ប្រធានាធិបតីចាញ់ឆ្នោតម៉ាល់ឌីវ អាចនឹងរងទណ្ឌកម្ម បើមិនព្រមផ្ទេរអំណាចដោយសន្តិវិធី

អន្តរជាតិ

ប្រធានាធិបតីចាញ់ឆ្នោតម៉ាល់ឌីវ អាចនឹងរងទណ្ឌកម្ម បើមិនព្រមផ្ទេរអំណាចដោយសន្តិវិធី

15, Oct 2018 , 4:52 pm

រូបភាព

ដោយ: សៅ ផលនិស្ស័យ (Sao Phal Niseiy)

ស្ថានការណ៍នយោបាយម៉ាល់ឌីវ ត្រឡប់ទៅរកស្ថានភាពច្របូកច្របល់ជាថ្មី បន្ទាប់ពីប្រធានាធិបតីចាញ់ឆ្នោតដាក់បណ្តឹងទៅតុលាការកំពូលដើម្បីតវ៉ារឿងលទ្ធផលបោះឆ្នោតប្រធានាធិបតីកាលពីខែមុននោះ។ អ្នកគាំទ្រប្រធានាធិបតីឈ្នះឆ្នោតបានចេញមុខបាតុកម្ម និងទាមទារឲ្យមានការចាប់ខ្លួនមេដឹកនាំចាញ់ឆ្នោតតែមិនព្រមផ្ទេរអំណាចនេះដែរ។ចំណែកសហគមន៍អន្តរជាតិវិញនោះបានព្រមានដាក់ទណ្ឌកម្ម បើសិនជាតុលាការកំពូលអាចនឹងចេញសេចក្តីសម្រេចទាត់ចោលលទ្ធផលបោះឆ្នោតមែនដោយរារាំងការផ្ទេរអំណាចមែននោះ។

កោះម៉ាល់ឌីវធ្លាក់ចូលក្នុងវិបត្តិយោបាយជាថ្មីម្តងទៀតកាលពីសប្តាហ៍មុន នៅពេលដែលមេដឹកនាំផ្តាច់ការ និងជាប្រធានាធិបតីចាញ់ឆ្នោត Abdulla Yameen បានដាក់ពាក្យប្តឹងទៅតុលាការកំពូលដោយបដិសេធលទ្ធផលបោះឆ្នោតកាលពីថ្ងៃ ២៣ ខែកញ្ញា។ នេះជាលេសថ្មីមួយរបស់មេដឹកនាំរូបនេះក្នុងការបដិសេធផ្ទេរអំណាចឲ្យមេដឹកនាំថ្មីលោក Ibrahim Mohamed Solih ដែលមកពីបក្សប្រជាធិបតេយ្យម៉ាល់ឌីវ (MDP)។

បើតាមទីភ្នាក់ងារព័ត៌មាន AFP ដែលស្រង់សម្តីមេធាវីតំណាងប្រធានាធិបតីចាញ់ឆ្នោត ការឈានដល់ទាមទារឲ្យតុលាការកំពូលពិនិត្យ និងសម្រេចលទ្ធផលបោះឆ្នោតជាថ្មីនេះ គឺដោយសារវាមានការតវ៉ា និងចោទប្រកាន់ពីភាពមិនប្រក្រតីជុំវិញទឹកថ្នាំ និងសន្លឹកឆ្នោត។ តុលាការនេះបានបើកសវនាការស្តាប់បណ្តឹងរបស់លោក Yameen កាលពីថ្ងៃអាទិត្យទី ១៤ តុលា ហើយស្ថាប័នយុត្តាធិការកំពូលនេះអាចនឹងចេញសម្រេចរបស់ខ្លួននៅពេលឆាប់ៗដែរ។

ប៉ុន្តែការបោះឆ្នោតកន្លងមកដែលបេក្ខជនបក្សប្រឆាំងឈ្នះឆ្នោតនេះ មិនមានការរិះគន់ ឬថ្កោលទោសណាមួយពីសហគមន៍អន្តរជាតិឡើយ។ ផ្ទុយទៅវិញ គណៈកម្មការរៀបចំការបោះឆ្នោតបានប្រកាសថា ការបោះឆ្នោតប្រព្រឹត្តទៅដោយរលូន ត្រឹមត្រូវ និងយុត្តិធម៌ ហើយសហគមន៍អន្តរជាតិជាពិសេសអាមេរិក និងអឺរ៉ុបសាទរការបោះឆ្នោតនេះថែមទៀត។

លោក Yameen ខ្លួនឯងបានទទួលស្គាល់លទ្ធផល និងប្រកាសពីភាពបរាជ័យរបស់ខ្លួនរួចទៅហើយចុងខែមុន ហើយមេដឹកនាំរូបនេះក៏បានសាទរមេដឹកនាំប្សប្រឆាំងលោក Mahamed Solih ដែលឈ្នះលោកដល់ ១៦,៨ភាគរយដែរ។

តាមច្បាប់ លោក Yameen ត្រូវផ្ទេរអំណាចទៅឲ្យលោក Mahamed Salih នៅត្រឹមថ្ងៃ ១៧ ខែវិច្ឆិកា ប៉ុន្តែសម្រេចចិត្តរបស់តុលាការកំពូលនៅពេលខាងមុខលើលទ្ធផលបោះឆ្នោតនេះអាចនឹងបង្កឲ្យមានបញ្ហាដែរ។ គេបារម្ភថា តុលាការអាចនឹងទាត់ចោលលទ្ធផលបោះឆ្នោតដើម្បីបំពេញចិត្តមេដឹកនាំផ្តាច់ការ Yameen នេះ ប៉ុន្តែម៉ាល់ឌីវនឹងត្រូវប្រឈមទណ្ឌកម្មសហគមន៍អន្តរជាតិ។

សហរដ្ឋអាមេរិកផ្ញើសារព្រមានធ្ងន់ៗមុនគេថា រាល់ការបរាជ័យក្នុងការផ្ទេរអំណាចដោយសន្តិវិធី នឹងបង្ខំឲ្យអាមេរិកចាត់វិធានការចាំបាច់តបតវិញភ្លាម។

«អាមេរិកបារម្ភពីសកម្មភាពបង្កបញ្ហាដោយរដ្ឋាភិបាល Yameen ដែលគំរាមកំហែងដល់ឆន្ទៈប្រជាជនម៉ាល់ឌីវ ហើយអាមេរិកនឹងពិចារណាវិធានការចាំបាច់ប្រឆាំងរាល់បុគ្គលដែលធ្វើឲ្យប៉ះពាល់ដល់ការផ្ទេរអំណាចដោយសន្តិវិធីនីម៉ាល់ឌីវ»។ នេះជាការបញ្ជាក់របស់អ្នកនាំពាក្យក្រសួងការបរទេសអាមេរិក Robert Palladino។

ដោយឡែកសកម្មភាពឯកតោភាគីដោយប្តឹងតុលាការឲ្យពិនិត្យលទ្ធផលបោះឆ្នោតនេះ ធ្វើឲ្យបក្សប្រឆាំង និងអ្នកគាំទ្ររបស់ខ្លួនខឹងសម្បារ និងនាំគ្នាបាតុកម្មតវ៉ាផងដែរ។ អ្នកនាំពាក្យបក្សប្រជាធិបតេយ្យម៉ាល់ឌីវដែលមានទីស្នាក់ការនៅរដ្ឋធានីកូឡុំបូប្រទេសស្រីលង្កា Hamid Abdul Ghafoor បានអះអាងថា លោក Yameen កំពុងព្យាយាមបង្កើតភាពចលាចលក្នុងប្រទេស ហើយលោកក៏បានស្នើឲ្យប្រធានាធិបតីចាញ់ឆ្នោតដកពាក្យបណ្តឹង និងផ្ទេរអំណាចដោយស្ម័គ្រចិត្តដែរ។

ចំណែកបាតុករដែលជាសមាជិកបក្សប្រឆាំងក៏បាននាំគ្នាទាមទារឲ្យមានការចាប់ខ្លួនមេដឹកនាំចាញ់ឆ្នោតផងដែរ ដោយសម្អាងថា អ្នកនយោបាយនេះមានចេតនាបង្កើតបញ្ហា និងបង្កភាពចលាចលដើម្បីរក្សាអំណាចក្នុងដៃ។

តាមពិតទៅ ក្រោមការដឹកនាំរបស់លោក Yameen ពីឆ្នាំ ២០១៣ មកនោះ រាល់អ្នកប្រឆាំងលោកទាំងអស់ត្រូវប្រឈមការចាប់ខ្លួន ហើយបើមិនដូច្នេះទេពួកគេក៏ត្រូវនិរទេសខ្លួនទៅបរទេសដែរ។ ហើយវិបត្តិនយោបាយធ្ងន់ធ្ងរនៃកោះម៉ាល់ឌីវនេះបានកើតឡើងចាប់ពីខែកុម្ភៈកន្លងមក ដោយមានការប្រកាសដាក់រដ្ឋក្នុងស្ថានភាពអាសន្នដោយប្រធានាធិបតីចាញ់ឆ្នោតលោក Yameen។ រដ្ឋាភិបាលម៉ាល់ឌីវនេះនេះបានព្យួរដំណើរការតុលាការកំពូល សភា និងការអនុវត្តរដ្ឋធម្មនុញ្ញផង ស្របពេលដែលមានការបង្ក្រាប និង ចាប់ខ្លួនអ្នកប្រឆាំងផងដែរ។

ក្នុងពេលប្រកាសដាក់រដ្ឋក្នុងភាពអាសន្ននៅខែកុម្ភៈ ក្រៅពីចាប់ខ្លួនក្រុមប្រឆាំង លោក Yameen ក៏បានចាប់ខ្លួនប្រធាន និងចៅក្រមតុលាការកំពូលមួយរូបដែរ ដោយចោទប្រកាន់ថា ពួកគេព្យាយាមទម្លាក់លោកពីតំណែង។ ក្រោយមក លោក Yameen បានចេញបញ្ជាឲ្យតុលាការកំពូលដំណើរការឡើងវិញដោយនៅសល់តែចៅក្រមបីរូបប៉ុណ្ណោះ។ ដូច្នេះហើយភាគរយច្រើនណាស់ដែលតុលាការនេះនឹងអាចចេញសេចក្តីសម្រេចដែលលម្អៀងទៅរកលោក Yameen៕