ព្រះមហាក្សត្រតែងតាំងអគ្គព្រះរាជអាជ្ញារងពីរនាក់ និងផ្ទេរមុខដំណែងមន្ត្រី២២រូប

ជាតិ

នយោបាយជាតិ

ព្រះមហាក្សត្រតែងតាំងអគ្គព្រះរាជអាជ្ញារងពីរនាក់ និងផ្ទេរមុខដំណែងមន្ត្រី២២រូប

30, Oct 2018 , 6:20 pm

រូបភាព

លោក យ៉េត ចរិយា (ស្តាំ) ត្រូវបានតែងតាំងជា អគ្គព្រះរាជអាជ្ញារងតុលាការកំពូល ខណៈ លោក មាស សុភក្តិ ត្រូវបានតែងតាំងជា អគ្គព្រះរាជអាជ្ញារងសាលាឧទ្ធរណ៍

ដោយ: អ៊ូ សុខមាន (OU Sokmean)

ភ្នំពេញ៖ ព្រះរាជអាជ្ញា២រូប ត្រូវបានតែងតាំងជាអគ្គព្រះរាជអាជ្ញារង ហើយស្របពេលជាមួយគ្នា អយ្យការអមសាលាដំបូងរាជធានី-ខេត្ត ចំនួន២២រូប ត្រូវបានតែងតាំង និងផ្ទេរមុខតំណែង។ នេះបើតាមយោងតាមព្រះរាជក្រឹត្យមួយចុះថ្ងៃទី២៧ ខែតុលា ឆ្នាំ២០១៨ ។

លោក យ៉េត ចរិយា ព្រះរាជអាជ្ញាសាលាដំបូងរាជធានីភ្នំពេញ ត្រូវបានព្រះករុណាព្រះមហាក្សត្រ ព្រះបាទសម្តេច ព្រះបរមនាថ នរោត្តម សីហមុនី តែងតាំងជា អគ្គព្រះរាជអាជ្ញារងនៃមហាអយ្យការអមតុលាការកំពូល ខណៈដែលលោក មាស សុភក្តិ ព្រះរាជអាជ្ញាសាលាដំបូងខេត្តព្រៃវែង ត្រូវបានតែងតាំងជា អគ្គព្រះរាជអាជ្ញារងនៃមហាអយ្យការអមសាលាឧទ្ធរណ៍។

តំណែងលោក យ៉េត ចរិយា នៅសាលាដំបូងរាជធានីភ្នំពេញ ត្រូវជំនួសដោយ លោក កែវ សុធា ដែលផ្ទេរពីសាលាដំបូងខេត្តកំពង់ស្ពឺ ខណៈ លោក ប៊ូ ប៊ុនហាង ព្រះរាជអាជ្ញាខេត្តកោះកុង ជំនួសតំណែងចាស់ របស់លោក មាស សុភក្តិ នៅសាលាដំបូងខេត្តព្រៃវែង ។

លោក រស់ សារាំ ព្រះរាជអាជ្ញារងខេត្តព្រះសីហនុ ឡើងកាន់តំណែងជាព្រះរាជអាជ្ញាសាលាដំបូងខេត្តកោះកុង ជំនួសលោក ប៊ូ ប៊ុនហាង។

លោកស្រី ចាតសូ រស្មី ព្រះរាជអាជ្ញាសាលាដំបូងខេត្តព្រះសីហនុ បានផ្ទេរទៅជាព្រះរាជអាជ្ញាខេត្តកំពង់ស្ពឺ ជំនួសលោក កែវ សុធា ស្របពេលដែលព្រះរាជអាជ្ញារងសាលារាជធានីភ្នំពេញ លោក សៀង សុខ ឡើងកាន់តំណែងជាព្រះរាជអាជ្ញាសាលាដំបូងខេត្ត ព្រះសីហនុវិញ។

លោក ហៀង សុភក្ត្រ ព្រះរាជអាជ្ញាសាលាដំបូងខេត្តត្បូងឃ្មុំ និងលោក ឡុង ហុកម៉េង ព្រះរាជអាជ្ញាសាលាដំបូងខេត្តមណ្ឌលគិរី ផ្លាស់ប្តូរទីតាំងធ្វើការទៅវិញទៅមក។ លោក ហៀង សុភក្ត្រ ទៅកាន់ការងារនៅមណ្ឌលគិរី រីឯលោក ឡុង ហុក ម៉េង ទៅបម្រើការនៅត្បូងឃ្មុំវិញ។

ជាមួយគ្នានេះ សាលាដំបូងរាជធានីភ្នំពេញ មានព្រះរាជអាជ្ញារងថ្មីចំនួន៤នាក់ ដែលក្នុងនោះមាន លោក ប្លង់ សុផល (ផ្ទេរពីកំពង់ចាម) លោក សេង គីមឡាក់ (ផ្ទេរពីបន្ទាយមានជ័យ) លោក ហេង ផល (ផ្ទេរពីកណ្តាល) និងលោក សាយ ណូរ៉ា (ផ្ទេរពីកំពង់ធំ)។

នៅបាត់ដំបង និងកំពង់ចាម មានក៏មានព្រះរាជអាជ្ញារងថ្មីចំនួន២រូបរៀងៗខ្លួនផងដែរ។ លោក ផាន់ រតនា ព្រះរាជអាជ្ញារងខេត្តកំពងស្ពឺ និងលោក ឈឺន សុផុន ព្រះរាជអាជ្ញារងខេត្តព្រៃវែង ទៅកាន់តំណែងដដែលនៅបាត់ដំបង ស្របពេលដែលលោក សាន សុភៈ ផ្ទេរពីមណ្ឌលគិរី និងលោក ហាក់ ហ៊ន់ ផ្ទេរពីរតនគិរី ទៅកាន់តំណែងដូចគ្នា នៅខេត្តកំពង់ចាម។

លោក ទុង រតនា ព្រះរាជអាជ្ញារងសាលាដំបូងខេត្តកំពង់ស្ពឺ ផ្ទេរទៅខេត្តព្រះវែង។ លោក ជា សុវណ្ណថេត ព្រះរាជអាជ្ញារងខេត្តមណ្ឌលគិរី ផ្ទេរទៅខេត្តកំពង់ធំ ហើយព្រះរាជអាជ្ញារងខេត្តកំពង់ធំ លោក មាស វឌ្ឍនា ផ្ទេរទៅមណ្ឌលគិរី វិញ។

ព្រះរាជអាជ្ញារងខេត្តកំពង់ចាម លោក ស៊ន មុនី ទៅកាន់ការងារដដែលនៅខេត្តស្វាយរៀង រីឯ លោក ស្រេង វុទ្ធា ចេញពីស្វាយរៀង ទៅបំពេញការងារនៅខេត្តសៀមរាប ដោយតម្រូវឲ្យ លោក ហួត វិចិត្រ ព្រះរាជអាជ្ញារងខេត្តសៀមរាប ប្តូរការងារទៅកាន់ខេត្តព្រះសីហនុវិញ។

ចុងក្រោយ អ្នកស្រី សុន សុខាលីដា ព្រះរាជអាជ្ញារងខេត្តកំពង់ស្ពឺ ត្រូវបានផ្ទេរមុខតំណែងមកបម្រើការងារ នៅក្រសួងយុត្តិធម៌ វិញ៕