ជាតិ
CMAC មានសមាសភាពក្រុមប្រឹក្សាភិបាល៨រូប និងទីប្រឹក្សាអម៦រូប ពីឆ្វេងទៅស្តាំ៖ លោក ខឹម សោភ័ណ លោក អ៊ុក គឹមលេខ លោក ហេង រតនា លោក ហ៊ុន ម៉ានិត
× ព្រះករុណា ព្រះមហាក្សត្រ ព្រះបាទសម្តេចព្រះបរមនាថ នរោត្តម សីហមុនី បានឡាយព្រះហស្តលេខាលើព្រះរាជក្រឹត្យមួយដើម្បីតែងតាំង និងផ្តល់ឋានៈដល់សមាសភាពក្រុមប្រឹក្សាភិបាល និងទីប្រឹក្សាអមក្រុមប្រឹក្សាភិបាលមជ្ឈមណ្ឌលសកម្មភាពកំចាត់មីនកម្ពុជា (ហៅកាត់ថា ស៊ីម៉ាក់/CMAC) ចំនួន១៤រូប។
យោងតាមព្រះរាជក្រឹត្យ នាយឧត្តមសេនីយ៍ ខឹម សោភ័ណ មានតួនាទីជាប្រធានក្រុមប្រឹក្សាភិបាលផ្ទេរសិទ្ធិ ដែលមានឋានៈស្មើទេសរដ្ឋមន្ត្រី។ នាយឧត្តមសេនីយ៍ អ៊ុក គឹមលេខ ជាអនុប្រធាន និងលោក ឡើង សុជា អនុប្រធានអចិន្ត្រៃយ៍ដែលមានឋានៈស្មើរដ្ឋមន្ត្រី។
លោក ហេង រតនា ជាអគ្គលេខាធិការនៃក្រុមប្រឹក្សាភិបាល ដែលមានឋានៈស្មើរដ្ឋមន្ត្រី។ ក្រៅពីនេះ មានសមាជិក៤រូបទៀត គឺលោក ឈៀង យ៉ាណារ៉ា លោក សរ សុវណ្ណ លោក ហ៊ុន ម៉ានិត (ឋានៈស្មើរដ្ឋមន្ត្រី) និងលោក បោង ប៊ុន្នី (ឋានៈស្មើរដ្ឋលេខាធិការ)។
រីឯទីប្រឹក្សាអមក្រុមប្រឹក្សាភិបាល មានសមាសភាព៦រូប ក្នុងនោះមាន លោក ឆេង សារឿន លោក អ៊ុំ ភូមិរ៉ូ (ឋានៈស្មើរដ្ឋលេខាធិការ) លោក អ៊ិន សារូ (ឋានៈស្មើរដ្ឋលេខាធិការ) លោក ឯក បូលីន (ឋានៈស្មើអនុរដ្ឋលេខាធិការ) លោក នៀម ជូឡេង (ឋានៈស្មើអនុរដ្ឋលេខាធិការ) និងលោក ព្រហ្ម សួនប្រសិទ្ធិ (ឋានៈស្មើអនុរដ្ឋលេខាធិការ)។
មជ្ឈមណ្ឌលសកម្មភាពកំចាត់មីនកម្ពុជា (ហៅកាត់ថា ស៊ីម៉ាក់) គឺជាស្ថាប័នបោសសំអាតមីនដែលត្រូវបានបង្កើតឡើងដោយអាជ្ញាធរបណ្តោះអាសន្នរបស់អង្គការសហប្រជាជាតិប្រចាំប្រទេសកម្ពុជា(ហៅកាត់ថា អ៊ុនតាក់) ចាប់តាំងពីឆ្នាំ១៩៩២ មកម្ល៉េះ។
គោលបំណងក្នុងការបង្កើតស្ថាប័នស៊ីម៉ាក់នេះឡើង គឺដើម្បីជួយអោយមានសុវត្ថិភាពដល់ការទៅតាំងទីលំនៅថ្មី នៃគ្រួសារជនមាតុភូមិនិវត្តន៍ទាំងអស់ ដែលបានវិលត្រឡប់មកពីបណ្តាជំរុំជនភៀសខ្លួននៅតាមព្រំដែនកម្ពុជាថៃ។ពួកគេទាំងអស់នោះ គឺត្រូវការដីធ្លីជាបន្ទាន់សំរាប់សាងសង់លំនៅដ្ឋាន និងប្រកបរបរកសិកម្មចិញ្ចឹមជីវិត
ដែលដីធ្លីទាំនោះ ភាគច្រើនគឺត្រូវបានគ្របដណ្តប់ទៅដោយគ្រាប់មីន និងយុទ្ធភ័ណ្ឌមិនទាន់ផ្ទុះ ដោយសារសង្គ្រាមស៊ីវិល។
ដោយសារតែបេសកកម្មការងារប្រកបដោយមនុស្សធម៌ និងចាំបាច់បែបនេះហើយ ទើបបានជាព្រះករុណាព្រះបាទ សម្តេចព្រះនរោត្តម សីហនុ ព្រះមហាវីរក្សត្រនៃព្រះរាជាណាចក្រកម្ពុជា ទ្រង់បានឡាយព្រះហស្ថលេខា លើព្រះរាជក្រឹត្យមួយ ចុះថ្ងៃទី០៧ ខែសីហា ឆ្នាំ២០០១ ប្រែក្លាយមជ្ឈមណ្ឌលសកម្មភាពកំចាត់មីនកម្ពុជា អោយទៅជាស្ថាប័នជាតិមួយ រហូតមកដល់ពេលបច្ចុប្បន្ននេះ៕
© រក្សាសិទ្ធិដោយ thmeythmey.com