អន្តរជាតិ
ទៅពិនិត្យព្រំដែន លោក ត្រាំ គំរាមប្រកាសដាក់ប្រទេសក្នុងភាពអាសន្នដើម្បីយកលុយសង់ជញ្ជាំង
×![]()
ដោយ: តន ចាន់រិទ្ធារ៉ា
ប្រធានាធិបតីអាមេរិក ដូណាល់ ត្រាំ នៅថ្ងៃទី១០ ខែមករា បានទៅត្រួតពិនិត្យតំបន់ព្រំដែននៅភាគខាងត្បូងប្រទេស ដែលជាច្រកដ៏សំខាន់សម្រាប់ជនអន្តោប្រវេសន៍។ លោក ត្រាំ បានសរសើរមន្ត្រីអនុវត្តច្បាប់ និងឆ្មាំល្បាតព្រំដែនដែលធ្វើការងារបានល្អ ប៉ុន្តែលោកមិនភ្លេចការទារលុយដើម្បីសាងសង់ជញ្ជាំង។ ជាថ្មីទៀត លោកប្រធានាធិបតីអាមេរិកគំរាមប្រកាសដាក់ប្រទេសក្នុងស្ថានភាពអាសន្ន បើសភមិនផ្ដល់លុយឲ្យលោកទេនោះ។ 
រដ្ឋាភិបាលសហព័ន្ធត្រូវបានបិទដោយផ្នែក។ បុគ្គលិករដ្ឋរាប់ពាន់នាក់ត្រូវធ្វើការដោយគ្មានប្រាក់ខែ។ នេះជាស្ថានភាពនយោបាយនៅអាមេរិកដែលជាប់គាំងដោយសារការលុយធ្វើជញ្ជាំងព្រំដែនរបស់ប្រធានាធិបតី ដូណាល់ ត្រាំ ខណៈតំណាងរាស្ត្របក្សប្រជាធិបតេយ្យបន្តជំទាស់ការយកលុយសង់ជញ្ជាំងព្រំដែនភាគខាងត្បូង។ គិតត្រឹមថ្ងៃទី១០ ខែមករា ការបិទដំណើរការរដ្ឋាភិបាលសហព័ន្ធឈានដល់ថ្ងៃទី២០ ហើយ ឯដំណោះស្រាយនៅតែគ្មានដដែល។
នៅថ្ងៃទី១០ ខែមករា លោក ត្រាំ បានធ្វើដំណើរទៅកាន់ព្រំដែនភាគត្បូងជាប់ម៉ិកស៊ិក ដើម្បីជំរុញការទាមទារលុយធ្វើជញ្ជាំងរបស់លោក។ ឈរអមដោយមន្ត្រីល្បាតព្រំដែនដែលកំពុងបំពេញការងារដោយគ្មានប្រាក់ខែនោះ លោក ត្រាំ ជាថ្មីម្ដងទៀតបានព្រមានដោយចំហថា នឹងដាក់អាមេរិកក្នុងស្ថានភាព
អាសន្ន បើបក្សប្រជាធិបតេយ្យមិនបើកផ្លូវដល់កញ្ចប់លុយតាមបំណងលោកទេនោះ។
តាមពិតទៅ លោក ត្រាំ ចង់បានលុយចំនួន ៥,៧ ពាន់លានដុល្លារដើម្បីសាងសង់ជញ្ជាំងព្រំដែនជាមួយម៉ិកស៊ិក។ ការសង់ជញ្ជាំងនេះ ជាការសន្យារបស់លោកតាំងពីសម័យឃោសនាបោះឆ្នោតក្នុងឆ្នាំ ២០១៦ មកម្ល៉េះ។ កាលនោះមេដឹកនាំអាមេរិករូបនេះធានាថា រាល់ការចាយវាយសម្រាប់សង់ជញ្ជាំងព្រំដែនអាមេរិក ម៉ិកស៊ិកជាអ្នករ៉ាប់រង។ ប៉ុន្តែចុងក្រោយលោកបែរជាមកទារលុយពីអ្នកបង់ពន្ធអាមេរិកទៅវិញ។
ការខ្វែងគំនិតគ្នាជាមួយសមាជិកសភាបក្សប្រជាធិបតេយ្យ ក៏បង្កើតជាបញ្ហាដូចសព្វថ្ងៃតែម្ដងទៅ។ បក្សប្រជាធិបតេយ្យបានប្រាប់ឲ្យលោក ត្រាំ បោះបង់បំណងស្ថាបនាជញ្ជាំងនេះ ព្រោះមិនមានប្រសិទ្ធភាព និងបានត្រឹមខ្ជះខ្ជាយលុយឥតប្រយោជន៍ប៉ុណ្ណោះ។ ប៉ុន្តែប្រធានាធិបតីអាមេរិកនៅតែឡាំប៉ា ប្រកាន់ជំហររឹងរូស ហើយក៏មិនខ្ចីជជែកជាមួយបក្សប្រជាធិបតេយ្យលើបញ្ហាផ្សេងទៀតដែរ បើរឿងជញ្ជាំងនេះមិនត្រូវបានដោះស្រាយនោះ។
ខឹងធ្វើអ្វីមិនបាន លោក ត្រាំ អាចនឹងប្រកាសដាក់ប្រទេសក្នុងភាពអាសន្នមិនខាន ដោយលោកអះអាងថា វាជារឿងធម្មតា។ ដាក់ប្រទេសក្នុងភាពអាសន្ន ជាការផ្ដល់សិទ្ធិឲ្យលោក ត្រាំ ប្រើប្រាស់លុយតាមការចាំបាច់ដោយមិនចាំបាច់ឆ្លងសភានាំវែងឆ្ងាយឡើយ។ ប៉ុន្តែវាអាចបង្កើតជាករណីតវ៉ាពីសំណាក់បក្សប្រជាធិតេយ្យដែលយល់ថា ការសម្រេចចិត្តបែបនេះ មិនស្របរដ្ឋធម្មនុញ្ញឡើយ។ តែលោក ត្រាំ និយាយថា មេធាវីរបស់លោកឲ្យយោបល់ថា មានសិទ្ធិ។
សូមរំឭកថា ការបិទរដ្ឋាភិបាលដោយផ្នែកនេះ ចាប់ផ្តើមឡើងកាលពីចុងខែធ្នូ ឆ្នាំ២០១៨ ។ ការអូសបន្លាយនៃការបិទរដ្ឋាភិបាលនេះ បង្កប៉ះពាល់ដល់ក្រសួង៩ ក្នុងចំណោមក្រសួងទាំងអស់ ១៥ ហើយទីភ្នាក់ងារសំខាន់ៗចំនួនច្រើនជាង១០ ដែលត្រូវផ្អាកដំណើរការ។ បុគ្គលិកបម្រើការងារទាំងអស់ប្រហែល ៨សែននាក់នឹងមិនទទួលបានប្រាក់កម្រៃ ក្នុងនោះមាន ៤២ ម៉ឺននាក់ត្រូវបន្តធ្វើការងារដោយគ្មានប្រាក់កម្រៃ ខណៈ៣៨ ម៉ឺននាក់ផ្សេងទៀតត្រូវផ្អាកការងាររបស់ពួកគេតែម្តង៕
Tag:
អាមេរិក
ដូណាល់ ត្រាំ
© រក្សាសិទ្ធិដោយ thmeythmey.com
