សៀវភៅ«ព្រៃរំដួល»ផ្ដល់ឱកាសដល់អ្នកនិពន្ធថ្មីបានបញ្ចេញស្នាដៃ

ជាតិ

សង្គមជាតិ

សៀវភៅ«ព្រៃរំដួល»ផ្ដល់ឱកាសដល់អ្នកនិពន្ធថ្មីបានបញ្ចេញស្នាដៃ

05, Jan 2019 , 7:59 pm

រូបភាព

ដោយ: ប៉ូ សាគុន

ភ្នំពេញ៖ «ព្រៃរំដួល» ជាសៀវភៅទីពីរបន្ទាប់ពីសៀវភៅ «មន្តទឹកខ្មៅ» ដែលចងក្រងរឿងខ្លីចំនួន២០ចំណងជើង ។ «ព្រៃរំដួល» ជាសៀវភៅមួយដែលអាចនិយាយបានថា បានផ្ដល់ឱកាសដល់អ្នកនិពន្ធថ្មីថ្មោង បង្ហាញស្នាដៃរបស់ខ្លួន តាមរយៈការបោះពុម្ភរួមគ្នា។ សៀវភៅនេះក៏ជាកត្តាលីករ ជំរុញទឹកចិត្តអ្នកនិពន្ធវ័យក្មេង ឱ្យកាន់តែមានកម្លាំងចិត្តនិពន្ធរឿងបន្ថែម។

ចំណងជើងរួមដែលដាក់នៅលើក្របសៀវភៅ ដែលមានចំណងជើងថា «ព្រៃរំដួល» គឺជាស្នាដៃរឿងខ្លីរបស់អ្នកនិពន្ធ អ៊ុំ សុផានី ដែលធ្លាប់បានទៅលេងនៅប្រទេសថៃ ស្ថិតក្នុងស្រុកមួយដែលមានចម្ការរំដួលធ្វើឱ្យអ្នកស្រីស្ញប់ស្ញែង។ «ព្រៃរំដួល» ក៏បានសរសើរពីបរិស្ថានស្អាត និងរបៀបរបបមួយចំនួនទៀតនៅប្រទេសជិតខាង ដែលនាំចិត្តអ្នកនិពន្ធប្រាថ្នាឱ្យប្រទេសកម្ពុជា មានភាពស្រស់ត្រកាលដូច្នោះដែរ។ សៀវភៅ «ព្រៃរំដួល» កើតឡើងក៏ដើម្បីឧទ្ទិសដល់ អ្នកនិពន្ធ អ៊ុំ សុផានី ដែរ។

កាលពីឆ្នាំ២០១៧ អ្នកនិពន្ធទាំងចាស់និងក្មេងមួយក្រុម បានចងក្រងគ្នាឡើងដែលមានឈ្មោះថា «ក្រុមអ្នកនិពន្ធមន្តទឹកខ្មៅ» ហើយក៏រួមគ្នាបោះពុម្ភសៀវភៅចម្រុះរឿងខ្លីមួយក្បាល ដោយដាក់ចំណងជើងរួមថា «មន្តទឹកខ្មៅ» ។ មន្តទឹកខ្មៅប្រមូលផ្ដុំដោយអ្នកនិពន្ធ២១រូប ហើយក៏មានរឿងចំនួន ២១ចំណងជើងដែរ។ ក្នុងឆ្នាំ២០១៨នេះ សៀវភៅ «ព្រៃរំដួល» ប្រមូលផ្ដុំអ្នកនិពន្ធ២០រូប និងមានរឿងខ្លីចម្រុះ២០ចំណងជើង។ ទាំងសៀវភៅ «មន្តទឹកខ្មៅ»និង «ព្រៃរំដួល» បោះពុម្ភឡើងដើម្បីផ្ដល់ឱកាស និងជំរុញទឹកចិត្តអ្នកនិពន្ធជំនាន់ថ្មីមិនទាន់មានបទពិសោធន៍ ឱ្យមានកម្លាំងចិត្តសរសេររឿងបន្ថែម។

លោក ឃុត សុខឿន ជាគណៈកម្មាការជ្រើសរើសរឿងមួយរូប ក្នុងសៀវភៅ «ព្រៃរំដួល» បានលើកឡើងថា ការចងក្រងឱ្យមានការបោះពុម្ភសៀវភៅរួមគ្នានេះ គឺដើម្បីលើកទឹកចិត្ត និងពង្រឹងសម្ពន្ធភាព រវាងអ្នកនិពន្ធមានបទពិសោធន៍ និងអ្នកនិពន្ធថ្មី ។ ជាពិសេសជំរុញការសរសេរ និងផ្ដល់ឱកាសដល់ការបោះពុម្ភចំពោះអ្នកនិពន្ធថ្មីតែម្ដង។

លោកបានបញ្ជាក់យ៉ាងដូច្នេះ ៖« យើងចង់លើកទឹកចិត្តដល់ការធ្វើការរួមគ្នាជាធ្លុងមួយ។ សៀវភៅនេះក៏ជាចំណែកមួយជួយដល់អ្នកនិពន្ធវ័យក្មេង និងអ្នកនិពន្ធថ្មី គាត់មានឱកាសបោះពុម្ភ ដែលអាចឱ្យស្នាដៃរបស់គាត់ បានទៅដល់ដៃអ្នកអាន»។

លោក សុខឿន ថា រឿងខ្លីទាំង២០ចំណងជើងនេះ មានគំនិតអប់រំដែលបម្រើដល់មនុស្សគ្រប់ស្រទាប់រាប់ចាប់ពីសិស្សនិស្សិត រហូតដល់មន្ត្រីរាជការ ដែលឆ្លុះបញ្ចាំងពីតថភាពសង្គម។ គណៈកម្មាការរូបនេះក៏ទទួលស្គាល់ថារឿងខ្លីទាំងអស់ក្នុងសៀវភៅ «ព្រៃរំដួល» មិនសុទ្ធតែល្អទាំងអស់នោះឡើយ អាចខុសចិត្តអ្នកអានមួយចំនួន តែទោះជាយ៉ាងណា នេះជាផ្នែកមួយជួយជំរុញទឹកចិត្តអ្នកនិពន្ធថ្មីៗ។

«រឿងទាំងអស់ក្នុងសៀវភៅនេះ មិនមែនសុទ្ធតែល្អ សុទ្ធតែផ្ដល់ប្រយោជន៍ឱ្យដល់អ្នកមើលគ្រប់រូបទេ។ អ្នកខ្លះគាត់មានចំណេះដឹងជ្រៅជ្រះខ្លាំងហើយ គាត់អាចយល់ថារឿងណាមួយមិនសូវល្អ តែរឿងនោះអាចត្រូវនឹងក្មេងៗ ឬអ្នកអានមួយផ្នែកទៀត។ យើងចង់ឱ្យសៀវភៅនេះមានស្នាដៃចម្រុះ អាចតម្រូវបានគ្រប់វ័យ»។

បើនិយាយពីការគាំទ្រ «ព្រៃរំដួល» ហាក់មានសម្ទុះជាងសៀវភៅមន្តទឹកខ្មៅ ព្រោះមិនទាន់សម្ពោធជាផ្លូវការផង «ព្រៃរំដួល» បានលក់អស់១,០០០ក្បាលទៅហើយ ។ លោក សុខឿន ពន្យល់យ៉ាងដូច្នេះ ៖« ប្រហែលមកពីសម្ទុះនៃការអានកើនឡើង។ ម្យ៉ាងអាចមកពីយើងបោះពុម្ភចំថ្ងៃតាំងពិព័រណ៍សៀវភៅថ្នាក់ជាតិ ឬអាចជាស្នាដៃទី២ ដែលគេធ្លាប់បានស្គាល់ពីមុនមកហើយ ឬអាចមកពីមធ្យោបាយយើងលក់ថ្មីផងក៏ថាបាន។ កាលពីឆ្នាំមុន យើងលក់តាមហ្វេសប៊ុក តែឆ្នាំនេះអ្នកនិពន្ធទាំង២០រូបគាត់យកទៅលក់ដោយខ្លួនឯងតាមហ្វេសប៊ុកផ្ទាល់របស់គាត់»។

«ព្រៃរំដួល» អាចនឹងបោះពុម្ភជាលើកទី២ នៅដើមឆ្នាំ២០១៩ មុនថ្ងៃទិវាអំណានជាតិ ដែលអាចបោះពុម្ភមួយពាន់ក្បាលបន្ថែម។ ជាគម្រោងនៅឆ្នាំ២០១៩ និងឆ្នាំក្រោយៗទៀត លោក ឃុត សុខឿន បញ្ជាក់ថា ក្រុមអ្នកនិពន្ធមន្តទឹកខ្មៅ នឹងពង្រឹងគុណភាពនៃការសរសេរឱ្យកាន់តែប្រសើរ បង្កើតកម្មវិធីទំនាក់ទំនងរវាងអ្នកនិពន្ធនិងអ្នកអាន រួមទាំងសកម្មភាពរវាងអ្នកនិពន្ធនិងអ្នកនិពន្ធ។ «យើងអាចរៀបចំជាសិក្ខាសាលា ដើម្បីឱ្យអ្នកអានបានជួបជាមួយអ្នកនិពន្ធ គាត់អាចមានមតិយោបល់ទៅលើស្នាដៃ ថាគាត់មិនពេញចិត្តត្រង់ណា ឬចង់សរសើរត្រង់ចំណុចណា។ សម្រាប់អ្នកនិពន្ធនិងអ្នកនិពន្ធ គឺអាចមានជំនួបដែលអ្នកនិពន្ធវ័យក្មេងគាត់អាចទទួលយកបទពិសោធន៍ពីអ្នកនិពន្ធចាស់ៗ»។ នេះជាការបញ្ជាក់បន្ថែមរបស់លោក ឃុត សុខឿន។

ចំពោះអ្នកដែលមានបំណងចង់មានស្នាដៃក្នុងសៀវភៅ ដែលបោះពុម្ភឆ្នាំក្រោយៗទៀត របស់ក្រុមអ្នកនិពន្ធមន្តទឹកខ្មៅ លោក ឃុត សុខឿន បានណែនាំថា ៖« អ្នកសរសេររឿងត្រូវតែឆ្លុះបញ្ចាំងពីតថភាពសង្គមបច្ចុប្បន្ន ផ្ដល់សារអប់រំ ផ្ដល់ការគិតពិចារណា មានភាពប្រាកដនិយម ដែលមិនមែនជាការស្រមើស្រមៃ និងត្រូវមានសោភ័ណក្នុងរឿងជាដើម។ សូមឱ្យគាត់សរសេរជាប្រភេទរឿងខ្លី មិនមែនជារឿងប្រលោមលោកទេ។ រឿងប្រភេទស្នេហា ឬរឿងខ្មោច ក៏យើងមិនសូវយកដែរ មិនមែនរឿងគេមិនល្អទេ តែមានអ្នកសរសេរច្រើនហើយ យើងចង់បានគំនិតថ្មី»៕