ភ្នំពេញ៖ រដ្ឋាភិបាល បានចំណាយថវិកាជាង១៦០លានដុល្លារ សម្រាប់គម្រោងមូលនិធិឃុំ-សង្កាត់ ក្នុងរយៈពេល៥ឆ្នាំ ពោលគឺចាប់ពីឆ្នាំ២០១៣ដល់ឆ្នាំ២០១៧។ នេះបើតាមរបាយការណ៍សមិទ្ធផលរបស់ក្រសួងមហាផ្ទៃ។
តាមរយៈការងារវិមជ្ឈការ និងវិសហមជ្ឈការនេះ រដ្ឋាភិបាល បានចំណាយថវិកា ៦៩០,៥៤០,០០០, ០០០ រៀល (ជាង១៦៨លានដុល្លារអាមេរិក) សម្រាប់អនុវត្តគម្រោងមូលនិធិឃុំ-សង្កាត់ ៨,៦៨៥គម្រោង ។ ថវិកាទាំងនេះ ផ្ដោតលើគម្រោងហេដ្ឋារចនាសម្ព័ន្ធខ្នាតតូច គម្រោងសេវាសង្គម និងការផ្ដល់ជូនប្រជាពលរដ្ឋនៅក្នុងមូលដ្ឋានឃុំ-សង្កាត់របស់ខ្លួន ដើម្បីចូលរួមចំណែកកាត់បន្ថយភាពក្រីក្រ។
របាយការណ៍ បានបន្ថែមថា គម្រោងមូលនិធិក្រុង-ស្រុក មានចំនួន១,០៧១គម្រោង ដែលចំណាយថវិកា ១១៤,០៣៤,០០០,០០០រៀល (ជាង២,៧លានដុល្លារ) សម្រាប់ការអនុវត្តផ្នែកហេដ្ឋារចនាសម្ព័ន្ធខ្នាតមធ្យម គម្រោងសេវាសង្គម និងការផ្ដល់សេវាសាធារណៈ ជូនប្រជាពលរដ្ឋនៅក្នុងមូលដ្ឋានក្រុង-ស្រុករបស់ខ្លួន។
បន្ថែមពីនេះក្រសួងមហាផ្ទៃ បានសម្រេចផ្ដល់អនុលោមភាពលើគម្រោងអភិវឌ្ឍរាជធានី ខេត្ត បានចំនួន១,២០៤គម្រោង ដែលមានទឹកប្រាក់សរុប ១,៨២៣,៧៨៤,៧៨៨,០០០ រៀល (ជាង៤៤៦លានដុល្លារអាមេរិក) សម្រាប់គម្រោងហេដ្ឋារចនាសម្ព័ន្ធ និងសេវាសង្គម ដែលសំដៅលើការកាត់បន្ថយភាពក្រីក្ររបស់ប្រជាពលរដ្ឋ។
ក្រៅពីនេះរដ្ឋាភិបាល ក៏ទទួលបានចំណូលជាង១១លានដុល្លារ ពីការផ្ដល់សេវារបស់ការិយាល័យច្រកចេញចូលតែមួយ។ ការិយាល័យច្រកចេញចូលតែមួយនៅតាមរដ្ឋបាលទូទាំងប្រទេស មាន៤៦គោលដៅ បានផ្ដល់សេវាជូនប្រជាពលរដ្ឋសរុប ១,៨៦៥,១៩៩ សេវា និងទទួលបានចំណូលសរុប៤៥,៤២១,៨០០,០០០រៀល ស្មើនឹង១១,៣៥៥,៤៥០ ដុល្លារអាមេរិក។ នេះបើតាមរបាយការណ៍ក្រសួងមហាផ្ទៃ។
កន្លងមករដ្ឋាភិបាល បានផ្ទេរមុខងារ និងធនធានពីក្រសួង ស្ថាប័នថ្នាក់ជាតិទៅឲ្យរដ្ឋបាលថ្នាក់ក្រោមជាតិ ក្នុងការអនុវត្តកំណែទម្រង់វិមជ្ឈការ និងវិសហមជ្ឈការ សម្រាប់ការទទួលខុសត្រូវយ៉ាងសំខាន់ ក្នុងការផ្ដល់សេវាសាធារណៈ និងការអភិវឌ្ឍសេដ្ឋកិច្ចមូលដ្ឋានប្រកបដោយប្រសិទ្ធភាព និងគណេយ្យភាព។
គិតត្រឹមឆ្នាំ២០១៧ ការអនុវត្តកម្មវិធីកំណែទម្រង់វិមជ្ឈការ និងវិសហមជ្ឈការមានក្រសួងចំនួ១៤ ដែលបានធ្វើការពិនិត្យមុខងាររបស់ខ្លួន និងបានផ្ទេរទៅរដ្ឋបាលថ្នាក់ក្រោមជាតិ។ នេះជាការបញ្ជាក់របស់ក្រសួងមហាផ្ទៃ៕