កីឡាជាតិ
ជាតិ
លោក ស សុខា តែងតាំងលោកស្រី កែ សួនសុភី ជាប្រធានក្លិបវិសាខា
× លោកស្រី កែ សួនសុភី ត្រូវបានតែងតាំងជាប្រធានក្រុមកីឡាបាល់ទាត់វិសាខា ជំនួសស្វាមីរបស់ខ្លួន គឺលោក ស សុខា បច្ចុប្បន្នជារដ្ឋលេខាធិការក្រសួងអប់រំ យុវជន និងកីឡា។ ការតែងតាំងនេះ ត្រូវបានប្រកាសក្នុងកម្មវិធីផ្លូវការមួយរបស់ក្លិបកាលពីល្ងាចថ្ងៃទី១៦ ខែធ្នូ ក្រោមអធិបតីភាពសម្តេចឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ និងជាឪពុកបង្កើតរបស់លោក ស សុខា។
យោងតាមការផ្សាយរបស់គេហទំព័រផ្លូវការរបស់វិសាខា លោក ស សុខា បានលើកឡើងពីភារកិច្ចដ៏មមាញឹករបស់ខ្លួនក្នុងស្ថាប័នរដ្ឋ ជាពិសេសក្នុងតួនាទីជារដ្ឋលេខាធិការក្រសួងអប់រំ យុវជន និងកីឡា ប៉ុន្តែលោកសន្យាបន្តជំរុញលើកទឹកចិត្តក្រុមការងាររបស់ខ្លួន។
នាឱកាសនោះដែរ លោកស្រី កែ សួនសុភី ដែលជាកូនស្រីរបស់លោកឧបនាយករដ្ឋមន្ត្រី កែ គឹមយ៉ាន ក្លាយជាស្ត្រីទីពីរនៅកម្ពុជា ដែលក្លាយជាប្រធានក្លិបក្រុមកីឡាបាល់ទាត់លំដាប់កំពូល។ លោកស្រី ពុធ ធីតា គឺជាស្ត្រីដំបូងដែលបានក្លាយជាអ្នកគ្រប់គ្រងក្លិបបាល់ទាត់ បន្ទាប់ពីគ្រួសាររបស់លោកស្រីក្លាយជាម្ចាស់ភាគហ៊ុនធំរបស់ក្លិបបឹងកេត។
លោកស្រី កែ សួនសុភី បានសម្ដែងនូវសេចក្ដីសប្បាយរីករាយក្រៃលែង ដោយទទួលបានសេចក្ដីទុកចិត្តពីលោក ស សុខា ក្នុងការដឹកនាំក្លិបបាល់ទាត់វិសាខា ហើយលោកស្រីប្ដេជ្ញា ដឹកនាំក្លិបឆ្ពោះទៅរកភាពរីកចម្រើន តាមរយៈការធ្វើការងារជាក្រុម និងសហការជាមួយគណៈគ្រប់គ្រងក្លិប ដែលមានបទពិសោធន៍ ដើម្បីធ្វើឲ្យក្លិបវិសាខា កាន់តែមានសក្ដានុពលទាំងថ្នាក់ជាតិ និងអន្ដរជាតិ នាថ្ងៃអនាគត ៕
© រក្សាសិទ្ធិដោយ thmeythmey.com