អន្តរជាតិ
ស៊ូជី ទិញដីជាង៣០ហិកតា ដើម្បីបើកសាលាបណ្តុះបណ្តាលវិជ្ជាជីវៈដល់អ្នកគ្មានលទ្ធភាពបញ្ចប់ការសិក្សា
×![]()
លោកស្រីទីប្រឹក្សារដ្ឋមីយ៉ាន់ម៉ា អ៊ុងសាន ស៊ូជី ថ្មីៗនេះបានទិញដីពីគណៈកម្មាធិការអភិវឌ្ឍណៃពិដោរទំហំជាង ៣០ ហិកតា ។ ការទិញដីច្រើនហិកតារបស់ប្រមុខដឹកនាំមីយ៉ាន់ម៉ាជាក់ស្តែងរូបនេះ ស្ថិតក្នុងគម្រោងនៃការពង្រឹងមូលនិធិរបស់លោកស្រី ក៏ដូចជាដើម្បីត្រៀមបង្កើតសាលាបណ្តុះបណ្តាលវិជ្ជាជីវៈដល់អ្នកដែលពុំបានបញ្ចប់ការសិក្សាផ្លូវការ។
តាមការចុះផ្សាយរបស់សារព័ត៌មានមីយ៉ាន់ម៉ា The Irrawaddy នៅដើមខែវិច្ឆិកាកន្លងទៅ លោកស្រី អ៊ុងសាន ស៊ូជី បានបំពេញបែបបទដោយប្រើប្រាស់ឈ្មោះលោកស្រីផ្ទាល់ក្នុងការទិញជាង៣០ហិកតា ក្នុងតម្លៃជាង៤០ម៉ឺនដុល្លារ ក្នុងគោលដៅដើម្បីពង្រឹងមូលនិធិរបស់លោកស្រី ដែលមានឈ្មោះថា « Khin Kyi Foundation» និងដើម្បីត្រៀមបើកសាលាបណ្តុះបណ្តាលជំនាញការងារ និងតំបន់ព្រៃអភិរក្ស។
តាមប្រភពព័ត៌មានដដែល មន្ត្រីជាន់ខ្ពស់របស់បក្សកាន់អំណាចរបស់លោកស្រី អ៊ុងសាន ស៊ូជី បានអះអាងថា ដីនេះ គឺជាដីដែលទិញស្របច្បាប់ មិនមែនជាដីដែលរាប់អូសពីទ្រព្យសម្បត្តិរដ្ឋ ឬឯកជន ដូចមានការលេចលឺណាមួយឡើយ។ តំបន់ដីដែលលោកស្រីអ៊ុងសាន ស៊ូជីទិញនេះ ក៏បើកចំហសម្រាប់ក្រុមហ៊ុនឯកជន អង្គការ ឬសាធារណជន ដែលចាប់អារម្មណ៍ចង់ទិញដូចគ្នាដែរ។
ជុំវិញផែនការ នៃការបង្កើតសាលាបណ្តុះបណ្តាលជីវៈ និងតំបន់ព្រៃអភិរក្ស ក្រោមមូលនិធិ Khin Kyi Foundation នេះដែរ ត្រូវបានមន្ត្រីស្និទ្ធនឹងលោកស្រី ស៊ូជី បង្ហើបថា មិនទាន់ចេញជារូបរាងនៅឡើយទេ ដ្បិត ផែនការនេះ ទាមទារការគាំទ្រ និងរៀបចំច្រើនពាក់ព័ន្ធការងារជំនាញ ដែលជួយទាំងបរិស្ថានផង និងផ្តល់ជាចំណូលដល់ប្រជាជនផង។
គួរជម្រាបផងដែរ Khin Kyi គឺជាម្តាយរបស់លោកស្រី លោកស្រី ស៊ូជី ( Suu Kyi)។ មូលនិធិ Khin Kyi Foundation ត្រូវបានបង្កើតឡើងដោយលោកស្រី ស៊ូជី តាំងពីឆ្នាំ២០១២មកម្ល៉េះ។ មូលនិធិនេះដែរ ត្រូវបានលោកស្រី ស៊ូជី ផ្តួចផ្តើមឡើងក្រោមគោលបំណងជាការតបស្នងគុណ និងរម្លឹកដល់ម្តាយរបស់លោកស្រី។
មូលនិធិ ដែលមិនស្វែងរកប្រាក់ចំណេញនេះដែរ មានបេសកកម្មមនុស្សធម៌ក្នុងការលើកកម្ពស់សុខភាព អប់រំ និងស្តង់ដាររស់នៅរបស់ប្រជាជនមីយ៉ាន់ម៉ា ពិសេសនោះ ប្រជាជន ដែលរស់នៅក្នុងតំបន់ដាច់ស្រយាល និងតំបន់មានការអភិវឌ្ឍតិចតួចបំផុត៕
Tag:
មីយ៉ាន់ម៉ា
អាស៊ាន
© រក្សាសិទ្ធិដោយ thmeythmey.com
