ជាតិ
សេដ្ឋកិច្ច
រថភ្លើង ៣គ្រឿងនាំចូលពីម៉ិកស៊ិក ត្រៀមដំណើរការនៅភ្នំពេញ រូបពីក្រសួងសាធារណការ និងដឹកជញ្ជូន
× ភ្នំពេញ៖ ក្រុមហ៊ុន រ៉ូយ៉ាល់ រ៉េលវ៉េ (Royal Railways) ដែលជាក្រុមហ៊ុនធ្វើប្រតិបត្តិការសេវាកម្មរថភ្លើងនៅកម្ពុជា នៅថ្ងៃទី៨ខែមករា បាននាំចូលរថភ្លើងទំនើប Tramway ចំនួន៣គ្រឿងពីប្រទេសម៉ិកស៊ិក ដើម្បីត្រៀមបើកដំណើរនៅភ្នំពេញ ឬអាចឈានដល់រត់លើខ្សែរថភ្លើងទៅព្រះសីហនុ និងប៉ោយប៉ែត។
លោក ស៊ុន ចាន់ថុល នឹងស្នើទៅសម្ដេចនាយករដ្ឋមន្ត្រី ហ៊ុន សែន ដើម្បីឲ្យសម្ដេចអញ្ជើញជាអធិបតីក្នុងការសម្ពោធឲ្យប្រើប្រាស់រថភ្លើង៣គ្រឿងនេះ ដែលនឹងរត់ពីស្ថានីយរថភ្លើងភ្នំពេញ ទៅព្រលានយន្តហោះអន្តរជាតិភ្នំពេញ ឬអាចឲ្យដំណើរការសម្រាប់ខ្សែរថភ្លើងទៅខេត្តព្រះសីហនុ និងប៉ោយប៉ែត។ រដ្ឋមន្ត្រីក្រសួងសាធារណការ និងដឹកជញ្ជូនរូបនេះ បានថ្លែងប្រាប់អ្នកកាសែតនៅក្នុងពិធីបើកសន្និបាទបូកសរុបការងារប្រចាំឆ្នាំរបស់ក្រសួងបែបនេះ ប៉ុន្តែលោកមិនបានបញ្ជាក់ពីពេលវាលានៃការសម្ពោធរថភ្លើងថ្មីនេះឡើយ។
បើតាមលោក ចន ហ្គារី នាយកប្រតិបត្តិក្រុមហ៊ុន Royal Railways រថភ្លើងទាំងនេះមានប្រវែង ១៨ម៉ែត្រ ទទឹង ២ម៉ែត្រកន្លះ អាចដឹកភ្ញៀវចំនួន ៧៨នាក់ និងអាចរត់ក្នុងល្បឿនមធ្យម ៧០ទៅ៨០គីឡូម៉ែត្រក្នុងមួយម៉ោងទៅតាមស្ថានភាពផ្លូវ។ លោក ចន ហ្គារី ត្រូវបានដកស្រង់សំដីដោយគេហទំព័ររបស់ទូរទស្សន៍ CNC ដូចនេះនៅថ្ងៃទី៩ខែមករា។
គួរបញ្ជាក់ថា ខ្សែរថភ្លើងភាគនិរតី និងខ្សែរថភ្លើងភាគពាយព្យរបស់កម្ពុជា កំពុងដំណើរការនាពេលបច្ចុប្បន្ននេះ ហើយនៅឆ្នាំ២០១៨ រដ្ឋាភិបាលបានសម្ពោធខ្សែរថភ្លើងខ្លីពីស្ថានីយរថភ្លើងភ្នំពេញ ទៅអាកាសយានដ្ឋានអន្តរជាតិភ្នំពេញ ព្រមជាមួយគ្នានេះកម្ពុជាត្រៀមតភ្ជាប់ការដឹកជញ្ជូនតាមផ្លូវដែកជាមួយប្រទេសថៃទៀតផង៕
© រក្សាសិទ្ធិដោយ thmeythmey.com