អ្នកស្រី ចក់ សុភាព បានទទួលបានពានរង្វាន់សិទ្ធិមនុស្ស និងនីតិរដ្ឋ បារាំង-អាល្លឺម៉ង់ (Prix Franco-Allemand des droits de l’Homme et de l’Etat de droit) ឆ្នាំ២០១៨ កាលពីថ្ងៃទី១០ ខែធ្នូ ឆ្នាំ ២០១៨។ នាយិកាមជ្ឈមណ្ឌលសិទ្ធិមនុស្សកម្ពុជា (CCHR) រូបនេះ ត្រូវបានវាយតម្លៃថា បានចូលរួមយ៉ាងសកម្ម ក្នុងការការពារសកម្មជនសិទ្ធិមនុស្ស ព្រមទាំងការតស៊ូមតិ ដើម្បីសិទ្ធិនយោបាយ និងសិទ្ធិស៊ីវិល។
លោកស្រី Eva Nguyen Binh ឯកអគ្គរដ្ឋទូតបារាំងប្រចាំកម្ពុជា បានលើកឡើងថា៖ «ខណៈដែលយើងកំពុងអបអរខួបគម្រប់៧០ឆ្នាំនៃសេចក្តីប្រកាសជាសកលស្តីពីសិទ្ធិមនុស្ស ការការពារលំហនយោបាយ និងលំហស៊ីវិល នៅតែជាកិច្ចការសំខាន់ជាងនៅជុំវិញពិភពលោក ដូច្នេះហើយ យើងសូមអរគុណអ្នកស្រី ចក់ សុភាព ដែលក្រោកឈរឡើងដើម្បីសិទ្ធិមនុស្ស និងការពារនីតិរដ្ឋ»។
លោក Ingo Karsten ឯកអគ្គរដ្ឋទូតអាល្លឺម៉ង់ប្រចាំកម្ពុជា បានគូសបញ្ជាក់ថា៖ «ការគោរពសិទ្ធិមនុស្ស ត្រូវបានរាប់បញ្ចូលក្នុង កិច្ចព្រមព្រៀងសន្តិភាពទីក្រុងប៉ារីស ដែលជាមូលដ្ឋានគ្រឹះនៃសហប្រតិបត្តិការជាមួយនឹងកម្ពុជា។ សកម្មជនដ៏ក្លាហាន ដូចជា អ្នកស្រី ចក់ សុភាព ជារឿយៗបានរំលឹក ពួកយើងទាំងអស់គ្នា អំពីគុណតម្លៃនៃសិទ្ធិមនុស្ស» ។
ស្ថានទូតបារាំង បានលើកឡើងថា អ្នកស្រី ចក់ សុភាព ក៏ជាជនដ៏សកម្មក្នុងបណ្តាញសង្គម និងដែលក្រោកឈរឡើងដើម្បីសិទ្ធិមនុស្ស ហើយអង្គការដែលគាត់កំពុងដឹកនាំបានលើកកម្ពស់ការគោរពសិទ្ធិមនុស្ស និង សេរីភាពមូលដ្ឋាន ជាពិសេសការលើកកម្ពស់ សហគមន៍ ដូចជា ក្រុមអ្នកការពារសិទ្ធិមនុស្ស ក្រុមជនជាតិភាគតិច យុវជន ស្ត្រី និងក្រុម LGBTIQ+ ។
នៅឆ្នាំ២០១៨នេះ អ្នកស្រី ចក់ សុភាព ស្ថិតក្នុងចំណោមសកម្មជន១៥រូបទូទាំងពិភពលោក ដែលទទួលបានពានរង្វាន់ Prix Franco-Allemand des droits de l’Homme et de l’Etat de droit (Franco-German Prize for Human Rights and the Rule of Law)។ ពានរង្វាន់នេះ ត្រូវបានប្រកាសរួមគ្នាដោយលោក Jean-Yves Le Drian រដ្ឋមន្ត្រីបារាំងទទួលកិច្ចការអឺរ៉ុប និងការបរទេស រួមជាមួយសមភាគីអាល្លឺម៉ង់ លោក Heiko Mass។
ជ័យលាភីផ្សេងទៀតរួមមាន Vuyiseka Dubula-Majola (អាហ្វ្រិក), Yu Wensheng (ចិន), Aminata Traoré (កូតឌីវ័រ), Mohamed Lotfy (អេហ្ស៊ីប), Alfredo Okenve (ហ្គីណេអេក្វាទ័រ), Nityanand Jayaraman (ឥណ្ឌា), Hessen Sayah Corban (លីបង់), Mekfoula Mint Brahim (ម៉ូរីតានី), Liz Chicaje Churay (ប៉េរូ), Oyub Titiev (រុស្ស៊ី), Anwar al-Bunni (ស៊ីរី), Daoud Nassar (ប៉ាឡេស្ទីន), Sirikan Charoensiri (ថៃ) និង Susana Raffalli Arismendi (វេណេស៊ុយអេឡា)។
កាលពីឆ្នាំ២០១៦ លោក ធន សារាយ ប្រធានសមាគមការពារសិទ្ធិមនុស្ស និងការអភិវឌ្ឍន៍នៅកម្ពុជា អាដហុក ស្ថិតក្នុងចំណោមសកម្មជនការពារសិទ្ធិមនុស្សលើពិភពលោកចំនួន១៥នាក់ ដែលទទួលបានពានដូចគ្នានេះ នាពិធីមួយនៅទីក្រុងប៊ែរឡាំង ប្រទេសអាល្លឺម៉ង់។
រដ្ឋាភិបាលបារាំង និងអាល្លឺម៉ង់ បានរៀបចំពិធីប្រគល់ពានរង្វាន់សិទ្ធិមនុស្ស និងនីតិរដ្ឋ ក្នុងគោលបំណងលើកទឹកចិត្តដល់អ្នកដែលតស៊ូរ និងបរិច្ចាគពេលវេលាដើម្បីការពារសិទ្ធិមនុស្សនៅលើពិភពលោក៕