អង់គ្លេស ត្រៀមផ្តល់ជំនួយគាំទ្រវៀតណាមកសាង «ទីក្រុងឆ្លាត»

អន្តរជាតិ

អង់គ្លេស ត្រៀមផ្តល់ជំនួយគាំទ្រវៀតណាមកសាង «ទីក្រុងឆ្លាត»

13, Oct 2018 , 9:59 am

រូបភាព

ដោយ:

រដ្ឋាភិបាលអង់គ្លេស បានសន្យាផ្តល់ជំនួយឥតសំណងដល់រដ្ឋាភិបាលវៀតណាមក្នុងការសាងសង់ទីក្រុងឆ្លាត។ ការណ៍ដែលអង់គ្លេស ចង់ផ្តល់ជំនួយដល់វៀតណាមបែបនេះ ដោយសារអង់គ្លេសផ្តល់សារៈសំខាន់លើទំនាក់ទំនង និងការអភិវឌ្ឍទេ្វភាគីរវាងប្រទេសទាំងពីរ។

បេសកជនពាណិជ្ជកម្មអង់គ្លេស លោក Edward Vaizey នៅថ្ងៃ៨ តុលាកន្លងទៅ បានប្រាប់ឧបនាយករដ្ឋមន្ត្រីវៀតណាម Vương Đình Huệ ថា អង់គ្លេសនឹងផ្តល់ជំនួយឥតសំណង ដែលជាមូលនិធិរបស់ប្រទេស Commonwealth ដើម្បីជួយជ្រៀមជ្រែងក្រសួងសាងសង់វៀតណាមក្នុងការកសាងគម្រោងសំណង់ និង ទីក្រុងឆ្លាត។ នេះបើយោងតាមការចុះផ្សាយរបស់សារព័ត៌មាន Vietnam News។

លោក Vaizey បានថ្លែងទៅកាន់ភាគីវៀតណាមថា អង់គ្លេសពិតជាចង់ជួយបង្កើនជំនាញពាក់ព័ន្ធសេដ្ឋកិច្ចដល់ពលរដ្ឋវៀតណាម ដើម្បីជួយដល់ប្រទេសវៀតណាមឲ្យកាន់តែមានភាពល្អប្រសើរទាំងតម្លាភាពរដ្ឋបាល និងចូលរួមអភិវឌ្ឍហេដ្ឋារចនាសម្ព័ន្ធវៀតណាមក្នុងការប្រើប្រាសប្រព័ន្ធបច្ចេកវិទ្យា។

ជុំវិញបញ្ហានៃការចាកចេញរបស់អង់គ្លេសពីសហភាពអឺរ៉ុប បេសកជនអង់គ្លេសដដែលនោះ ពន្យល់ថា នឹងមិនប៉ះពាល់ដល់ទំនាក់ទំនង ក៏ដូចជាផលប្រយោជន៍ពាណិជ្ជកម្មអង់គ្លេស និងវៀតណាមឡើយ។ លោក ថែមទាំងអះអាងថា អង់គ្លេស ក៏បានត្រៀមខ្លួនរួចជាស្រេចក្នុងការជំរុញទំនាក់ទំនងសហភាពអឺរ៉ុប និងវៀតណាមឲ្យកាន់តែជិតស្និទ្ធផងដែរ។

តបនឹងការសន្យាជួយកសាងវៀតណាមឲ្យកាន់តែមានលក្ខណៈប្រសើរផ្នែកបច្ចេកវិទ្យាក្នុងការគ្រប់គ្រងប្រទេស ភាគីវៀតណាម សន្យាជួយអង់គ្លេសវិញដើម្បីចូលរួមក្នុងកិច្ចព្រមព្រៀងពាណិជ្ជកម្មអន្តរប៉ាស៊ីហ្វិក ។ វៀតណាម ក៏ចង់ឃើញអង់គ្លេសបង្កើនការវិនិយោគ និងទំហំពាណិជ្ជកម្ម ជាពិសេសលើវិស័យហិរញ្ញវត្ថុ និងធនាគារ។

គួរកត់សម្គាល់នោះ រដ្ឋាភិបាលក្រុងហាណូយ ក៏បានអះអាងថា ក្រសួង និងភា្នក់ងាររបស់វៀតណាម ក៏បានត្រៀមក្នុងការជួយសម្រួលលើផលលំបាកដែលអ្នកវិនិយោគអង់គ្លេសកំពុងតែប្រឈមក្នុងការវិនិយោគនៅក្នុងប្រទេសវៀតណាមផងដែរ៕