អន្តរជាតិ
×![]()
ក្រុមហ៊ុនបច្ចេកវិទ្យា Apple បានខាតបង់ប្រាក់អស់ប្រមាណ ៤៥២ពាន់លានដុល្លារ ក្នុងថ្លៃរបស់ ក្រុមហ៊ុនលើទីផ្សារ ព្រោះតែតម្លៃហ៊ុនរបស់ក្រុមហ៊ុនបច្ចេកវិទ្យាយក្សរបស់អាមេរិកមួយនេះ បានធ្លាក់ចុះយ៉ាងគំហុក គិតចាប់ពីខែតុលាមក។ រីឯមូលហេតុដែលនាំឲ្យធ្លាក់ចុះនេះវិញ នាយកប្រតិបត្តិក្រុមហ៊ុននេះលោក Tim Cook បានទម្លាក់កំហុសលើចិន។
តម្លៃភាគហ៊ុនរបស់ក្រុមហ៊ុន Apple បានធ្លាក់ចុះប្រមាណ ៣៩,១ ភាគរយ ចាប់តាំងពីថ្ងៃទី០៣ ខែតុលាឆ្នាំ២០១៨ មក។ កាលពីចុងខែវិច្ឆិកា បានធ្លាក់មកត្រឹម ២៣៣,៤៧ដុល្លារក្នុងមួយហ៊ុន។ ជាមួយគ្នានេះ ថ្លៃរបស់ក្រុមហ៊ុនលើទីផ្សារ (market capitalization) បានធ្លាក់មកត្រឹម ៦៧៤ពាន់លានដុល្លារ ដែលតូចជាងក្រុមហ៊ុន Microsoft, ក្រុមហ៊ុន Amazon, ក្រមហ៊ុន Alphabet និង ក្រុមហ៊ុន Berkshire Hathaway។
ក្រោយពីតម្លៃនៃផ្សារភាគហ៊ុនរបស់ក្រុមហ៊ុនខ្លួន ចេះតែបន្តធ្លាក់ចុះឥតឈប់ឈរ ក្រុមហ៊ុនយក្សមួយ កាលពីថ្ងៃទី០២ មករាកន្លងទៅ បានចេញសេចក្តីប្រកាសព្រមានភ្លាមៗមួយដល់ក្រុមអ្នកវិនិយោគ ដោយខ្លួនបានសម្រេចបន្ទាបផែនការប្រាក់ចំណូលសម្រាប់ត្រីមាសទីមួយរបស់ខ្លួន។
យោងតាមសារព័ត៌មាន CNBC នាយកប្រតិបត្តិក្រុមហ៊ុនលោក Tim Cook បានលើកឡើងពីកត្តាសំខាន់មួយចំនួន ដែលនាំឲ្យមានការកាត់បន្ថយផែនការចំណូលបែបនេះ។ ត្រង់នេះ លោកបានអះអាងថា កត្តាទីមួយគឺមកពីការលក់ទូរសព្ទ IPhone មានការធ្លាក់ចុះ និងមួយទៀតគឺការថមថយសន្ទុះនៃកំណើនសេដ្ឋកិច្ចចិន ដែលបណ្តាលមកពីសង្គ្រាមពាណិជ្ជកម្ម ដែលកំពុងឆាបឆេះ។
ទាក់ទិននឹងបញ្ហាបន្ទាបផែនការប្រាក់ចំណូលរបស់ក្រុមហ៊ុនបច្ចេកវិទ្យាយក្សរបស់អាមេរិកនេះ ប្រធានាធិបតីអាមេរិក ដូណាល់ ត្រាំ បានបញ្ជាក់ថា លោកពុំព្រួយបារម្ភចំពោះបញ្ហានេះឡើយ។ ថ្លែងនៅមុខក្រុមអ្នកសារព័ត៌មាននាសេតវិមានអាមេរិក កាលពីចុងសប្តាហ៍មុន លោកត្រាំ ថែមទាំងបានអួតអាងទៀតថា តម្លៃផ្សារភាគហ៊ុនរបស់ក្រុមហ៊ុន Apple បានកើនឡើង «រាប់រយភាគរយ» ចាប់តាំងពីលោកបានចូលកាន់តំណែងមក។
ទន្ទឹមនឹងគ្នានេះដែរ លោកប្រធានាធិបតីទី៤៥របស់អាមេរិករូបនេះ ក៏បានលើកទឹកចិត្តឲ្យលោក Cook សាងសង់រោងចក្រ និងផលិតផលបន្ថែមនៅលើទឹកដីអាមេរិកវិញ។ លោក ត្រាំបាននិយាយបែបនេះ៖ «ក្រុមហ៊ុន Apple បានបង្កើតផលិតផលរបស់ពួកគេនៅក្នុងប្រទេសចិន។ ហើយចិនបានទទួលផលប្រយោជន៍យ៉ាងច្រើនសន្ធឹកសន្ធាប់ពីក្រុមហ៊ុនអេបផល ច្រើនជាងអាមេរិកទៅទៀតផង»៕
Tag:
ក្រុមហ៊ុនអេបផល
បច្ចេកវិទ្យា
សហរដ្ឋអាមេរិក
© រក្សាសិទ្ធិដោយ thmeythmey.com
