លោក សុខ ទូច៖ ព្រះសង្ឃប្រព្រឹត្តអំពើខុសវិន័យ ព្រោះមិនរៀនសូត្រត្រឹមត្រូវ

ជាតិ

សង្គមជាតិ

លោក សុខ ទូច៖ ព្រះសង្ឃប្រព្រឹត្តអំពើខុសវិន័យ ព្រោះមិនរៀនសូត្រត្រឹមត្រូវ

19, Oct 2018 , 11:39 pm

រូបភាព

ដោយ:

ភ្នំពេញ៖ នៅក្នុងសាលាសិក្ខាស្តីពី «ការពង្រឹងវិស័យសង្ឃ» លោក សុខ ទូច ប្រធានរាជបណ្ឌិត្យសភាកម្ពុជា និងជាសាស្ត្រាចារ្យវិទ្យាសាស្ត្រនយោបាយនៅសកលវិទ្យាល័យខេមរៈ បានលើកឡើងថា ព្រះសង្ឃដែលប្រព្រឹត្តខុសពីវិន័យព្រះពុទ្ធសាសនា ភាគច្រើនជាអ្នកបួសដែលមិនមានការរៀនសូត្រពីវិន័យព្រះពុទ្ធសាសនាត្រឹមត្រូវ។

សូមស្តាប់ការបកស្រាយរបស់លោក សុខ ទូច៖

ថ្លែងប្រាប់ក្រុមអ្នកសារព័ត៌មាន លោក សុខ ទូច បានបញ្ជាក់ថា ស្ថានភាពក្នុងវត្តអារាម មិនទាន់មានស្ថានភាពល្អប្រសើរឡើយ។ លោក បន្តថា ការប្រព្រឹត្តខុសរបស់ព្រះសង្ឃក្នុងព្រះពុទ្ធសាសនា ដោយសារតែមិនយល់ពីព្រះវិន័យ។

ប្រធានរាជបណ្ឌិត្យសភាកម្ពុជា បញ្ជាក់បែបនេះថា៖«ការពិត នៅក្នុងវត្ត គេមានច្បាប់ត្រឹមត្រូវ ហើយដើរតាមធម៌ព្រះពុទ្ធ។ ខ្ញុំជឿជាក់ថា ខ្លាំងជាងរដ្ឋធម្មនុញ្ញទៅទៀត។ យើងឃើញថាវត្តនៅកម្ពុជាមានច្រើន ហើយអ្នកបួសក៏ច្រើន ប៉ុន្តែគ្រាន់តែអ្នកបួសខ្លះមានភាពវ័យក្មេង ដែលព្រះអង្គមិនទាន់ចេះលាងដៃផង ទៅបួស ហើយទន្ទេញធម៌ផង ទោះបីព្រះអង្គចេះក៏ព្រះអង្គពិបាកយល់ដែរ»។

លោក សុខ ទូច បន្ថែមថា៖«ខ្ញុំបានចុះស្រាវជ្រាវលើវត្តមួយ ហើយឃើញមានកូននេនជាង២០០អង្គ កំពុងតែលេងហ្គេម ហើយដល់ម៉ោងបិណ្ឌបាត ក៏នាំគ្នាទៅបិណ្ឌបាត។ ដូច្នេះក្នុងនាមជាពុទ្ធបរិស័ទក៏ត្រូវមានតួនាទីធ្វើការកែតម្រូវ នូវអំពើខុសឆ្គងរបស់ព្រះសង្ឃដែរ»។

លោក អះអាងទៀត ដើម្បីឲ្យចំណុះជើងវត្ត និងពុទ្ធបរិស័ទ យល់ពីព្រះពុទ្ធសាសនា វត្តអារាម គួរតែត្រូវរៀបចំឲ្យមានការបណ្តុះបណ្តាលវិជ្ជាជីវៈ និងត្រូវមានបង្រៀនអំពីព្រះពុទ្ធសាសនា ដើម្បីឲ្យគេយល់ដឹងពីព្រះពុទ្ធសាសនា។ លោក លើកឡើងថា លោក មិនអាចចាត់វិធានការលើរឿងដែលព្រះសង្ឃបានប្រព្រឹត្តខុសនោះទេ មានតែទុកតួនាទីនេះទៅខាងក្រសួងធម្មការ និងសាសនាជាអ្នកចាត់ចែងទៅចុះ។

សូមបញ្ជាក់ថា បច្ចុប្បន្នប្រទេសកម្ពុជាមានវត្តអារាមចំនួនជិត៥ពាន់ និងមានព្រះសង្ឃជាង៦,៦ម៉ឺនអង្គ៕