ក្រុមកីឡាករបាល់ទាត់សិស្សវិទ្យាល័យជប៉ុន១៥រូប និងថ្នាក់ដឹកនាំ៣រូប ដែលជាសមាជិករបស់សមាគម JFA Academy ប្រចាំខេត្តហ្វូគឺស៊ីមា មកទស្សនកិច្ចរយៈពេល១សប្តាហ៍នៅកម្ពុជា។ ក្រុមកីឡាករជប៉ុន នឹងប្រកួតមិត្តភាពជាមួយក្រុម U18 កម្ពុជា និងក្រុមវិសាខានៅពហុកីឡដ្ឋានជាតិ ដើម្បីរឹតចំណងសាមគ្គីភាព និងអបអរខួប៦៥ឆ្នាំនៃទំនាក់ទំនងរវាងប្រទេសទាំងពីរ។
ក្រុមកីឡាករបាល់ទាត់សមាជិក JFA Academy របស់ជប៉ុន នឹងប្រកួតមិត្តភាពអន្តរជាតិជាមួយក្រុមជម្រើសជាតិអាយុក្រោម១៨ឆ្នាំកម្ពុជានៅម៉ោង៥រសៀលថ្ងៃទី៣១ ខែតុលា ឆ្នាំ២០១៨ នាពហុកីឡដ្ឋានជាតិ។ បន្ទាប់មកពួកគេបន្តជួបជាមួយក្រុមវិសាខានាជំនួបទី២នៅថ្ងៃទី២ ខែវិច្ឆិកា ឆ្នាំ២០១៨ ម៉ោង៥រសៀលនៅពហុកីឡដ្ឋានជាតិដូចគ្នា។
ស្ថានទូតជប៉ុនប្រចាំនៅកម្ពុជារំពឹងថា តាមរយៈការប្រកួតមិត្តភាពអន្តរជាតិនេះ នឹងជួយរឹតចំណងសាមគ្គីភាពឲ្យតែជិតស្និទ្ធរវាងប្រជាជននៃប្រទេសទាំងពីរ ពិសេសយុវជនជប៉ុននិងកម្ពុជា។ ក្រៅពីផ្លាស់ប្តូរបទពិសោធគ្នាទៅវិញទៅមក ការប្រកួតនេះ រៀបចំឡើងដើម្បីអបអរខួប៦៥ឆ្នាំនៃទំនាក់ទំនងការទូតរវាងប្រទេសទាំងពីរ។
ការប្រកួតខាងលើធ្វើឡើងក្នុងអំឡុងពេលក្រុមកីឡាករ និងថ្នាក់ដឹកនាំកីឡារបស់ជប៉ុន មកបំពេញទស្សនកិច្ចនៅកម្ពុជាចន្លោះពីថ្ងៃទី២៩ ខែតុលា ដល់ថ្ងៃទី៥ ខែវិច្ឆិកា ឆ្នាំ២០១៨។ ដំណើរទស្សនកិច្ចនេះធ្វើឡើងក្រោមគម្រោងបណ្តាញផ្លាស់ប្តូរសិស្ស និស្សិត និងយុវជនរវាងប្រទេសជប៉ុននិងបណ្តាប្រទេសអាស៊ីខាងកើត ដែលហៅកាត់ថា JENESYS 2018។
JENESYS ត្រូវបានបង្កើតឡើងដោយក្រសួងការបរទេសជប៉ុន ដើម្បីជំរុញការយល់ដឹង និងកសាងទំនុកចិត្តរវាងប្រជាជនជប៉ុនជាមួយបណ្តាប្រទេសជាសមាជិក ពិសេសកសាងមូលដ្ឋានគ្រឹះនៃកិច្ចសហប្រតិបត្តិការ និងចំណងមិត្តភាពនាពេលអនាគត។
កីឡាករជប៉ុនទាំង១៥រូបជប៉ុនរួមមាន Yoshida Kenjiro, Furuzono Takumi, Oshima Yuto, Yoshida Takeru, Obi Jay-Z Ogenna, Kokubo Kyo, Takeuchi Shuto, Shimafuji Yuki, Kubo Ryusei, Sasagawa Naruse, Mito Shunsuke, Hashimoto Yuga, Nagata(Backhaus)Yuri, Ichimura Shunsei និងកីឡាករ Kawata Keisuke៕