វៀតណាម រម្លឹកចិននិងហ្វីលីពីន៖ «ការរុករកប្រេងនៅសមុទ្រចិនខាងត្បូងរួមគ្នាត្រូវស្របច្បាប់អន្តរជាតិ»

អន្តរជាតិ

វៀតណាម រម្លឹកចិននិងហ្វីលីពីន៖ «ការរុករកប្រេងនៅសមុទ្រចិនខាងត្បូងរួមគ្នាត្រូវស្របច្បាប់អន្តរជាតិ»

24, Nov 2018 , 8:59 pm

រូបភាព

ដោយ:

រដ្ឋាភិបាលក្រុងហាណូយ មិនសូវពេញចិត្តប៉ុន្មានឡើយពេលមិត្តអាស៊ានរបស់ខ្លួនគឺរដ្ឋាភិបាលក្រុងម៉ានីល ចាប់ផ្តើមចាប់ដៃក្រុងប៉េកាំងរុករកប្រេងនិងធនធានរួមគ្នានៅក្នុងសមុទ្រចិនខាងត្បូង ដែលជាតំបន់ភាគីទាំងបីមានវិវាទជាមួយនោះ។ ក្រុងហាណូយថាខ្លួនមិនយល់ទាស់អ្វីទេប៉ុន្តែបានដាស់តឿនឲ្យភាគីទាំងពីរធ្វើតាមច្បាប់អន្តរជាតិឲ្យបានខ្ជាប់ខ្ជួន។

អ្នកនាំពាក្យរងនៃក្រសួងបរទេសវៀតណាម លោកស្រី Nguyễn Phương Trà នៅថ្ងៃ២២ ខែវិច្ឆិកា បានធ្វើសន្និសីទសារព័ត៌មានមួយដើម្បីបង្ហាញពីជំហររបស់វៀតណាមទៅកិច្ចសហប្រតិបត្តិការរវាងហ្វីលីពីន និងចិនក្នុងការរុករកប្រេងនិងឧស្ម័ននៅតំបន់ជម្លោះសមុទ្រចិនខាងត្បូង។ នេះបើយោងតាមការចុះផ្សាយរបស់សារព័ត៌មាន Vietnam News។

សន្និសីទនេះធ្វើ បន្ទាប់ពីលោកប្រធានាធិបតីចិន ស៊ី ជិនភីង បញ្ចប់ទស្សនកិច្ចផ្លូវរដ្ឋទៅកាន់ហ្វីលីពីនក្នុងនាមជាប្រមុខរដ្ឋចិនដំបូងគេ ដែលមានវត្តមាននៅទីនោះក្នុងរយៈ១៣ឆ្នាំ។ ទស្សនកិច្ចនេះបញ្ចប់ទៅជាមួយនឹងកិច្ចព្រមព្រៀងផ្លែផ្កាជាង៣០ ដែលរាប់បញ្ចូលទាំងកិច្ចព្រមព្រៀងក្នុងការអភិវឌ្ឍរុករកប្រេង និងឧស្ម័នរួមគ្នាជាមួយនឹងហ្វីលីពីននៅក្នុងតំបន់ជម្លោះសមុទ្រចិនខាងត្បូងផងដែរ។

« ក្នុងនាមជារដ្ឋ ដែលមានការទទួលខុសត្រូវក្នុងសហគមន៍អន្តរជាតិ និងជាប្រទេសជាប់សមុទ្រចិនខាងត្បូង វៀតណាម ពិតជាផ្តល់តម្លៃខ្ពស់លើកិច្ចសហប្រតិបត្តិការអន្តរជាតិ រាប់បញ្ចូលទាំងសកម្មភាពនានាតាមដែនសមុទ្រ ជាមួយនឹងការគោរពអធិបតេយ្យ និងផលប្រយោជន៍ស្របច្បាប់របស់ប្រទេសនីមួយដោយយោងតាមច្បាប់អន្តរជាតិ ដើម្បីធានាសន្តិភាព ស្ថិរភាព ការអភិវឌ្ឍក្នុងតំបន់ និងមិត្តភាពរវាងរដ្ឋនិងរដ្ឋ»។ នេះគឺសេចក្តីថ្លែងការណ៍របស់លោកស្រី Phương Trà។

ជាមួយនឹងការលើកឡើងពីច្បាប់អន្តរជាតិដើម្បីជាការក្រើនរម្លឹកដល់ភាគីទាំងពីរ លោកស្រីអនុប្រធានអ្នកនាំពាក្យក្រសួងបរទេសវៀតណាមដដែលនោះ បានថ្កោលទោសយ៉ាងខ្លាំងទៅលើសកម្មភាពចុងក្រោយរបស់ចិន ដែលទើបតែដំឡើងសម្ភារយោធានៅកោះមួយ ដែលជាផ្នែកប្រជុំកោះប៉ារ៉ាសែល នៃសមុទ្រចិនខាងត្បូងផងដែរ។

លោកស្រី បានអះអាងថា សកម្មភាពចិនបែបនេះ បានបំពានអធិបតេយ្យរបស់វៀតណាមយ៉ាងធ្ងន់ធ្ងរ ហើយថែមបានប៉ះពាល់ដល់ស្មារតី នៃកិច្ចព្រមព្រៀងរវាងប្រទេសទាំងពីរ ដែលបានធ្វើរួមគ្នាដើម្បីរក្សាសន្តិភាពក្នុងតំបន់នោះ។ មិនខុសពីពេលនោះនោះ មន្ត្រីជាន់ខ្ពស់រូបនេះ ក៏បានថ្លែងពីជំហរវៀតណាម ដែលប្រឆាំងដាច់ខាតចំពោះសកម្មភាពរបស់ចិន ហើយទាមទារឲ្យចិន បញ្ឈប់ជាបន្ទាន់ និងមិនត្រូវបំពានរឿងបែបនេះដដែលតទៅទៀត។

គួររម្លឹកថា ជម្លោះសមុទ្រចិនខាងត្បូង មានភាគីពាក់ព័ន្ធដូចជារដ្ឋអាស៊ាន ព្រុយណេ ម៉ាឡេស៊ី ហ្វីឡីពីន និងវៀតណាម ជាមួយនឹងចិន។ មុនពេលមេដឹកនាំហ្វីលីពីនបច្ចុប្បន្នកាន់តំណែង វៀតណាម និងហ្វីលីពីន តែងតែប្រកៀកស្មាគ្នាតទល់នឹងចិន ពោលគឺ ហ្វីលីពីន មិនបើកចំហរសម្រាប់កិច្ចសហប្រតិបត្តិការរុករកធនធាតិធម្មជាតិផ្សេងៗនៅក្នុងសមុទ្រចិនខាងត្បូងឡើយ៕