សង្គមអន្តរជាតិ
អន្តរជាតិ
ស្ត្រីជិតរៀបការម្នាក់ ប្រាប់ភ្ញៀវឲ្យចងដៃតែលុយបានហើយ កុំឲ្យកាដូដែលគ្មានប្រយោជន៍ រូបតំណាង
× ស្ត្រីម្នាក់ដែលមិនបានបង្ហាញឈ្មោះ និងសញ្ជាតិ បានសរសេរនៅលើបណ្តាញសង្គម Reddit ដោយត្អូញត្អែរថា នាង និងគូដណ្តឹងចំណាយលុយជាច្រើននៅថ្ងៃភ្ជាប់ពាក្យ ប៉ុន្តែភ្ញៀវដែលបានចូលរួម គ្រាន់តែឲ្យកាដូតិចតួចប៉ុណ្ណោះ មិនមានអ្នកណាម្នាក់ឲ្យលុយឡើយ។ ខណៈដែលថ្ងៃអាពាហ៍ពិពាហ៍នឹងឈានមក នាងនិងគូដណ្តឹង សម្រេចចិត្តកំណត់ឈ្មោះភ្ញៀវច្បាស់លាស់ ហើយឲ្យពួកគេចងដៃតែលុយប៉ុណ្ណោះ មិនបាច់យកកាដូមកជំនួសឡើយ។
«គ្មានអ្នកណាម្នាក់ឲ្យលុយយើង ជាកាដូនោះឡើយ»។ នេះជាការលើកឡើងរបស់ស្ត្រីអនាមិកនៅលើបណ្តាញសង្គម Reddit ដោយបញ្ជាក់ថា ខ្លួនឈឺចាប់ ខ្មាសអៀន ខឹង និងខកចិត្ត នូវអ្វីដែលបានកើតឡើងនៅថ្ងៃភ្ជាប់ពាក្យរបស់ខ្លួន។
នាងបានលើកឡើងថា ខ្លួន និងគូដណ្តឹង មានបំណុលគរដូចភ្នំ ដូច្នេះនៅថ្ងៃភ្ជាប់ពាក្យ នាងបានស្នើភ្ញៀវទាំងអស់ចងដៃជាលុយ ដើម្បីពួកនាងមានថវិកាគ្រប់គ្រាន់ក្នុងការរៀបចំអាពាហ៍ពិពាហ៍ ប៉ុន្តែគ្មានអ្នកណាចាប់អារម្មណ៍នោះឡើយ ដោយពួកគេគ្រាន់តែនាំយកកាដូដែលមានតម្លៃតិចតួចប៉ុណ្ណោះ ក្នុងនោះ ក៏ភ្ញៀវដែលមិនបានអញ្ជើញផងដែរ។
ដោយសំដែងពីការខកចិត្ត ស្ត្រីរូបនោះ បានសរសេរថា នៅថ្ងៃអាពាហ៍ពិពាហ៍ នាងនឹងកំណត់ការអញ្ជើញច្បាស់លាស់ ជាពិសេសមិត្តភក្តិ និងអ្នកដែលមានបំណងជួយសម្រួលការចំណាយរបស់ខ្លួន។ នាងលើកឡើងយ៉ាងដូច្នេះថា៖ «យើងនឹងសំណូមពរឲ្យភ្ញៀវចងដៃជាលុយតែប៉ុណ្ណោះ ហើយខ្ញុំក៏បានផ្ញើសារបញ្ជាក់តាមអ៊ីម៉ែលផងដែរ ដោយរំពឹងថាទទួលបានលុយ ពោលគឺមិនមែនជាកាដូដែលត្រូវប្តូរយកលុយ ឬលក់តាម Ebay នោះឡើយ»។
ការត្អូញត្អែររបស់ស្ត្រីនោះ មិនសូវមានអ្នកពេញចិត្តឡើយ ដោយភាគច្រើនសំដែងការហួសដែលគាត់ទាមទារការចងដៃជាលុយនៅថ្ងៃភ្ជាប់ពាក្យ។ «មិនដែលឮសោះ ពិធីភ្ជាប់ក៏ចង់បានការចងដៃជាលុយដែរ»។ នេះជាការហួសចិត្តរបស់អ្នកប្រើប្រាស់បណ្តាញសង្គម Reddit ម្នាក់។
លោក William Hanson អ្នកជំនាញខាងរៀបចំកម្មវិធីម្នាក់ បានបញ្ជាក់ប្រាប់ Sun Online ថា ជាទូទៅ កូនកម្លោះ ឬកូនក្រមុំ មិនគួរសុំលុយ ឬការរួមចំណែកសម្រាប់រាត្រីក្រេបទឹកឃ្មុំរបស់ពួកគេនោះឡើយ។ លោកថា អ្នករៀបចំគួរកំណត់ចំនួនភ្ញៀវ និងរៀបចំគម្រោងចំណាយឲ្យច្បាស់លាស់ ពីព្រោះពិធីនេះ មិនមែនធ្វើឡើងដើម្បីចំណេញលុយនោះឡើយ។
មតិមួយចំនួន បានបន្ថែមថា នាងគួរតែសុំទោសនូវអ្វីដែលខ្លួនបានសរសេរពីព្រោះ វាធ្វើឲ្យប្រឈមនឹងការខាតបង់កាន់តែច្រើន ជាពិសេសមិត្តភាព។ បុរសម្នាក់បានស្នើថា៖ «ប្រសិននាងចង់បានជីវិតល្អប្រសើរ និងមានលុយគ្រប់គ្រាន់ នាងគួរតែពន្យាពេលរៀបអាពាហ៍ពិពាហ៍ និងដោះស្រាយបំណុលឲ្យបានរួចរាល់ជាមុនសិនទៅ៕
© រក្សាសិទ្ធិដោយ thmeythmey.com