ភ្នំពេញ៖ រដ្ឋមន្ត្រីក្រសួងពាណិជ្ជកម្មលោក ប៉ាន សូរស័ក្តិ ជំរុញឲ្យឥណ្ឌា វិនិយោគលើវិស័យអប់រំ តាមរយៈការបង្កើតសាកលវិទ្យាល័យបណ្តុះបណ្តាលធនធានមនុស្សផ្នែកព័ត៌មានវិទ្យា និងកសិកម្ម ដើម្បីលើកស្ទួយសមត្ថភាពប្រកួតប្រជែងរបស់កម្ពុជា សំដៅទាក់ទាញការវិនិយោគផ្ទាល់ពីបរទេស និងការធ្វើពិពិធកម្ម (ពង្រីក) កំណើនសេដ្ឋកិច្ចជាតិ។
ក្នុងជំនួបជាមួយឯកអគ្គរដ្ឋទូតនៃសាធារណរដ្ឋឥណ្ឌាប្រចាំនៅកម្ពុជា លោក ប៉ាន សូរសក្តិ បាននិយាយថា កត្តាប្រឈមរបស់កម្ពុជា គឺបញ្ហាកង្វះធនធានមនុស្សដែលមានគុណភាព ដើម្បីបម្រើគម្រោងវិនិយោគធំៗ ដូច្នេះកម្ពុជាត្រូវការអ្នកជំនាញ និងកន្លែងបណ្ដុះបណ្ដាលយុវជន ឲ្យមានសមត្ថភាពខ្ពស់ ក្នុងការប្រកួតប្រជែង និងអភិវឌ្ឍន៍ប្រទេស។
ដោយសារតែមើលឃើញពីភាពខ្វះខាតនេះ លោក ប៉ាន សូរសក្តិ បានស្នើឯកអគ្គរដ្ឋទូតឥណ្ឌា ជួយកៀងគរវិនិយោគិនឥណ្ឌា មកសហការជាមួយក្រុមហ៊ុនក្នុងស្រុក ដើម្បីបង្កើតសាកលវិទ្យាល័យ ដែលមានកម្មវិធីសិក្សាទាក់ទងព័ត៌មានវិទ្យា និងបច្ចេកទេសកសិកម្មទំនើប សម្រាប់និស្សិតកម្ពុជា។
ថ្លែងក្នុងជំនួប នៅព្រឹកថ្ងៃទី២ វិច្ឆិកានេះ រដ្ឋមន្ត្រីក្រសួងពាណិជ្ជកម្ម បានបញ្ជាក់ដូច្នេះថា៖«ប្រទេសឥណ្ឌា មានភាពលេចធ្លោលើវិស័យបច្ចេកវិទ្យា និងមានកម្មវិធីសិក្សាល្អៗទាក់ទងព័ត៌មានវិទ្យា និងកសិកម្ម ដូច្នេះសូមជួយនាំយកកម្មវិធីសិក្សាទាំងអស់នោះ មកចែករំលែកដល់និស្សិតកម្ពុជា ដើម្បីអភិវឌ្ឍន៍ប្រទេស និងឆ្លើយតបតម្រូវការវិនិយោគិនបរទេស»។
ចំណុចនេះ វាស្ថិតនៅក្នុងការពិភាក្សា និងសម្រេចចិត្តពីរដ្ឋាភិបាលឥណ្ឌាសិន។ លោកស្រី ម៉ានីកា ជែន (Manika Jain) សន្យាយកសំណើកម្ពុជានេះ ទៅជម្រាបរដ្ឋាភិបាល និងវិស័យឯកជនឥណ្ឌា ឱ្យចូលមកបណ្តាក់ទុនលើវិស័យអប់រំ និងវិស័យកសិកម្ម ដើម្បីចូលរួមលើកស្ទួយសមត្ថភាពប្រកួតប្រជែងរបស់កម្ពុជា នៅក្នុងប្រព័ន្ធពាណិជ្ជកម្មសាកល។
ក្រៅពីមានបំណងចងជួយដោះស្រាយកម្ពុជាហើយ លោកស្រី ម៉ានីកា ជែន ក៏គ្រោងអញ្ជើញវិស័យឯកជនកម្ពុជា ទៅចូលរួមព្រឹត្តិការណ៍ពិព័រណ៍ពាណិជ្ជកម្ម និងជំនួបធុរកិច្ចសំខាន់ៗ នៅក្នុងប្រទេសឥណ្ឌាខាងមុខនេះ ដើម្បីពង្រឹងកិច្ចសហប្រតិបត្តិការសេដ្ឋកិច្ច និងពាណិជ្ជកម្មនៃប្រទេសទាំងពីរផងដែរ ។
កន្លងមកអ្នកជំនាញឥណ្ឌា បានចុះសិក្សាចំនួន៣ចំណុច លើប្រព័ន្ធបច្ចេកវិទ្យាគមនាគមន៍ព័ត៌មាន (ICT) នៅតាមជនបទ ,ការបង្កើតធនធានមនុស្សលើផ្នែកបច្ចេកវិទ្យាគមនាគមន៍ព័ត៌មាន និងគម្រោងបង្កើតភូមិឌីជីថលនៅកម្ពុជា ។ ក្រោយសិក្សារួច ឥណ្ឌាក៏មានគំនិត ចង់បង្កើតភូមិឌីជីថលគំរូមួយ នៅក្នុងស្រុកទ្រាំង ដោយផ្ដោតលើកិច្ចការងារកសិកម្ម។
រដ្ឋាភិបាលឥណ្ឌា បានចាត់ក្រុមហ៊ុន Telecommunications of Consultants India Limited (TCIL) ជាតំណាងក្នុងការទទួលរ៉ាប់រងលើ ការអនុវត្តគម្រោងសាកល្បងខាងលើនៅកម្ពុជា។ កន្លងមកក្រុមហ៊ុន TCIL បានបញ្ជូនក្រុមការងារ និងអ្នកជំនាញបច្ចេកទេស មកធ្វើទស្សនកិច្ចនៅប្រទេសកម្ពុជារយៈពេលពីរថ្ងៃ គឺនៅថ្ងៃទី២៤-២៥ ខែកក្កដា ឆ្នាំ២០១៨ ដើម្បីសិក្សាលើកគម្រោងនេះ៕