អនុរដ្ឋមន្ត្រីការបរទេសអាមេរិក ចង់ឃើញទំនាក់ទំនងកម្ពុជា-អាមេរិក រីកស្គុះស្គាយតទៅមុខ

ជាតិ

អនុរដ្ឋមន្ត្រីការបរទេសអាមេរិក ចង់ឃើញទំនាក់ទំនងកម្ពុជា-អាមេរិក រីកស្គុះស្គាយតទៅមុខ

18, Nov 2018 , 3:34 pm

រូបភាព

ប្រភព៖ហ្វេសប៊ុកក្រសួងការបរទេស

ដោយ:

លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ បានជួបពិភាក្សាជាមួយលោក Sullivan អនុរដ្ឋមន្ត្រីការបទេសអាមេរិក កាលពីថ្ងៃទី១៥ ខែវិច្ឆិកា ឆ្នាំ២០១៨ ក្នុងឱកាសនៃកិច្ចប្រជុំកំពូលអាស៊ានលើកទី៣៣ និងកិច្ចប្រជុំពាក់ព័ន្ធ នៅសិង្ហបុរី។

លោក ប្រាក់ សុខុន បានលើកឡើងថា ទោះបីជាប្រទេសទាំងពីរ មានទស្សនៈខុសគ្នាទាំងការយល់ដឹងក្ដី ប៉ុន្តែយើងគប្បីខិតខំបន្តសហប្រតិបត្តិការលើវិស័យទាំងឡាយណាដែលមិនភ្ជាប់នឹងឧបសគ្គនយោបាយ ដោយស្វែងរកវិធីបំព្រួយនៃភាពខុសគ្នានេះ។

តាមសេចក្តីប្រកាសព័ត៌មាន កម្ពុជានៅតែបន្តទំនាក់ទំនងល្អជានិច្ចជាមួយរដ្ឋាភិបាលអាមេរិក ទោះបីជាអាមេរិកមិនទាន់លើកលែងរិតត្បិតផ្នែកទិដ្ឋាការលើមន្ត្រីខ្មែរមួយចំនួនក្តី។ ជាមួយគ្នានេះ កម្ពុជាបានចម្រេចឱ្យចាប់ផ្ដើមកម្មវិធីស្វែងរកអដ្ធិធាតុទាហានបាត់ខ្លួនអាមេរិក ក្នុងសង្គ្រាមនៅកម្ពុជា។ ជាមួយគ្នានេះដែរ កម្ពុជាបន្តសហការ ទទួលការធ្វើមាតុភូមិនិវត្តន៍ពលរដ្ឋខ្មែរពីអាមេរិក ដោយសុខចិត្តទទួលទាំងពលរដ្ឋដែលបានទៅអាមេរិកក្រោយឆ្នាំ១៩៩៤ផងដែរ។

នាជំនួបដែរ លោក Sullivan បានស្វាគមន៍រាជរដ្ឋាភិបាលកម្ពុជាចំពោះការចាប់ផ្ដើមឡើងវិញនូវកម្មវិធីស្វែងរកអដ្ឋិធាតុទាហានបាត់ខ្លួនអាមេរិកក្នុងសម័យសង្គ្រាមនៅកម្ពុជា ក្នុងការលើកស្ទួយទំនាក់ទំនងទ្វេភាគី ដែលជាអាទិភាពមួយរបស់អាមេរិក ដែលក្នុងនោះមានដូចជា ការអនុគ្រោះពន្ធ GSP និងការជួយដល់សកម្មភាពមីន ជាដើម។ លោក Sullivan បានលើកឡើងថា ទំនាក់ទំនងប្រទេសទាំងពីរមានសក្តានុពលដ៏ធំធេង ហើយចង់ឃើញទំនាក់ទំនងនេះ រីកស្គុះស្គាយទៅមុខ។

អនុរដ្ឋមន្ត្រីការបរទេសរូបនេះ ក៏បានចោទសួរបញ្ជាក់ទៅ លោក ប្រាក់ សុខុន ថាតើជាការពិតទេដែរថា នឹងមានមូលដ្ឋានកងទ័ពបរទេសនៅកម្ពុជា? លោក ថាប្រសិនជាមានបែបនេះកើតឡើងពិតមែននោះ វានឹងប៉ះពាល់ធ្ងន់ធ្ងរដល់ទំនាក់ទំនងទ្វេភាគី ហើយក៏ជាក្ដីកង្វល់ធំបំផុតនៅពេលនេះដែលពាក់ព័ន្ធនឹងព័ត៌មានដែលបានលើកឡើង។

ចំពោះ បញ្ហាទាក់ទងនឹងព័ត៌មានស្ដីពីការរៀបចំមូលដ្ឋានជើងទឹកនៅតំន់ឆ្នេរសមុទ្រកម្ពុជា លោក ប្រាក់ សុខុន បានឆ្លើយតបទៅ លោក Sullivan ដូច្នេះថា ទាំងនេះជាពាក្យចចាមអារ៉ាម ដែលកើតចេញពីការកើនឡើងនៃទំហំវិនិយោគរបស់ចិន នៅតំបន់នោះប៉ុណ្ណោះ។

រដ្ឋមន្ត្រីកម្ពុជាបញ្ជាក់ថា៖ «រដ្ឋធម្មនុញ្ញកម្ពុជា មិនអនុញ្ញាតឱ្យមានមូលដ្ឋានយោធាបរទេសនៅលើ ទឹកដីរបស់ខ្លួន និងមិនអនុញ្ញាឱ្យមានមូលដ្ឋានយោធារបស់ខ្លួននៅបរទេឡើយ។ លើកលែងតែក្នុងក្របខណ្ឌ UN ដូចជាការបញ្ជូនកងទ័ពយើងទៅចូលរួមបេសកម្មរក្សាសន្តិសុខនៃអង្គការសហប្រជាជាតិ(UN)។ រាជរដ្ឋាភិបាលកម្ពុជាមិនរំលោភរដ្ឋធម្មនុញ្ញឡើយ»៕