ជាតិ
×![]()
ភ្នំពេញ៖ ផ្នែកសិទ្ធិមនុស្សនៅកម្ពុជា មានការរីកចម្រើន គួរឲ្យកត់សម្គាល់។ នេះជាការលើកឡើងរបស់លោកស្រី មីសែល បាសែឡែត (Michelle Bachelet) តំណាងឧត្តមស្នងការអង្គការសហប្រជាជាតិ ទទួលបន្ទុកផ្នែកសិទ្ធិមនុស្ស ក្នុងជំនួបសម្ដេចនាយករដ្ឋមន្ត្រី ហ៊ុន សែន នៅប្រទេសស្វ៊ីស កាលពីថ្ងៃទី២២ ខែតុលា។
លោកស្រី មីសែល បាសែឡែត បាននិយាយថា ការរីកចម្រើនរបស់កម្ពុជា លើវិស័យសិទ្ធមនុស្ស ពិសេសសិទ្ធស្ត្រី កុមារ កម្មករ កម្មការិនី អប់រំ និងការមិនរើសអើង។ តាមរយៈចំណុចល្អៗ ដែលតំណាងឧត្តមស្នងការអង្គការសហប្រជាជាតិ ទទួលបន្ទុកផ្នែកសិទ្ធិមនុស្ស បានមើលឃើញនេះ លោកស្រី នឹងបញ្ចូលទៅក្នុងរបាយការណ៍របស់ឧត្តមស្នងការសិទ្ធិមនុស្សស្ដីពីកម្ពុជា។ លោកស្រីបានសង្កត់ធ្ងន់ថា អ្វីដែលឧត្តមស្នងការសិទ្ធិមនុស្សអាចជួយបានគឺ «ការបន្តសហការ និងផ្ដល់នូវការគាំទ្រដល់ប្រទេសកម្ពុជា»។
ហ្វេសប៊ុកសម្ដេច ហ៊ុន សែន បានស្រង់លោកស្រី មីសែល ដូច្នេះថា ៖«បើទោះជាប្រទេសទាំងអស់មានការរីកចម្រើនយ៉ាងណា ក៏នៅមានបញ្ហាប្រឈមនឹងចំណុចផ្សេងៗដែរ»។
បើទោះជាមានគោលជំហរខុសគ្នា ប៉ុន្តែកិច្ចសហប្រតិបត្តិការរវាងកម្ពុជា ជាមួយអង្គការសហប្រជាជាតិ ទៅលើបញ្ហាសិទ្ធិមនុស្ស នៅតែបន្តទៅមុខទៀត ។ នេះជាការឆ្លើយតបរបស់សម្ដេច ហ៊ុន សែន ដែលបានរំឭកពីការបន្តអាណត្តិ២ឆ្នាំទៀត សម្រាប់ការិយាល័យសិទ្ធិមនុស្សប្រចាំកម្ពុជា។
ជាមួយគ្នានេះសម្ដេច ហ៊ុន សែន បានស្នើឲ្យមានកិច្ចសហប្រតិបត្តិការ លើបញ្ហាសិទ្ធិមនុស្សរវាងអង្គការសហប្រជាជាតិ និងកម្ពុជា ដើម្បីធ្វើយ៉ាងណា ឲ្យមានការយល់គ្នាច្បាស់ មុននឹងវាយតម្លៃ ពោលគឺកុំឲ្យមានការវាយតម្លៃ ទាំងមិនបានសហការគ្នា និងនិយាយគ្នាជាមុននោះ៕
Tag:
សិទ្ធិមនុស្ស.UN
© រក្សាសិទ្ធិដោយ thmeythmey.com
