អន្តរជាតិ
ស៊ូជី ជួបមេទ័ពកំពូល ក្រោយមានរឿងចម្រូងចម្រាស់ជាមួយតុលាការព្រហ្មទណ្ឌ ICC
× លោកស្រីទីប្រឹក្សារដ្ឋមីយ៉ាន់ម៉ា អ៊ុងសាន ស៊ូជី បានជួបពិភាក្សាបិទទ្វារជាមួយនឹងអគ្គមេបញ្ជាការកងទ័ពមីយ៉ាន់ម៉ា លោក មិន អ៊ុងឡាំង (Min Aung Hlaing) ពាក់ព័ន្ធនឹងការអភិវឌ្ឍប្រទេសបច្ចុប្បន្ន និងជាពិសេសនោះលើបញ្ហាចម្រូងចម្រាសជាមួយនឹងសហគមន៍អន្តរជាតិលើវិបត្តិជនភៀសខ្លួនរ៉ូហ៊ីងយ៉ា។
អ្នកនាំពាក្យខុទ្ទកាល័យប្រធានាធិបតីមីយ៉ាន់ម៉ា លោក ស ធេហ៍ នៅថ្ងៃ៥ តុលា បានថ្លែងក្នុងសន្និសីទសារព័ត៌មានមួយថា ទីប្រឹក្សារដ្ឋមីយ៉ាន់ម៉ា បានជួបពិភាក្សាជាមួយនឹងអគ្គមេបញ្ជាការកងទ័ពមីយ៉ាន់ម៉ាជាលក្ខណៈចង្អៀតមួយ ដោយបានបញ្ចប់ជាមួយនឹងលទ្ធផលផ្លែផ្កា និងមេត្រីភាព។ នេះបើយោងតាមការចុះផ្សាយរបស់សារព័ត៌មានមីយ៉ាន់ម៉ា The Irrawaddy។
តាមប្រភពព័ត៌មានដដែលនោះ អ្នកនាំពាក្យ បានឲ្យដឹងថា ជំនួបដ៏កម្រ និងមិនមានការប្រកាសឲ្យដឹងមុនរវាងថ្នាក់ដឹកនាំជាន់ខ្ពស់ប្រទេសតទល់គ្នា គឺជាសារបង្ហាញពីភាពកាន់តែល្អប្រសើរ និងវិជ្ជមាននៃការចូលរួមរបស់យោធា ជាមួយនឹងរដ្ឋាភិបាលស៊ីវិល។ « ហេតុអ្វី ក៏គាត់មានវត្តមាននៅទៅនោះ ប្រសិនបើទំនាក់ទំនងយោធា មិនល្អនោះ?» នេះ គឺជាការលើកឡើងរបស់អ្នកនាំពាក្យ។
តាមអ្នកនាំពាក្យ មេដឹកនាំកំពូលរបស់មីយ៉ាន់ម៉ា ក៏បានផ្តោតលើបញ្ហានៃវិបត្តិជនភៀសខ្លួនរ៉ូហ៊ីងយ៉ា និងការចោទប្រកាន់មេដឹកនាំយោធាជាអ្នកទទួលខុសត្រូវលើវិបត្តិនេះផងដែរ។ ជំនួបនេះ ត្រូវបានអ្នកតាមដានស្ថានភាពមីយ៉ាន់ម៉ា ចាត់ទុក ជាការចរចា និងនិយាយគ្នាទុកជាមុន ដ្បិតនៅសប្តាហ៍ក្រោយនេះ មីយ៉ាន់ម៉ា ក៏នឹងមានកិច្ចប្រជុំធំដើម្បីជជែកពីដំណើរការកសាងសន្តិភាពផងដែរនោះ។
ការណ៍ដែលធ្វើឲ្យជំនួបរវាងមេដឹកនាំទាំងពីររបស់មីយ៉ាន់ម៉ា ស្ថិតក្នុងការចាប់អារម្មណ៍ខ្លាំងនោះ ក៏ព្រោះតែកន្លងមក ជំនួបមួយទល់មួយរវាងមេដឹកនាំទាំងពីរ ជាក់ស្តែងនៅឆ្នាំ២០១៥ និង២០១៦ សុទ្ធសឹងតែប្រកាសជាសាធារណៈទុកជាមុន។ រាល់ជំនួបរវាងមេដឹកនាំទាំងពីរ ផ្តោតលើតួនាទីរបស់យោធានៅក្នុងការដឹកនាំប្រទេស ដ្បិតយោធា បានចាក់ឬសគល់ជាច្រើនទស្សវត្សមួយនោះក្នុងការដឹកនាំមីយ៉ាន់ម៉ា។
គួរជម្រាបផងដែរថា ថ្មីៗនេះ តុលាការព្រហ្មទណ្ឌអន្តរជាតិ បានចេញសម្រេចប្រកាសពីយុត្តាធិការលើមីយ៉ាន់ម៉ាពាក់ព័ន្ធវិបត្តិជនភៀសខ្លួនរ៉ូហ៊ីងយ៉ា ដែលសេចក្តីសម្រេចនេះ បានធ្វើឲ្យមុខមាត់មីយ៉ាន់ម៉ា ត្រូវធ្លាក់ចុះ និងតម្រូវឲ្យរដ្ឋាភិបាលមីយ៉ាន់ម៉ា ត្រូវសម្របខ្លួនទៅតាមតាមបទដ្ឋានអន្តរជាតិ។ បន្ថែមលើនេះ ភ្នាក់ងារជំនាញអង្គការសហប្រជាជាតិ ក៏បានចេញរបាយការណ៍មួយ ដោយចោទប្រកាន់យោធាជាន់ខ្ពស់ពាក់ព័ន្ធនឹងការទទួលខុសត្រូវលើបញ្ហា៕
Tag:
ICC
អ៊ុងសាន ស៊ូជី
មីយ៉ាន់ម៉ា
© រក្សាសិទ្ធិដោយ thmeythmey.com