ឥណ្ឌូណេស៊ី៖ សង្គ្រាមពាណិជ្ជកម្មអាមេរិក-ចិន គឺជាវិវាទដែលមិនអាចបញ្ឈប់បាន

អន្តរជាតិ

ឥណ្ឌូណេស៊ី៖ សង្គ្រាមពាណិជ្ជកម្មអាមេរិក-ចិន គឺជាវិវាទដែលមិនអាចបញ្ឈប់បាន

06, Oct 2018 , 9:59 pm

រូបភាព

ដោយ:

រដ្ឋាភិបាលក្រុងហ្សាការតា បានបង្ហាញពីក្តីបារម្ភពីការរីករាលដាលនៃសង្គ្រាមពាណិជ្ជកម្មរបស់ក្រុងវ៉ាស៊ីនតោន និងក្រុងប៉េកាំង។ ក្រុងហ្សាការតា បានក្រើនរម្លឹកដល់ប្រទេសពាក់ព័ន្ធនីមួយៗឲ្យមានការរៀបចំគោលនយោបាយសេដ្ឋកិច្ច-ពាណិជ្ជកម្មរយៈពេលវែងសម្រាប់ផលប៉ះពាល់នៃវិវាទពាណិជ្ជកម្មរបស់មហាអំណាចមួយនេះ។

រដ្ឋមន្ត្រីសម្របសម្រួលសេដ្ឋកិច្ចឥណ្ឌូណេស៊ី លោក Darmin Nasution នៅថ្ងៃ៥ តុលា បានលើកឡើងថាសង្គ្រាមពាណិជ្ជកម្មរវាងអាមេរិក និងចិន កំពុងតែធ្វើឲ្យសេដ្ឋកិច្ចពិភពលោកកាន់តែស្ថិតនៅក្នុងភាពមិនប្រាកដប្រជា ពិសេសនោះ ធ្វើឲ្យប៉ះពាល់ខ្លាំងដល់ប្រទេសមានសេដ្ឋកិច្ចអន់ថយស្រាប់នោះ។

តាមការចុះផ្សាយរបស់សារព័ត៌មាន Jakarta Post លោករដ្ឋមន្ត្រី សង្កត់ធ្ងន់ថា សង្គ្រាមពាណិជ្ជកម្ម កំពុងតែក្លាយជាបញ្ហាដែលមិនអាចបញ្ឈប់បាន ហើយតម្រូវឲ្យប្រទេសនីមួយៗ ត្រូវតែចាប់ផ្តើមអភិវឌ្ឍយុទ្ធសាស្ត្រសេដ្ឋកិច្ច-ពាណិជ្ជកម្មឲ្យបានច្បាស់លាស។ លោករដ្ឋមន្ត្រី ព្យាករថា ទោះទៅដល់ឆ្នាំ២០១៩ ក៏បញ្ហានេះ មិនមានការអន់ថយឡើយ។

លោក បានអះអាងថា ភាពមិនប្រាកដប្រជារបស់សេដ្ឋកិច្ចសកល នឹងបន្តកើតឡើង ដ្បិតសង្គ្រាមពាណិជ្ជកម្មរវាងមហាអំណាចទាំងពីរ ហាក់មិនមានសញ្ញាណបញ្ចប់សោះឡើយ។ សម្រាប់លោក ការប្រទាំងប្រទើសនេះ កាន់តែធ្ងន់ធ្ងរទៅៗ ដោយមិនត្រឹមតែជាបង្កើនពន្ធនាំចូលប៉ុណ្ណោះនោះទេ តែភាពចម្រូងចម្រាសនេះ ក៏កំពុងតែប៉ះពាល់ដល់ការបង្កើតកិច្ចព្រមព្រៀងពាណិជ្ជកម្មទៀតផង។

លោក ថ្លែងបែបនេះរួចហើយ ក៏បន្ទោសលើការដាក់គោលនយោបាយរបស់ប្រធានាធិបតីអាមេរិក លោក ដូណាល់ ត្រាំ ដែលជាអង្គហេតុសំខាន់ នៃសង្គ្រាមពាណិជ្ជកម្មមួយនេះ។ សម្រាប់ឥណ្ឌូណេស៊ី លោក អះអាងថា រដ្ឋាភិបាល កំពុងតែរៀបចំយុទ្ធសាស្ត្ររយៈពេលវែង សម្រាប់ការពារពីការជះឥទ្ធិពលពីការប៉ះទង្គិចរវាងមហាអំណាចសេដ្ឋកិច្ចទាំងពីរ។

សូមជម្រាបថា ចាប់ពីរដ្ឋបាលថ្មីរបស់ប្រធានាធិបតីអាមេរិក លោកដូណាល់ ត្រាំ កាន់អំណាចមក អាមេរិក ចាប់អនុវត្តគោលនយោបាយរឹតត្បិតទៅលើផលិតផលនាំចូល ដែលក្រុងវ៉ាស៊ីនតោន យល់ឃើញថា ជាកត្តាមួយធ្វើឲ្យមានឱនភាពពាណិជ្ជកម្ម និងធ្វើឲ្យផលិតផលក្នុងស្រុកធ្លាក់ចុះ។ ជាក់ស្តែងអាមេរិក បានដំឡើងពន្ធទៅលើផលិតផលចិនជាបន្តបន្ទាប់ ហើយចំណាត់នេះ ក៏ធ្វើឲ្យឥណ្ឌូណេស៊ី ដែលពីមុនទទួលបានលក្ខខណ្ឌអនុគ្រោះពន្ធ រងផលប៉ះពាល់ដូចគ្នាផងដែរ៕