ជាតិ
បទយកការណ៍ / បទសម្ភាសន៍
អាជ្ញាធរទទូចឱ្យពលរដ្ឋ និងអ្នកទេសចរចូលរួមសម្អាតបរិស្ថាន ដើម្បីនិរន្តរភាពភ្នំគូលែន
×![]()
សៀមរាប៖ ភ្នំគូលែន ឬឧទ្យានជាតិព្រះជ័យវរ្ម័ន-នរោត្តម គឺជាប្រភពទឹកដ៏សំខាន់សម្រាប់ការផ្គត់ផ្គង់ខេត្តសៀមរាប។ ទឹកហូរពីភ្នំ ឆ្លងកាត់តាមជប់ បឹង មកដល់ស្ទឹងសៀមរាប និងបន្តធ្លាក់ដល់បឹងទន្លេសាប។ រាល់ថ្ងៃសម្រាក និងបុណ្យទានម្ដងៗ ភ្ញៀវទេសចរជាតិ អន្ដរជាតិ តែងធ្វើដំណើរទៅកម្សាន្តរមណីដ្ឋានប្រវត្តិសាស្ដ្រមួយនេះ ដ្បិតសម្បូរទឹក និងដើមឈើត្រជាក់ត្រជំ។ យ៉ាងណា ដោយសារខ្វះការយល់ដឹង ការទុកដាក់សំរាមនៅតំបន់នេះមិនសូវល្អឡើយ ដែលជាហេតុបង្កឱ្យប៉ះពាល់ដល់សោភណ្ឌភាព និងទឹកប្រើប្រាស់នៅទីនោះផងដែរ។ អាជ្ញាធរទទូចឱ្យពលរដ្ឋ ក៏ដូចជាភ្ញៀវទេសចរ ត្រូវចូលរួមសហការសម្អាតបរិស្ថាននៅភ្នំគូលែន ដើម្បីរក្សានិរន្តរភាពរមណីយដ្ឋានប្រវត្តិសាស្ដ្រមួយនេះតទៅថ្ងៃមុខ។
ព័ត៌មានលម្អិត សូមស្ដាប់បទយកការណ៍ដែលរៀបរៀងដោយអ្នកស្រី អ៊ីសា រ៉ហានី ពីខេត្តសៀមរាប ដូចតទៅ
ភ្នំគូលែន មានចម្ងាយប្រមាណជាង ៥០គីឡូម៉ែត្រពីទីរួមខេត្តសៀមរាប។ ភ្នំនេះមានភូមិសាស្ដ្រជាប់នឹងស្រុកចំនួន៤ របស់ខេត្តសៀមរាប មានស្រុកបន្ទាយស្រី ស្រុកវ៉ារិន ស្រុកស្វាយលើ និងស្រុកសូទ្រនិគម។ ភ្នំនេះមានកន្លែងពិសេសៗ ដែលទេសចរតែងចូលទស្សនាដូចជា ព្រះអង្គធំ លិង្គមួយពាន់ ទឹកជ្រោះ ស្រះដំរី រោងប្រចៀវជាដើម។ល។
ដោយសារជាតំបន់ទេសចរណ៍ដ៏ទាក់ទាញមួយ ការគ្រប់គ្រងសំរាមជាបញ្ហាដែលអាជ្ញាធរកំពុងរិះរកមធ្យោបាយដ៏ជោគជ័យមួយ ដ្បិតការទុកដាក់មិនទាន់បានត្រឹមត្រូវ បង្កជាផលប៉ះពាល់បរិស្ថានខ្លាំងនៅឧទ្យានជាតិមួយនេះ។ កម្មវិធីសម្អាតបរិស្ថានមួយ ត្រូវបានធ្វើឡើងនៅថ្ងៃទី២៥ ធ្នូ ដែលជាយុទ្ធនាការបំផុសការយល់ដឹងដល់ពលរដ្ឋ អាជីវករ ទេសចរ យល់ពីការទុកដាក់សំរាមឱ្យបានត្រឹមត្រូវ។
ថ្លែងនៅចំពោះមុខអ្នកចូលរួមសម្អាតបរិស្ថានដែលមានប្រមាណ ៣០០នាក់ រួមមានមន្ត្រីឧទ្យានុរក្ស អាជ្ញាធរ សិស្សានុសិស្ស ប្រជាពលរដ្ឋ មេឃុំ ខ្នងភ្នំ លោក ឈឿម តាំង បានឱ្យដឹងថា សកម្មភាពសម្អាតបរិស្ថានតែងធ្វើជាហូរហែនៅភ្នំគូលែន ដោយមានការសហការចូលរួមពីដៃគូពាក់ព័ន្ធនានា។ យ៉ាងណា លោកទទួលស្គាល់ថា ការយល់ដឹងរបស់ប្រជាពលរដ្ឋទាក់ទងនឹងបរិស្ថាននៅមានតិចតួចណាស់ ដែលជាហេតុធ្វើឱ្យអាជ្ញាធរតែងចុះអប់រំទាំងនៅសាលារៀន និងតាមភូមិ។ ទាក់ទងនឹងអាជីវករវិញ ពួកគេក៏មិនសូវចូលរួមសម្អាតដែរ ហើយការទុកដាក់ទាំងនោះ មិនទៅតាមអ្វីដែលអាជ្ញាធរចង់បានដែរ។
បរិស្ថាននៅភ្នំគូលែន គឺមានលក្ខណៈពិសេសត្រង់ថា ភ្នំនេះជាប្រភពទឹកសំខាន់សម្រាប់ការប្រើប្រាស់ទាំងមូលរបស់ប្រជាពលរដ្ឋនៅតំបន់នេះ និងរហូតដល់ក្នុងក្រុងសៀមរាបផងដែរ។ លោកមេឃុំខ្នងភ្នំលើកឡើងថា នៅពេលគេថែរក្សាបរិស្ថានមិនបានល្អ វាបណ្ដាលឱ្យទឹកប្រែជាពណ៌ក្រហម និងបង្កជាមេរោគផ្សេៗប៉ះពាល់ដល់សុខភាពពលរដ្ឋ។ លោកមេឃុំសំណូមឱ្យពលរដ្ឋសហការ និងយល់ពីហានិភ័យទាំងនេះ ធ្វើយ៉ាងណារក្សានិរន្ដរភាពបរិស្ថាននៅភ្នំគូលែនឱ្យបានគង់វង្សទៅថ្ងៃក្រោយ។
ប្រធានស្ដីទីមន្ទីរបរិស្ថានខេត្តសៀមរាប លោក ស៊ុន គង់ ក៏យល់ឃើញដូចលោកមេឃុំខ្នងភ្នំដែរ គឺការទុកដាក់សំរាមនៅតំបន់ឧទ្យានជាតិនេះមិនទាន់ល្អប្រសើរឡើយ ដូច្នេះចាំបាច់ត្រូវការការគៀងគរ ដើម្បីការចូលរួមសម្អាតអនាម័យទាំងអស់គ្នា។ យុទ្ធនាការសម្អាតបរិស្ថាននៅថ្ងៃនោះមានការចូលរួមពីមន្ទីរបរិស្ថាន អង្គការ ADF អាជ្ញាធរជាតិអប្សរា និងអាជ្ញាធរមូលដ្ឋាន បំផុសឱ្យពលរដ្ឋយល់ដឹងពីការទុកដាក់សំរាមឱ្យបានត្រឹមត្រូវ។
ដោយសារមើលឃើញពីទំហំប៉ះពាល់របស់សំរាម កាលពីឆ្នាំទៅរដ្ឋមន្ត្រីក្រសួងបរិស្ថាន លោក សាយ សំអាល់ បានផ្តល់នូវឡដុតសំរាមមួយតាមបច្ចេកទេសទំនើប ដែលមានលទ្ធភាពអាចដុតសំរាមក្នុងមួយថ្ងៃចន្លោះពី៥ ទៅ៨តោន ក្រោមកម្ដៅ ៨០០អង្សាសេ ដែលឡនេះអាចបំលែងផ្សែងមិនឱ្យមានសារធាតុពុលខ្ពស់។
ទាក់ទងនឹងបញ្ហាបរិស្ថាននេះ ក្រៅពីប៉ះពាល់ដល់វិស័យទេសចរណ៍ ក៏ដូចជាទឹកហើយនោះ វាក៏ប៉ះពាល់ដល់បុរាណដ្ឋានផងដែរ។ បុរាណវិទូ លោក សាឃឿន សក្កា នៃអង្គការ ADF បានលើកឡើងថា បរិស្ថាន និងបុរាណដ្ឋាន ពិតជាមិនអាចដាច់ពីគ្នាបានទេ ហើយមានបុរាណដ្ឋានជាច្រើននៅលើភ្នំគូលែន ដែលត្រូវការការយកចិត្តទុកដាក់បំផុត។ លោកបន្ថែមថា ការប្រែប្រួលអាកាសធាតុអាចប៉ះពាល់ដល់ប្រាសាទ តួយ៉ាងដូចប្រាសាទសង់ពីឥដ្ឋ និងថ្ម វានឹងរងកម្លាំង និងភ្លៀងអាស៊ីតខ្លាំងដោយផ្ទាល់ ប្រសិនបើគ្មានព្រៃឈើជួយទប់។
លោកប្រធានមន្ទីរបរិស្ថានស្ដីទី លោក ស៊ុន គង់ ក៏បានអំពាវនាវដល់ពលរដ្ឋទាំងអស់ ក៏ដូចជាភ្ញៀវទេសចរត្រូវមានស្មារតីភ្ញាក់រឮក និងចូលរួមសម្អាតបរិស្ថានក្នុងរមណីយដ្ឋាននានាឱ្យបានល្អប្រសើរ សក្ដិសមជារមណីយដ្ឋានប្រវត្តិសាស្ដ្ររបស់កម្ពុជា។ ជាងនេះទៅទៀត គឺការចូលរួមដាំកូនឈើឡើងវិញនៅភ្នំគូលែន ដែលនេះជាគម្រោងស្ដារព្រៃឈើឡើងវិញដោយមានការចូលរួមពីដៃគូអភិវឌ្ឍន៍ផ្សេងៗ។ កន្លងមក ផ្ទៃដីដែលបានដាំកូនឈើឡើងវិញនៅភ្នំគូលែន មានប្រមាណ ៦៥ហិកតា មានប្រភេទកូនឈើគ្រញូង បេង ធ្នង់ និងនាងនួនជាដើម ដែលសរុបមានកូនឈើចំនួនប្រមាណ ២០ម៉ឺនដើម។
សម្រាប់អ្នកបុរាណវិទូ លោក សក្កា លើកឡើងថា ការងារបរិស្ថានមិនមែនជាការងារផ្ដាច់មុខរបស់ស្ថាប័នមួយឡើយ តែផ្ទុយទៅវិញវាជាភារកិច្ចសម្រាប់ពលរដ្ឋគ្រប់រូប។ លោកសុំឱ្យភ្ញៀវទេសចរដែលបានមកកម្សាន្តភ្នំគូលែន នៅពេលត្រឡប់ទៅវិញ ត្រូវវេចខ្ចប់សំរាមទៅជាមួយផង ដោយមិនត្រូវទុកចោលគរនៅលើទីរមណីយដ្ឋានប្រវត្តិសាស្ដ្រនេះទេ៕
© រក្សាសិទ្ធិដោយ thmeythmey.com
