ប្រភពចំណូលមិនរឹងមាំ និងការជួយជ្រោមជ្រែងពីថ្នាក់ដឹកនាំនៅមានកម្រិត ធ្វើឲ្យការចំណាយរបស់សហព័ន្ធកីឡាទូកកានូនិងរ៉ូអ៊ីងកម្ពុជាមានទំហំធំជាងចំណូលសម្រាប់អាណត្តិទី៣។ ក្រោយទូទាត់ការចំណាយ សហព័ន្ធនេះ នៅជំពាក់ជាង២លានរៀល។ នេះបើតាមរបាយការណ៍ហិរញ្ញវត្ថុរបស់សហព័ន្ធ ដែលបានបង្ហាញនៅព្រឹកថ្ងៃទី៨ ខែមករា ឆ្នាំ២០១៩។
ក្រោយទូទាត់ចំណាយចំណូលក្នុងអាណត្តិទី៣ សហព័ន្ធកីឡាទូកកានូ និងរ៉ូអ៊ីងកម្ពុជា ដែលមានសម្តេច ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃជាប្រធាន មានទំហំចំណាយធំជាងចំណូល ដែលនាំឲ្យសហព័ន្ធនៅជំពាក់គេជាង២លានរៀល។ សម្រាប់អាណត្តិទី៣ សហព័ន្ធនេះ រកចំណូលបានចំនួន៤៤១លានរៀល និងចំណាយអស់ចំនួន៤៤៣,១៤៨,០០០រៀល។
ចំណូលភាគច្រើនរបស់សហព័ន្ធបានមកពីការឧបត្ថម្ភរបស់សម្តេច ស ខេង និងការដាក់ស្តង់ពិព័រណ៍ផលិតផល។ ចំណែកការចំណាយភាគច្រើនលើការទិញសម្ភារដូចជាទូកប្រពៃណី ទូករ៉ូអ៊ីង និងការរៀបចំពានរង្វាន់សម្តេច ស ខេង ជាដើម។ កត្តាដែលនាំឲ្យការចំណាយរបស់សហព័ន្ធធំជាងចំណូលនេះ ដោយសារសហព័ន្ធសហព័ន្ធពុំទាន់មានប្រភពចំណូលច្បាស់លាស់ និងការជួយជ្រោមជ្រែងពីថ្នាក់ដឹកនាំនៅមានកម្រិត។
«មូលដ្ឋានចំណូលរបស់សហព័ន្ធ នៅមិនទាន់រឹងមាំប្រាកដប្រជានៅឡើយទេ ហើយការគាំទ្រហិរញ្ញវត្ថុពីក្រសួងអប់រំ យុវជន និងកីឡានៅមានកម្រិត។ កម្មវិធីការងារកីឡាភាគច្រើនម្ចាស់ជំនួយត្រូវការបដិភាគចូលរួមពីសហព័ន្ធក្នុងការស្នើសុំទីតាំងនៅតាមបណ្តារាជធានីខេត្ត ដើម្បីដាក់តាំងផ្សព្វផ្សាយលក់ផលិតផលជាតិនិងអន្តរជាតិ»។ នេះជាការបញ្ជាក់ក្នុងរបាយការណ៍ហិរញ្ញវត្ថុដែលអានដោយកញ្ញា មាស តឿ អគ្គហិរញ្ញឹកក្នុងមហាសន្និបាតនៅព្រឹកថ្ងៃទី៨ ខែមករា ឆ្នាំ២០១៩។
ដើម្បីអភិវឌ្ឍន៍វិស័យកីឡាទូកកានូនិងរ៉ូអ៊ីងឲ្យកាន់តែរីកចម្រើន សហព័ន្ធនេះប្តេជ្ញាថា សហព័ន្ធនឹងខិតខំរៀបចំគម្រោងអភិវឌ្ឍន៍កីឡានេះ ក្នុងការស្វែងរកជំនួយ, ប្រើប្រាស់ថវិកាឲ្យបានត្រឹមត្រូវ, ជំរុញការស្វែងរកវិភាគទានពីគណៈកម្មការទ្រទ្រង់របស់សហព័ន្ធ និងការបង់សមាជិកភាពពីក្លិប-សមាគម, ស្វែងរកដៃគូ និងក្រុមហ៊ុនឯកជន ដើម្បីរៀបចំឧស្សាហកម្មកីឡា និងបង្កើនទំនាក់ទំនងល្អជាសប្បុរសជន ដើម្បីបង្កើនប្រភពចំណូលជាដើម។
សមាជិកប្រតិបត្តិដែលអង្គមហាសន្និបាតបោះឆ្នោតគាំទ្រដោយការលើកដៃមានចំនួន៣៣រូបរួមមាន សម្តេច ស ខេង ជាប្រធាន, លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម, លោក ទៀ វិញ អគ្គមេបញ្ជាការកងយោធពលខេមរភូមិន្ទ, លោក ឃួង ស្រេង អភិបាលរាជធានីភ្នំពេញ, លោក ម៉ៅ ភិរុណ និងលោក ឯម ម៉ាអូរី ជាអនុប្រធាន។ ចំណែកលោក មាស សារិន ត្រូវដំឡើងពីអគ្គលេខាធិការទៅជាអនុប្រធានអចិន្ត្រៃ ខណៈតួនាទីអគ្គលេខាធិការធ្លាក់មកលោក ជា ប៊ុនហេង និងកញ្ញា មាស តឿ អគ្គហិរញ្ញឹក។
ក្រៅពីនេះមានសមាជិក២១រូបទៀតរួមមានលោក ហង្ស សុវណ្ណ, លោកអភិបាលខេត្តកំពង់ចាម, ខេត្តកែប, កំពង់ធំ, រតនគិរី, សៀមរាប, កំពង់ស្ពឺ, ក្រចេះ, ឧត្តរមានជ័យ, បាត់ដំបង, ព្រៃវែង, មណ្ឌលគិរី, ត្បូងឃ្មុំ, ព្រះសីហនុ, ស្វាយរៀង, កំពង់ឆ្នាំង, តាកែវ, កំពត, កោះកុង, បន្ទាយមានជ័យ, ប៉ៃលិន, ពោធិ៍សាត់, ស្ទឹងត្រែង និងព្រះវិហារ៕