អន្តរជាតិ
អូស្ត្រាលី, អាមេរិក ពង្រាយទ័ព, យន្តហោះ នាវាចម្បាំងទៅរក្សាសន្តិសុខកិច្ចប្រជុំ APEC នៅប៉ាពូអាស៊ី នូវែលហ្គីណេ
×![]()
កោះប៉ាស៊ីហ្វិក «ប៉ាពូអាស៊ី នូវែលហ្គីណេ» នឹងអនុញ្ញាតឲ្យមានការពង្រាយយន្តហោះចម្បាំង និងកងកម្លាំងពិសេសពីអូស្ត្រាលី និងអាមេរិកនៅក្នុងទឹកដីរបស់ខ្លួនដើម្បីធានាសុវត្ថិភាពមេដឹកនាំពិភពលោកដែលចូលរួមកិច្ចប្រជុំកំពូលកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) នាខែក្រោយ។ សន្តិសុខជាបញ្ហាប្រឈមធំសម្រាប់ប្រទេសនេះ ដោយសាររដ្ឋក្រីក្រនេះបន្តរងការគំរាមកំហែងពីបញ្ហាឧក្រិដ្ឋកម្ម ហិង្សាប្រដាប់អាវុធ និងការគំរាមកំហែងភេរវកម្មជាដើម។ 
ជាម្ចាស់ផ្ទះរៀបចំកិច្ចប្រជុំកំពូលកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក ប៉ាពូអាស៊ី នូវែលហ្គីណេ កំពុងប្រឈមបញ្ហាច្រើនទាំងកង្វះខាតហេដ្ឋារចនាសម្ព័ន្ធ មធ្យោបាយធ្វើដំណើរ ទីកន្លែងស្នាក់នៅសម្រាប់ប្រតិភូ និងលទ្ធភាពរក្សាសន្តិសុខផង។
បើតាមការចុះផ្សាយរបស់ទីភ្នាក់ងារព័ត៌មាន AFP រដ្ឋាភិបាលកោះប៉ាស៊ីហ្វិនេះអនុញ្ញាតឲ្យមានការពង្រាយយន្តហោះចម្បាំង រួមទាំងកងកម្លាំងពិសេសរបស់អូស្ត្រាលី និងសហរដ្ឋអាមេរិកក្នុងរដ្ឋធានី Port Moresby ដើម្បីធានាសុវត្ថិភាពនិងសន្តិសុខនៃកិច្ចប្រជុំចាប់ពីថ្ងៃ ១៧ ខែវិច្ឆិកាខាងមុខ។
សន្តិសុខជារឿងសំខាន់បំផុតសម្រាប់ប៉ាពូអាស៊ី នូវែលហ្គីណេ ដោយសារកិច្ចប្រជុំនេះនឹងមានមេដឹកនាំនិងប្រតិភូតំណាងភាគីសមាជិកទាំង ២១ នៃកិច្ចសហប្រតិបត្តិការ APEC មកចូលរួមក្នុងនោះមានប្រធានាធិបតីចិន ស៊ី ជិនភីង និងអនុប្រធានាធិបតីអាមេរិកលោក ម៉ៃ ផេន ផងដែរ។ អនុប្រធានាធិបតីអាមេរិករូបនេះទំនងជាមិនស្នាក់នៅប៉ាពូអាស៊ី នូវែលហ្គីណេឡើយ ដោយលោកទៅសម្រាកនៅអូស្ត្រាលីវិញ។
ការបង្កើនការការពារសន្តិសុខប្រឈមភាពលំបាក និងស្មុគស្មាញខ្លាំងដោយ ប៉ាពូអាស៊ី នូវែលហ្គីណេ មិនមានសណ្ឋាគារគ្រប់គ្រាន់សម្រាប់ប្រតិភូបរទេសប្រហែល ១៥០០០នាក់ដែលមកចូលរួមប្រជុំឡើយ។ ដូច្នេះពួកគេនឹងត្រូវស្នាក់នៅលើនាវាធំៗចំនួនបីគ្រឿងនៅក្បែរកំពង់ផែនៃទីតាំងរៀបចំកិច្ចប្រជុំផង។
ជារួមការគំរាមកំហែងដែលបង្កឡើងដោយក្រុមភេរវជននៅប៉ាពូអាស៊ី នូវែលហ្គីណេ នៅមានកម្រិតទាបនៅឡើយ ប៉ុន្តែកោះនេះប្រឈមនឹងអសន្តិសុខ គ្មានសណ្តាប់ធ្នាប់ និងសម្បូរដោយអំពើហិង្សា និងឧក្រិដ្ឋកម្ម។ ដូចឃើញស្រាប់ តាមរបាយការណ៍ទីក្រុងដែលរស់នៅបានក្នុងពិភពលោកចងក្រងដោយ Economist Intelligence Unit ក្នុងឆ្នាំ ២០១៨ នេះ រដ្ឋធានី Port Moresby ស្ថិតនៅលេខរៀងទី១៣០ ក្នុងចំណោមប្រទេស ១៤០។
រដ្ឋមន្ត្រីទទួលបន្ទុករៀបចំកិច្ចប្រជុំលោក Justin Tkatchenko បានទទួលស្គាល់ថាការរៀបចំកិច្ចប្រជុំជារឿងលំបាកបំផុតមួយព្រោះខ្លួនមិនធ្លាប់រៀបចំ និងទទួលមេដឹកនាំបរទេសច្រើនបែបនេះទេ ប៉ុន្តែ លោកជឿជាក់ថា វាមានសារសំខាន់ខ្លាំងណាស់ក្នុងការលើកកម្ពស់សេដ្ឋកិច្ចជាតិ។
ដើម្បីធានាសុវត្ថិភាព និងសន្តិសុខក្នុងពេលប្រជុំ រដ្ឋមន្ត្រីរូបនេះបានបង្ហើបថា រដ្ឋាភិបាលអូស្ត្រាលីបានផ្តល់ការគាំទ្រសន្តិសុខតាមរយៈការពង្រាយកងកម្លាំងយោធា និងកងកម្លាំងពិសេស ១៥០០នាក់មកកាន់រដ្ឋធានី Port Moresby និងនាវាចម្បាំងជាច្រើនគ្រឿងទៅការពារនាវាដែលប្រតិភូស្នាក់នៅ។ ក្រៅពីនេះ អូស្ត្រាលីក៏ត្រៀមពង្រាយយន្តហោះចម្បាំង F-18 ជាច្រើនគ្រឿង រួមជាមួយយន្តហោះឈ្លបយកការណ៍ផងទៅល្បាតពីលើទីតាំងនៃកិច្ចប្រជុំផងដែរ។
ដោយឡែកខាង រដ្ឋាភិបាលអាមេរិកវិញ នឹងពង្រាយក្រុមកងឆ្មាំសមុទ្រ (US Coast Guard) ទៅធានាសន្តិសុខនៅរដ្ឋធានីនេះក្នុងអំឡុងពេលនៃកិច្ចប្រជុំដូចគ្នា។ ប៉ុន្តែគេមិនដឹងថា ចំនួនកងទ័ពដែលអាមេរិកបញ្ជូនទៅនោះមានប៉ុន្មាននាក់ឡើយ។
ក្រៅពីអនុញ្ញាតឲ្យកងទ័ព និងយន្តហោះចម្បាំងបរទេសអន្តរាគមន៍រក្សាសន្តិសុខសុខ ប៉ាពូអាស៊ី នូវែលហ្គីណេ ក៏បានអនុម័តច្បាប់ដែលអនុញ្ញាតឲ្យកងម្លាំងសន្តិសុខបរទេសទាំងនោះប្រើប្រាស់អាវុធ បើសិនចាំបាច់ដើម្បីទប់ទល់នឹងការគំរាមកំហែងសន្តិសុខដែលកើតឡើងក្នុងពេលប្រជុំ។
យ៉ាងណាក៏ដោយ ការរៀបចំកិច្ចប្រជុំតំបន់ទ្រង់ទ្រាយធំនេះមិនមែនជារឿងដែលប្រជាជនប៉ាពូអាស៊ី នូវែលហ្គីណេគ្រប់គ្នាពេញចិត្តឡើយ។ កាលពីថ្មីៗនេះ គេឃើញមានប្រតិកម្មខ្លាំងចំពោះការបញ្ជាទិញរថយន្តទំនើបពីអ៊ីតាលីចំនួន ៤០គ្រឿងដែលមួយគ្រឿងមានតម្លៃប្រហែល ១៥ម៉ឺនដុល្លារដើម្បីដឹកប្រតិភូបរទេសនោះ ខណៈដែលប្រទេសជាតិហ៊ុមព័ទ្ធដោយភាពក្រីក្រ និងអលទ្ធភាពក្នុងការដោះស្រាយបញ្ហាសុខាភិបាលសាធារណៈផង។
ប្រជាជនប៉ាពូអាស៊ីនូវែលហ្គីណេយ៉ាងហោចណាស់មួយភាគបីក្នុងចំណោមប្រជាជន៨,៥លាននាក់រស់នៅក្រោមបន្ទាត់នៃភាពក្រីក្រ ហើយបញ្ហាអសន្តិសុខ រំលោភ ហិង្សានយោបាយ ជម្លោះពូជសាសន៍ក្នុងចំណោមប្រជាជន បន្តកើតមានឡើង។ ឧទាហរណ៍ ក្រុមជើងកាងនៅតាមផ្លូវមានឈ្មោះថា Raskols នោះបន្តប្លន់ឡានជាញឹកញាប់ទៀត។
Tag:
ប៉ាពូអាស៊ី នូវែលហ្គីណេ
អាមេរិក
APEC
អូស្ត្រាលី
© រក្សាសិទ្ធិដោយ thmeythmey.com
