ជាតិ
នយោបាយជាតិ
លោក អ៊ុក រ៉ាប៊ុន ហាមមន្ត្រីយកយានយន្តស្លាកលេខរដ្ឋជិះទៅក្លិបកម្សាន្ត ខារ៉ាអូខេ និងកន្លែងម៉ាស្សា លោក អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទ
× លោក អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទ កាលពីថ្ងៃទី២៧ ខែធ្នូ បានចេញសេចក្តីណែនាំមួយដល់មន្ត្រីរបស់ខ្លួនទាក់ទងនឹងការប្រើប្រាស់ទោចក្រយានយន្ត និងរថយន្តរបស់ក្រសួង ពោលគឺយានដែលមានស្លាកលេខរដ្ឋ។
ក្នុងសេចក្តីណែនាំរបស់ខ្លួន លោករដ្ឋមន្ត្រីបានអះអាងថា ធ្វើឡើងដើម្បីធានាប្រសិទ្ធភាព ក្នុងការគ្រប់គ្រងទ្រព្យ សម្បត្តិរដ្ឋ និងសេចក្តីថ្លៃថ្នូររបស់ស្ថាប័នរដ្ឋ និងមន្ត្រីរាជការសាធារណៈ។ ទាក់ទងនឹងការប្រើប្រាស់យានយន្តស្លាកលេខរដ្ឋ លោក អ៊ុក រ៉ាប៊ុន បានណែនាំមន្ត្រីក្រោមឱវាទរបស់ខ្លួនចំនួន៣ចំណុច។
នៅចំណុចដំបូង លោកបានស្នើឲ្យមន្ត្រីខ្លួនប្រើប្រាស់ទោចក្រយានយន្ត និងយានយន្តពាក់ស្លាកលេខរដ្ឋឲ្យបានត្រឹមត្រូវ និងបើកបរថ្លៃថ្នូរដោយគោរពតាមច្បាប់ចរាចរណ៍ផ្លូវគោក។ ចំណុចបន្ទាប់ លោកហាមប្រើប្រាស់យានយន្តទាំងនោះ ក្រៅពីម៉ោងការងារ ជាពិសេសជិះទៅកន្លែងបម្រើសេវាកម្មសប្បាយផ្សេងៗ ដូចជា ក្លិបកម្សាន្ត កន្លែងខារ៉ាអូខេ កន្លែងម៉ាស្សាជាដើម។
បន្ថែមពីលើនេះ រដ្ឋមន្ត្រីក្រសួងអភិវឌ្ឍន៍ជនបទ ក៏បានហាមមន្ត្រីយកយានយន្តស្លាកលេខរដ្ឋឲ្យអ្នកដទៃប្រើប្រាស់ក្នុងគោលបំណងផ្សេង ដែលមិនពាក់ព័ន្ធទៅនឹងការបំពេញភារកិច្ចរបស់ខ្លួន៕
© រក្សាសិទ្ធិដោយ thmeythmey.com