ភ្ជុំបិណ្ឌ៖ ក្រុមភ្នាក់ងារទេសចរណ៍មួយចំនួនបានអះអាងថា ពួកគេបានទទួលអតិថិជនច្រើនដែលបានទិញដំណើរកម្សាន្តនៅបរទេស។ ក្រុមហ៊ុនទីភ្នាក់ងារទេសចរណ៍ពុំសូវទទួលបានអតិថិជនដែលទិញកញ្ចប់ដំណើរកម្សាន្តក្នុងប្រទេសឡើយ។ ពួកគេអះអាងថា ពលរដ្ឋខ្មែរអាចធ្វើដំណើរកម្សាន្តជាលក្ខណគ្រួសារ ឬឯកជនដោយខ្លួនឯង។
ក្រុមហ៊ុនភ្នាក់ងារទេសចរណ៍ដ៏ធំ R.T.R បានទទួលការបញ្ជាទិញកញ្ចប់ដំណើរកម្សាន្តនៅបរទេសពី អតិថិជនជាង ១០០០នាក់ សម្រាប់រយៈពេលនៃការឈប់សម្រាកនាថ្ងៃភ្ជុំធំនេះ។ នេះបើតាមការបញ្ជាក់របស់នាយិការបស់ក្រុមហ៊ុនទេសចរណ៍ R.T.R លោកស្រី ប៊ី ឧដ្ឋានវតី ប្រាប់សារព័ត៌មានថ្មីៗ។ ប្រទេសម៉ាឡេស៊ី សិង្ហបុរី ប្រទេសចិន និងទីក្រុងឌូបៃជាដើម សុទ្ធតែជាគោលដៅទេសចរណ៍ដែលពលរដ្ឋកម្ពុជាគ្រោងធ្វើចេញទៅកម្សាន្ត។
ក្រុមហ៊ុនទេសចរណ៍មួយទៀត ឈ្មោះ Fun Trip Travel បានទទួលការកក់ដំណើរកម្សាន្តប្រមាណ១៣០នាក់ ទៅប្រទេស វៀតណាម ថៃ ម៉ាឡេស៊ី ជាដើម។
នៅក្រុមហ៊ុនទេសចរណ៍ AVEERA ឯណោះវិញ លោកស្រី ជា ម៉ូលីកា ដែលជាអ្នកគ្រប់គ្រងទូទៅ បានអះអាងថា ក្រុមហ៊ុនរបស់លោកស្រីបានទទួលអតិថិនជាង៤០នាក់ ប៉ុន្តែជាដំណើរកម្សាន្តទៅដល់ទ្វីបអឺរ៉ុបតែម្តង។
អ្នកគ្រប់គ្រងក្រុមហ៊ុនទេសចរណ៍សុទ្ធតែអះអាងថា ការឈប់សម្រាករយៈពេលវែងតែងតែក្លាយជាឱកាសដែលពលរដ្ឋកម្ពុជាពិចារណា និងសម្រេចធ្វើដំណើរកម្សាន្តនៅបរទេស ទន្ទឹមនឹងពួកគេមានហិរញ្ញវត្ថុគ្រប់គ្រាន់។ លោក ថាច់ ពុធថា នាយកគ្រប់គ្រងនៃក្រុមហ៊ុន Fun Trip Travel បានពន្យល់យ៉ាងដូច្នេះ៖«ជាទូទៅ អ្នកដើរកម្សាន្តច្រើនតែមានគម្រោងទុកតាំងពី៣ខែ ទៅ៦ខែ ហើយពួកគេបានត្រៀមថវិកា។ ម្យ៉ាងទៀត នៅបរទេសពួកគេបានប្រកួតប្រជែងទាក់ទាញទេសចរយ៉ាងខ្លាំង»។
លោកស្រី ប៊ី ឧដ្ឋានវតី នៃក្រុមហ៊ុនទេសចរណ៍ R.T.R បានបញ្ជាក់ដូចគ្នាអំពីនយោបាយនៃការទាក់
ទាញទេសចររបស់ប្រទេសនានាដូចជាតម្លៃនៃការស្នាក់នៅសណ្ឋាគារថយចុះ នេះដោយមិនទាន់គិតអំពីវត្តមាននៃក្រុមហ៊ុនអាកាសចរណ៍កាន់តែច្រើនដែលហោះមកកម្ពុជា ហើយដែលធ្វើឲ្យតម្លៃសំបុត្រយន្តហោះធ្លាក់ចុះដែរ។ នាយិកាគ្រប់គ្រង R.T.R បានបន្ថែមយ៉ាងដូច្នេះ៖«ម្យ៉ាងវិញទៀត ពួកគេខ្ញុំបានរៀបចំកញ្ចប់ដំណើរកម្សាន្តច្រើនប្រភេទ សម្រាប់ច្រើនក្រុម។ ពោលគឺសម្រាប់អ្នកថវិកាតិច មធ្យម និងដល់ VIP»។ «ខ្ញុំចាប់អារម្មណ៍ថា ពលរដ្ឋខ្មែរកាន់តែច្រើនបានគិតអំពីគុណភាពនៃជីវិតរបស់ពួកគេ។ ពួកគេត្រូវចំណាយពេល និងថវិកាដើម្បីដើរកម្សាន្តនៅបរទេស»។ នេះជាការសន្និដ្ឋានរបស់ លោកស្រី វតី។
ពលរដ្ឋខ្មែរកម្សាន្តនៅម៉ាឡេស៊ី
នៅពេលដែល ក្រុមហ៊ុនទេសចរណ៍ពុំសូវទទួលបានការបញ្ជាទិញកញ្ចប់ដំណើរកម្សាន្តក្នុងប្រទេស មិនមែនមានន័យថា ពលរដ្ឋខ្មែរមិនដើរកម្សាន្តនៅក្នុងប្រទេសនោះទេ។ អ្នកស្រី ជា ម៉ូលិកា ដែលជាអ្នកគ្រប់គ្រងក្រុមហ៊ុនទេសចរណ៍ AVEERA បានពន្យល់ថារចនាសម្ព័ន្ធក្នុងស្រុកបានអនុញ្ញាតឲ្យពលរដ្ឋខ្មែរទូទៅអាចធ្វើដំណើរកម្សាន្តដោយខ្លួនឯង។ អ្នកស្រីបន្តថា ផ្លូវថ្នល់ សន្តិសុខ រមណីយដ្ឋាន និងកន្លែងស្នាក់នៅច្រើន សុទ្ធតែផ្តល់ភាពងាយស្រួលដល់ពលរដ្ឋខ្មែរ ធ្វើដំណើរកម្សាន្តជាលក្ខណៈឯកជន ទៅតាមពេលវេលាដែលពួកគេចង់បាន។
បើតាមការអះអាងរបស់អ្នកដឹកនាំក្រុមហ៊ុនទេសចរណ៍ដដែល ពលរដ្ឋកម្ពុជា ចាប់អារម្មណ៍ដើរកម្សាន្តនៅតំបន់ខាងជើង និងនៅប៉ែកឦសាន ក្នុងប្រទេសកម្ពុជា៕