ជាតិ
សម្តេច ហ៊ុន សែន ប្រាប់មិនឲ្យផ្តល់លិខិតឆ្លងដែនការទូតកម្ពុជាទៅទីប្រឹក្សា និងជំនួយការដែលគ្មានសញ្ជាតិខ្មែរពីកំណើត
×![]()
រាជរដ្ឋាភិបាលកម្ពុជា បានចេញសារាចរណែនាំមួយកាលពីថ្ងៃទី៩ ខែមករា ដោយបញ្ជាក់ថា លិខិតឆ្លងដែនការទូតកម្ពុជា មិនត្រូវផ្ដល់ជូនទីប្រឹក្សា ឬជំនួយការដែលគ្មានសញ្ជាតិខ្មែរពីកំណើតរបស់ឥស្សរជនជាន់ខ្ពស់ ឬរបស់ក្រសួង ស្ថាប័ននានាឡើយ លើកលែងតែករណីដែលរដ្ឋាភិបាលយល់ថាចាំបាច់បំផុត។ ការណែនាំនេះ ធ្វើឡើងបន្ទាប់ពីរាជរដ្ឋាភិបាលសង្កេតឃើញថា ឥស្សរជន និងក្រសួងស្ថាប័នមួយចំនួន បានតែងតាំងបុគ្គលដែលជាពលរដ្ឋបរទេស ឲ្យធ្វើជាទីប្រឹក្សា និងជំនួយការ ហើយក្នុងចំណោមបុគ្គលដែលត្រូវបានតែងតាំង មានខ្លះបានចូលសញ្ជាតិខ្មែរ និងបានដាក់ពាក្យសុំប្រើប្រាស់លិខិតឆ្លងដែនការទូតកម្ពុជា។ សម្រាប់រាជរដ្ឋាភិបាល ការប្រើប្រាស់លិខិតឆ្លងដែនការទូតក្នុងករណីនេះ គឺមិនចាំបាច់។
ដើម្បីបង្កា និងទប់ស្កាត់ការប្រើប្រាស់លិខិតឆ្លងដែនការទូតមិនត្រឹមត្រូវទៅតាមបេសកកម្ម រដ្ឋាភិបាល បានប្រាប់ទៅគ្រប់ក្រសួង ស្ថាប័ន ប្រមូលលិខិតឆ្លងដែនការទូតដែលក្រសួង ស្ថាប័ននោះ ស្នើសុំជូនទីប្រឹក្សា និងជំនួញការរបស់ខ្លួន ដែលពុំមានសញ្ជាតិខ្មែរពីកំណើត ប្រគល់ទៅក្រសួងការបរទេស និងសហប្រតិបត្តិការអន្តរជាតិ មិនឲ្យហួសពេល១ខែ គិតចាប់ពីថ្ងៃចុះហត្ថលេខាលើសារាចរនេះ។
ក្រសួងការបរទេស ត្រូវពិនិត្យ និងធ្វើមោឃភាពលិខិតឆ្លងដែនការទូត ដែលបានផ្ដល់ជូនបុគ្គលគ្មានសញ្ជាតិខ្មែរពីកំណើត។ រីឯ ក្រសួងមហាផ្ទៃ មានភារកិច្ចសហការទប់ស្កាត់ការប្រើប្រាស់លិខិតឆ្លងដែនការទូតទាំងនោះ សម្រាប់ការចេញចូលនៅតាមច្រកព្រំដែននានា តាមការស្នើរបស់ក្រសួងការបរទេស។ នេះបើតាមសារាចរដដែល៕
Tag:
លិខិតឆ្លងដែនការទូត
ទីប្រឹក្សា
ជំនួយការ
© រក្សាសិទ្ធិដោយ thmeythmey.com
