ស៊ូជី៖ មានតែការលើកតម្កើងវប្បធម៌សន្តិភាពទេ ដែលអាចជួយបញ្ចប់ជម្លោះក្នុងសហគមន៍ចម្រុះជាតិសាសន៍

អន្តរជាតិ

ស៊ូជី៖ មានតែការលើកតម្កើងវប្បធម៌សន្តិភាពទេ ដែលអាចជួយបញ្ចប់ជម្លោះក្នុងសហគមន៍ចម្រុះជាតិសាសន៍

06, Dec 2018 , 7:59 am

រូបភាព

ដោយ:

ទីប្រឹក្សារដ្ឋមីយ៉ាន់ម៉ា លោកស្រី អ៊ុងសាន ស៊ូជី បានបង្ហាញពីកិច្ចប្រឹងប្រែងរបស់រដ្ឋាភិបាលលោកស្រី ក្នុងការងារផ្សះផ្សាជាតិ ខណៈដែលសហគមន៍អន្តរជាតិ បន្តរិះគន់ខ្លាំងពីភាពខ្សោយក្នុងការដឹកនាំរបស់រដ្ឋាភិបាលមីយ៉ាន់ម៉ា។ សម្រាប់លោកស្រី មានតែការលើកកម្ពស់ស្មារតីសន្តិភាពនោះទេ ដែលជាដំណោះស្រាយដើម្បីបញ្ចប់ជម្លោះក្នុងសហគមន៍ដែលមានជាតិសាសន៍ចម្រុះ។

នាវេទិកាអន្តរជាតិមួយក្នុងរដ្ឋធានីកដ្ឋមណ្ឌូរបស់នេប៉ាល់នៅថ្ងៃទី១ ធ្នូ លោកស្រីទីប្រឹក្សារដ្ឋ អ៊ុងសាន ស៊ូជី បានទទូចឲ្យភាគីពាក់ព័ន្ធទាំងអស់ជួយលើកកម្ពស់ « វប្បធម៌សន្តិភាព » ដើម្បីបញ្ចប់ជម្លោះរវាងសហគមន៍នីមួយៗ។ ប៉ុន្តែលោកស្រី មិននិយាយពីបញ្ហាដ៏រសើបទាក់ទិនការទុក្ខបុកម្នេញទៅលើជនជាតិភាគតិចរ៉ូហ៊ីងយ៉ាក្នុងទឹកដីមីយ៉ាន់ម៉ានោះទេ។

តាមភ្នាក់ងារព័ត៌មាន AFP លោកស្រីទីប្រឹក្សារដ្ឋ បានបកស្រាយ ឬសគល់នៃជម្លោះ បានក្លាយជាជំងឺសង្គមមួយទៅហើយ ដែលនេះ ទាមទារឲ្យភាគីពាក់ព័ន្ធចៀសវាងឥរិយាបថផ្សេងៗ ដែលធ្វើឲ្យបញ្ហាកាន់តែអាក្រក់ទៅៗ។ លោកស្រី បានអំពាវនាវឲ្យមានកិច្ចសហប្រតិបត្តិការគ្នារវាងរដ្ឋនិងរដ្ឋដើម្បីស្វែងរកសន្តិភាព និងវិបុលភាពរួមគ្នា។

« មានតែការលើកតម្កើងវប្បធម៌សន្តិភាពនៅក្នុងពិភពលោក ដែលមានការពឹងពាក់គ្នាទៅវិញទៅមកនោះទេ ដែលជាមធ្យោបាយដើម្បីបង្កើតឲ្យមានសុខដុមរមនីយកម្មរវាងប្រទេស និងសង្គម ដែលមានជាតិសាសន៍ចម្រុះគ្នាច្រើននោះ។» លោកស្រីទីប្រឹក្សារដ្ឋ បានសង្កត់ធ្ងន់យ៉ាងដូច្នេះ ។

សម្រាប់លោកស្រី អ៊ុងសាន ស៊ូជី ការចូលរួមវេទិកាអន្តរជាតិនានា គឺជាសម្ពាធមួយរបស់លោកស្រី ក្នុងនាមជាតំណាងមេដឹកនាំរបស់ប្រទេស។ នោះ ក៏ព្រោះតែលោកស្រី តែងតែប្រឈមទាំងសំណួរ និងការបន្ទោសពាក់ព័ន្ធនឹងបញ្ហាសិទ្ធិមនុស្ស ជាពិសេសនោះរឿងវិបត្តិជនភៀសខ្លួនរ៉ូហ៊ីងយ៉ា ដែលលោកស្រី តែងចៀសវាង សូម្បីតែពន្លេចឈ្មោះ។

ការណ៍ដែលលោកស្រី ស៊ូជី ទទូចឲ្យរដ្ឋពាក់ព័ន្ធបណ្តុះវប្បធម៌សន្តិភាពបែនេះ ក៏ព្រោះតែគិតចាប់ពីវិបត្តិជនភៀសខ្លួនមីយ៉ាន់ម៉ាផ្ទុះឡើងពីចុងឆ្នាំមុនមក រដ្ឋាភិបាលលោកស្រី ទទួលបានការទទួលបន្ទោសច្រើនជាងការផ្តល់អនុសាសន៍ស្វែងរកដំណោះស្រាយដោយសន្តិវិធី៕