្លេសទេ។ គេប្រើប្រាស់ភាសារុស្ស៊ី ហើយមិនមែនទាល់តែរុស្ស៊ីទើបអាចទៅរៀនបានទេ ព្រោះគេមានថ្នាក់បង្រៀនភាសារុស្ស៊ីមួយឆ្នាំ មុនចូលថ្នាក់សិក្សាជំនាញ»។
ដោយគិតថារុស្ស៊ី គឺជាប្រទេសមហាអំណាចមួយស្របពេលដែលព្រះតេជគុណចាប់អារម្មណ៍ចង់រៀនមុខវិទ្យាវិទ្យាសាស្ត្រនយោបាយផងនោះ ទើបព្រះតេជគុណ ថាច់ វណ្ណា សម្រេចជ្រើសរើសអាហារូបករណ៍ សិក្សានៅប្រទេសរុស្ស៊ីនេះតែម្ដង។
ក្រោយពី ថាច់ វណ្ណា ចែករំលែកបទពិសោធន៍នៃការស្វែងរកអាហារូបករណ៍នៅរុស្ស៊ី ព្រះតេជគុណ សេរី វឌ្ឍនៈ អ្នកខេត្តឃ្លាំងដូចគ្នា ក៏បានចែករំលែកពីបញ្ហាប្រឈមក្នុងការសិក្សានៅទីនោះផងដែរ។ ដោយព្រះតេជគុណមានសង្ឃដីកាថា ប្រាក់ខែដែលទទួលបានពីអាហារូបករណ៍នៅប្រទេសរុស្ស៊ី ទទួលបានតិចជាង អាហារូបករណ៍នៅបណ្ដាលប្រទេសដទៃ។ តួយ៉ាងក្នុងមួយខែ រដ្ឋាភិបាលកម្ពុជា ផ្ដល់ជូននិស្សិតអាហារូបករណ៍ចំនួន៥០ដុល្លារតែប៉ុណ្ណោះ ខណៈក្រសួងអប់រំរុស្ស៊ី ផ្ដល់ឲ្យនិស្សិតអាហារូបករណ៍ប្រមាណ៣០ដុល្លារតែប៉ុណ្ណោះ។
ព្រះតេជគុណ សេរី វឌ្ឍនៈ មានសង្ឃដីកាថា៖ «ដោយសារប្រាក់អាហារូបករណ៍តិច ហើយរយៈពេល៣ទៅ៦ខែ ទើបបើកឲ្យម្ដង ដូច្នេះហើយនិស្សិតដែលទៅរៀន ត្រូវមានប្រាក់សម្រាប់ចាយវាយដោយខ្លួនឯងពីប្រទេសឲ្យហើយ។ សម្រាប់អ្នកមានជំងឺដុះសាច់ច្រមុះ អ្នកចាញ់រងា និងអ្នកជំងឹក្រពះក៏ប្រឈមដែរ ដោយសារតែរៀនរហូតពីព្រឹកម៉ោង៨ ដល់ម៉ោង៦ល្ងាច»។
យ៉ាងណាមិញចំពោះព្រះសង្ឃមានបញ្ហាប្រឈមជាងគ្រហស្ថ ពិសេសទៅលើរបបអាហារ។ ដោយសារតែព្រះសង្ឃ ត្រូវបដិបត្តិវិន័យសង្ឃផង រៀបចំចំណីអាហារដោយខ្លួនឯងផង។ ជាពិសេសត្រូវប្រឹងប្រែងរៀនសូត្រ ដើម្បីរក្សាអាហារូបករណ៍ដែលទទួលបាន។
ព្រះតេជគុណ សេរី វឌ្ឍនៈ មានសង្ឃដីកាថា៖ «ពិបាកដែររឿងឆាន់ តែពិបាកតែដំបូងទេ។ ពេលយើងនៅយូរទៅ យើងស៊ាំជាមួយគេហើយ។ យើងជាព្រះសង្ឃ តែត្រូវនៅរួមជាមួយនិស្សិតចម្រុះ មានទាំងវៀតណាម ចិន អារ៉ាប់ ជាដើម។ អីចឹងហើយបានជាយើងមានចិត្តខ្លាច ទាំងការធ្វើម្ហូបជាដើម តែពេលនៅស៊ាំយូរទៅក៏អស់បារម្ភដែរ»។
ទោះមានការប្រឈមនឹងការរស់នៅ ក៏ដូចជាចំណីអាហារខ្លះ សម្រាប់សុវត្ថិភាពវិញ ត្រូវបានព្រះតេជគុណទាំង២ព្រះអង្គឲ្យដឹងថា មានសន្តិសុខល្អ ទាំងនៅក្នុងអន្តេវាសិកដ្ឋាន តាមដងផ្លូវ តាមផ្សារ ក៏ដូចជាសាលារៀន។ ព្រះសង្ឃកម្ពុជាក្រោមទាំង២ព្រះអង្គ បច្ចុប្បន្នបានសម្រាកវិស្សមកាលពីការសិក្សានៅប្រទេសរុស្ស៊ី បានមកគង់នៅវត្តសាមគ្គីរង្សី ដែលជាទីមានព្រះសង្ឃកម្ពុជាក្រោមជាច្រើនគង់នៅ។
ព្រះតេជគុណ នឹងនិមន្តទៅសិក្សានៅប្រទេសរុស្ស៊ីវិញ នៅដើមខែតុលានេះ។ ដោយសិក្សាថ្នាក់អនុបណ្ឌិតផ្នែកវិទ្យាសាស្ត្រនយោបាយ បន្ទាប់ពីបញ្ចប់ការសិក្សាថ្នាក់ភាសារុស្ស៊ីអស់រយៈពេល១ឆ្នាំ៕